കർണാടകത്തിലെ എൻജിനീയറിങ് കോളേജുകളിൽ വിദ്യാർഥികൾ കുറയുന്നു. ഈ അധ്യയനവർഷം സംസ്ഥാനത്തെ 30 സ്വകാര്യ എൻജിനീയറിങ് കോളേജുകളിൽ ഒരാൾപോലും അഡ്മിഷനുവേണ്ടി എത്തിയിട്ടില്ല . 33 കോളേജുകളിൽ പത്തിൽ താഴെ വിദ്യാർഥികൾമാത്രമാണ് പ്രവേശനം നേടിയത്.സംസ്ഥാനത്തെ സ്വകാര്യ മെഡിക്കൽ എൻജിനീയറിങ് കോളേജുകളുടെ കൺസോർഷ്യമായ കൊമെഡ്കെയിൽനിന്നുള്ള വിവരമനുസരിച്ച് ആറുകോളേജുകളിൽ മാത്രമാണ് മുഴുവൻ സീറ്റുകളിലേക്കും വിദ്യാർഥികളെത്തിയത്. സംസ്ഥാനത്തെ ഏറ്റവും മികച്ച കോളേജുകളെന്ന് വിശേഷിപ്പിക്കപ്പെടുന്ന ഇവയിൽ നാലെണ്ണം ബെംഗളൂരുവിലും രണ്ടെണ്ണം മൈസൂരുവിലുമാണ് . പഠനനിലവാരത്തിൽ പിന്നാക്കമായ കോളേജുകളിലാണ് ഒരുവിദ്യാർഥിപോലും പഠിക്കാനെത്താത്തത്.
തൊഴിലവസരങ്ങൾ കുറഞ്ഞതും ഇതിനൊരു കാരണമാകുന്നു എന്ന് കൊമെഡ്കെ അഭിപ്രായപ്പെട്ടു.സംസ്ഥാനത്ത് കർണാടക എക്സാമിനേഷൻ അതോറിറ്റിയുടെ (കെ.ഇ.എ.) കീഴിലുള്ള 64,000 എൻജിനീയറിങ് സീറ്റുകളിൽ 21,000 സീറ്റുകളും ഒഴിഞ്ഞുകിടക്കുകയാണ്.