പ്ലസ് വൺ രണ്ടാം അലോട്ട്‌മെന്റുപ്രകാരമുള്ള പ്രവേശനം ഇന്ന് വൈകുന്നേരം അഞ്ചുവരെ. മെറിറ്റ് ക്വോട്ടയിൽ ഒന്നാം ഓപ്ഷനിൽ അലോട്ട്‌മെന്റ് ലഭിച്ചവർ ഫീസ്‌ അടച്ച് സ്ഥിരപ്രവേശനം നേടേണ്ടതാണ്.

താഴ്‌ന്ന ഓപ്ഷൻ ലഭിക്കുന്നവർക്ക് താൽക്കാലിക പ്രവേശനമോ സ്ഥിരപ്രവേശനമോ നേടാനാകും. അലോട്ട്‌മെന്റ്‌ ലഭിച്ചിട്ടും പ്രവേശനം നേടാത്തവരെ തുടർന്നുള്ള അലോട്ട്‌മെന്റുകളിൽ പരിഗണിക്കില്ല. വിദ്യാർഥികൾക്ക് തങ്ങൾ അപേക്ഷിച്ച ഓരോ സ്‌കൂളിലെയും കാറ്റഗറി തിരിച്ചുള്ള അവസാന റാങ്ക് വിവരങ്ങൾ പരിശോധിക്കാവുന്നതാണ്.

രണ്ടാംഘട്ടത്തിൽ 20,103 പേർക്കാണ്‌ അലോട്ട്‌മെന്റ്‌ കിട്ടിയത്. 20,708 പേർക്ക്‌ ആദ്യ അലോട്ട്‌മെന്റിൽ ലഭിച്ചതിനേക്കാൾ ഉയർന്ന ഓപ്‌ഷൻ ലഭിച്ചു. ഇതോടെ ഒന്നാം അലോട്ട്‌മെന്റിൽ സ്ഥിരപ്രവേശനം നേടിയവരടക്കം ആകെ 2,40,568 പേർക്ക്‌ സീറ്റായി. മൂന്നാം അലോട്ട്‌മെന്റ്‌ ലിസ്റ്റ്‌ 28ന്‌ പ്രസിദ്ധീകരിക്കുന്നതാണ്.