മെഡിക്കൽ വിദ്യാഭ്യാസ വകുപ്പിൽ സ്റ്റാഫ് നഴ്സ് ഗ്രേഡ് രണ്ട് സാധ്യതാ ലിസ്റ്റ് പിഎസ്‌സി പ്രസിദ്ധീകരിച്ചു. മെയിൻ ലിസ്റ്റിൽ 3969ഉം സംവരണ സമുദായങ്ങൾക്കുള്ള സപ്ലിമെന്ററി ലിസ്റ്റുകളിൽ 5069ഉം ഭിന്നശേഷിക്കാരുടെ പ്രത്യേക ലിസ്റ്റിൽ 44ഉം ഉൾപ്പെടെ 9082 പേരെയാണ് സാധ്യതാ ലിസ്റ്റിൽ ഇപ്പോൾ ഉൾപ്പെടുത്തിയിരിക്കുന്നത്.

ലിസ്റ്റിൽ ഉൾപ്പെട്ടവരുടെ സർട്ടിഫിക്കറ്റ് പരിശോധനകൂടി പൂർത്തിയാക്കിയ ശേഷം ജൂൺ അവസാനത്തോടെ റാങ്ക് ലിസ്റ്റ് പ്രസിദ്ധീകരിക്കും. പരീക്ഷയിൽ 27.33 മാർക്ക് വരെ വാങ്ങിയവരെയാണ് മെയിൻ ലിസ്റ്റിൽ ഉൾപ്പെടുത്തിയിരിക്കുന്നത്. കട്ട്ഒാഫ് മാർക്കിൽ ആവശ്യമായ കുറവ് വരുത്തി വിവിധ സംവരണ സമുദായങ്ങളുടെ സപ്ലിമെന്ററി ലിസ്റ്റുകളിൽ ഉദ്യോഗാർഥികളെ ഉൾപ്പ‌െടുത്തിയിട്ടുണ്ട്.

കഴിഞ്ഞ ഫെബ്രുവരി മൂന്നിനായിരുന്നു സ്റ്റാഫ് നഴ്സ് ഗ്രേഡ് രണ്ട് പരീക്ഷ പിഎസ്‌സി നടത്തിയത്. 72,234 പേർ അപേക്ഷ നൽകിയിരുന്നു. ഇതിൽ 60,000ൽ അധികം പേർ പരീക്ഷ എഴുതി. 100 മാർക്കിന് നടത്തിയ പരീക്ഷയിലെ രണ്ട് ചോദ്യങ്ങൾ മൂല്യനിർണ്ണയത്തിൽ നിന്ന് പിഎസ്‌സി ഒഴിവാക്കിയിരുന്നു. അതിനാൽ ആകെ മാർക്ക് 98 ആയി കുറഞ്ഞു. 98ൽ 27.33 മാർക്ക് വരെ വാങ്ങിയവരെയാണ് മെയിൻ ലിസ്റ്റിൽ ഉൾപ്പെടുത്തിയിരിക്കുന്നത്.