മെഡിക്കൽ കോഴ്‌സ് പഠിക്കാൻ വിദേശങ്ങളിൽ നിരവധി അവസരങ്ങളാണ് ഇപ്പോൾ ഉള്ളത്. യുഎസ്, ജർമനി, ചൈന, ജോർജിയ, റഷ്യ, ഉക്രെയ്ൻ, ബെലാറസ്, മോൾഡോവ, ലിത്വേനിയ, ഹംഗറി തുടങ്ങിയ രാജ്യങ്ങളിൽ അനുയോജ്യമായത് വിദ്യാർത്ഥിക്ക് തിരഞ്ഞെടുക്കാം .
അമേരിക്ക, യു.കെ., കാനഡ, ന്യൂസീലൻഡ്‌, ഓസ്‌ട്രേലിയ എന്നിവ ലോകോത്തര നിലവാരമുള്ള മെഡിക്കൽ വിദ്യാഭ്യാസസൗകര്യമാണ് മുന്നോട്ടുവെക്കുന്നത്.മെഡിക്കൽ കൗൺസിൽ ഓഫ് ഇന്ത്യയുടേയും വേൾഡ് ഹെൽത്ത് ഓർഗനൈസേഷന്റെയും അംഗീകാരമുള്ള ഇംഗ്ലീഷ് പഠന മാധ്യമമായുള്ള ഗവൺമെന്റ് യൂണിവേഴ്സിറ്റികളിൽ വേണം പ്രവേശനത്തിനു അപേക്ഷിക്കേണ്ടത്.

അതത് രാജ്യങ്ങൾ നിഷ്കർഷിക്കുന്ന ഇംഗ്ലീഷ് പ്രാവീണ്യപരീക്ഷ പാസ്സാകേണ്ടതുണ്ട്. സ്കോളാസ്റ്റിക് ആപ്റ്റിറ്റ്യൂഡ് ടെസ്റ്റ് (SAT), അമേരിക്കൻ കോളേജ് ടെസ്റ്റിങ്‌ (ACT) എന്നിവ മികച്ച സ്കോറോടെ പൂർത്തിയാക്കി നാലുവർഷത്തെ ബി.എസ്. പ്രീമെഡിക്കൽ കോഴ്‌സിന് ചേരണം. തുടർന്ന് മെഡിക്കൽ കോളേജ് അഡ്മിഷൻ ടെസ്റ്റെഴുതി (MCAT) മെഡിക്കൽ സ്കൂളുകളിൽ ഡോക്ടർ ഓഫ് മെഡിസിൻ (MD) പ്രോഗ്രാമിന് ചേരാം. ഇന്റേൺഷിപ്പും എക്സ്റ്റേൺഷിപ്പും പൂർത്തിയാക്കിയാൽ ഡോക്ടറായി പ്രാക്ടീസ് ചെയ്യാം.

റഷ്യ, ചൈന, ജോർജിയ, യുക്രൈൻ, കസാഖ്‌സ്താൻ, ഫിലിപ്പീൻസ്, മലേഷ്യ, സിങ്കപ്പൂർ തുടങ്ങിയ രാജ്യങ്ങളിലാണ് ഇന്ത്യൻ വിദ്യാർഥികൾ കൂടുതലായി പ്രവേശനം നേടുന്നത്. അഡ്മിഷൻ ലഭിക്കാൻ മെഡിക്കൽകൗൺസിൽ ഓഫ് ഇന്ത്യയുടെ യോഗ്യതാസർട്ടിഫിക്കറ്റ് ആവശ്യമാണ്.
അടുത്തവർഷംമുതൽ വിദേശത്ത് മെഡിക്കൽ പ്രവേശന യോഗ്യതാസർട്ടിഫിക്കറ്റ് ലഭിക്കാൻ നീറ്റ് നിർബന്ധമാക്കാനുള്ള നടപടികളെക്കുറിച്ച് ആലോചിക്കുകയാണ് മെഡിക്കൽ കൗൺസിൽ ഓഫ് ഇന്ത്യയും കേന്ദ്ര ആരോഗ്യമന്ത്രാലയവും. ഇന്ത്യയിൽ പഠിച്ചിറങ്ങുന്നവർക്ക് എക്സിറ്റ് പരീക്ഷയും ഉണ്ടാകാൻ സാധ്യതയുണ്ട്.
വിദേശത്ത് പഠിക്കുന്ന വിദ്യാർഥികൾ കോഴ്‌സ് പൂർത്തിയാക്കിയാൽ FMGE ടെസ്റ്റിന് തയ്യാറെടുക്കണം. പരീക്ഷ പാസാകുന്നവർക്ക് ഇന്റേൺഷിപ്പും പൂർത്തിയാക്കിയാൽ രജിസ്‌ട്രേഷൻ ലഭിക്കും.മെഡിക്കൽ കൗൺസിൽ ഓഫ് ഇന്ത്യയിൽ രജിസ്‌ട്രേഷനില്ലെങ്കിൽ ഇന്ത്യയിൽ ഡോക്ടറായി പ്രാക്ടീസ് ചെയ്യാനാവില്ല.
നിലവിൽ ഇന്ത്യയ്ക്ക് പുറത്ത് എം.ബി.ബി.എസ് പഠനം ആഗ്രഹിക്കുന്ന വിദ്യാർത്ഥികൾ മെഡിക്കൽ കൗൺസിൽ ഒഫ് ഇന്ത്യയിൽ നിന്ന് ആവശ്യകതാ സർട്ടിഫിക്കറ്റ് നേടിയിരിക്കണം. പ്രതിവർഷം ഏഴായിരം വിദ്യാർത്ഥികൾ ഇന്ത്യയ്ക്ക് പുറത്ത് എം.ബി.ബി.എസ് പ്രവേശനം തേടുന്നുണ്ട്. ചൈനയിലേക്കും റഷ്യയിലേക്കുമാണ് ഇവരിൽ ഭൂരിഭാഗവും പോകുന്നത്.