ഗ്രാജ്വേറ്റ് ആപ്റ്റിറ്റ്യൂഡ് ടെസ്റ്റ് ഇൻ എൻജിനീയറിങ് (ഗേറ്റ് 2027) കമ്പ്യൂട്ടർ അധിഷ്ഠിത പരീക്ഷ 2027 ഫെബ്രുവരി 6, 7, 13, 14, 20, 21 തീയതികളിൽ നടത്തും.

രാവിലെ 9.30 മുതൽ 12.30 വരെയും ഉച്ചക്കുശേഷം 2.30 മുതൽ 5.30 വരെയും രണ്ട് സെഷനുകളായാണ് പരീക്ഷ. ഓൺലൈൻ അപേക്ഷ ആരംഭിച്ചു. ഇത്തവണ 30 ടെസ്റ്റ് പേപ്പറുകളാണ് ഉൾപ്പെടുത്തിയിട്ടുള്ളത്.

അപേക്ഷാ ഫീസ്: ഓരോ ടെസ്റ്റ് പേപ്പറിനും 2000 രൂപ. വനിതകൾക്കും പട്ടികജാതി/ വർഗം, ഭിന്നശേഷി വിഭാഗങ്ങൾക്ക് 1000 രൂപ. ഈ ഫീസ് നിരക്കിൽ സെപ്റ്റംബർ 27 വരെ അപേക്ഷിക്കാവുന്നതാണ്. 500 രൂപ അധികം നൽകിയാൽ ഒക്ടോബർ 5 വരെ അപേക്ഷ സ്വീകരിക്കും. പ്രായപരിധി: ഗേറ്റ് അഭിമുഖീകരിക്കുന്നതിന് പ്രായപരിധിയില്ല. ഗേറ്റ് 2027 ഓൺലൈൻ ആപ്ലിക്കേഷൻ പ്രോസസിങ് സിസ്റ്റം (ജി.ഒ.എ.പി.എസ്) വഴി മാത്രമേ അപേക്ഷ സ്വീകരിക്കുകയുള്ളൂ. ഫലപ്രഖ്യാപന തീയതി മുതൽ ‘ഗേറ്റ് 2027’ സ്കോറിന് മൂന്നുവർഷ പ്രാബല്യമുണ്ടായിരിക്കും.

എൻജിനീയറിങ്/ ടെക്നോളജി/ ആർക്കിടെക്ചർ/ സയൻസ്/ കോമേഴ്സ്/ ആർട്സ്/ ഹ്യൂമാനിറ്റീസ് ബിരുദമെടുത്തവർക്കും മൂന്നാംവർഷ ബിരുദ വിദ്യാർഥികൾക്കും മറ്റും അപേക്ഷിക്കാവുന്നതാണ്. എം.ബി.ബി.എസ്/ ബി.ഡി.എസ്/ ബി. ഫാം/ ബി.വി.എസ്‍സി / ബി.എഡ് റിസർച്ച്/ എം.എ/ എം.എസ്‍സി/ എം.സി.എ/ എം.ഇ/ എം.ടെക് (5 വർഷ ഇന്റഗ്രേറ്റഡ്/ ഡ്യൂവൽ ഡിഗ്രി), ഇന്റഗ്രേറ്റഡ് എം.എസ്‍സി/ ബി.എഡ്-എം.എസ്, ബി.എസ്‍സി (അഗ്രികൾച്ചർ/ ഹോർട്ടികൾച്ചർ, ഫോറസ്ട്രി-നാലുവർഷം) കോഴ്സുകളിൽ മൂന്നാം/ നാലോ വർഷ വിദ്യാർഥികളെയും പരിഗണിക്കും. വിശദ യോഗ്യതാ മാനദണ്ഡങ്ങൾ ഗേറ്റ് പോർട്ടലിലുണ്ട്.

പരീക്ഷാകേന്ദ്രങ്ങൾ: കേരളത്തിൽ ആലപ്പുഴ, ആലുവ, എറണാകുളം, ചെങ്ങന്നൂർ, ഇടുക്കി, ആറ്റിങ്ങൽ, അങ്കമാലി, തൃശൂർ, പത്തനംതിട്ട, പാലക്കാട്, വയനാട്, കണ്ണൂർ, കാസർകോട്. ലക്ഷദ്വീപിലും പരീക്ഷാകേന്ദ്രം അനുവദിച്ചിട്ടുണ്ട്.

പരീക്ഷാ ഫലം: മാർച്ച് 19ന് വെബ്സൈറ്റിൽ ​പ്രസിദ്ധീകരിക്കും. സ്കോർ കാർഡുകൾ ഡൗൺലോഡ് ചെയ്യാവുന്നതാണ്. വിശദ വിവരങ്ങൾ: https://gate2027.iitm.ac.in