എയ്ഡഡ് മേഖലയിലെ സ്കൂളുകളിൽ താൽക്കാലിക അധ്യാപകരെ നിയമിക്കണമെന്ന ആവശ്യം പരിഗണിച്ചു, സർക്കാർ, എയ്ഡഡ് സ്കൂളുകളിലെ താൽക്കാലിക ഒഴിവുകളിൽ ദിവസവേതന അടിസ്ഥാനത്തിൽ നിയമനം നടത്തുന്നതിന് ഗവണ്മെന്റ് അനുമതി നൽകി. സർക്കാർ സ്കൂളുകളിൽ വ്യവസ്ഥകൾക്കു വിധേയമായി ദിവസ വേതനാടിസ്ഥാനത്തിൽ അധ്യാപക നിയമനത്തിന് അനുമതി നൽകി നേരത്തെ തന്നെ നൽകിയിരുന്നു.
എയ്ഡഡ് സ്കൂളുകളിലെ 30 ദിവസത്തിൽ കൂടുതലുള്ളതും എന്നാൽ ഒരു അക്കാദമിക് വർഷത്തിൽ കുറവുള്ളതുമായ ഒഴിവുകളിലേക്കാണ് ഇത്തരത്തിൽ നിയമനം നടത്തുന്നത്. ധനവകുപ്പ് പുറപ്പെടുവിച്ച ഉത്തരവനുസരിച്ചു ദിവസ വേതനാടിസ്ഥാനത്തിൽ നിയമിതരാകുന്ന പ്രൈമറി സ്കൂൾ അധ്യാപകർക്ക് ദിവസം 850 രൂപയും (പരമാവധി 24650 രൂപ), ഹൈസ്കൂൾ അസിസ്റ്റന്റിനു ദിവസം 975 രൂപയും (പരമാവധി 29200 രൂപ), പാർട് ടൈം ഹൈസ്കൂൾ ഭാഷാധ്യാപകർക്കു ദിവസം 675 രൂപയും (മാസം പരമാവധി 18900 രൂപ), പ്രൈമറി സ്കൂൾ പാർട് ടൈം ഭാഷാധ്യാപകർക്കു ദിവസം 650 രൂപയും വേതനമായി അനുവദിക്കും.