ഇത്‌ നടന്നാല്‍ കുടിയന്‍മാരേ നിങ്ങള്‍ക്ക്‌ സന്തോഷിക്കാം
പുതിയ അബ്‌കാരി നയം തള്ളാനും കൊള്ളാനുമാകാതെ സര്‍ക്കാരിന്‌ തലവേദനയായിരിക്കുകയാണ്‌. ഒറ്റ ലൈസന്‍സിന്റെ പേരില്‍ പല ബാര്‍ ശാഖകള്‍ തുടങ്ങയവരൊക്കെ വെള്ളിടിയോടെയാണ്‌ പുതിയ അബ്‌കാരി നയത്തെ കാണുന്നത്‌.
ത്രി സ്റ്റാര്‍ , ഫോര്‍ സ്റ്റാര്‍ തുടങ്ങിയ ഓമന പേരുകളില്‍ ഒരു ബാര്‍ ലൈസന്‍സ്‌ നേടിയവര്‍ കെട്ടിടത്തിന്റെ മുമ്പിലും പുറകിലും വശങ്ങളിലുമൊക്കെയായി പല ബാറുകള്‍ തുറക്കുന്നത്‌ നിരോധിക്കണം എന്നതാണ്‌ പുതിയ അബ്‌കാരി നയത്തിന്റെ കാതലായ ഭാഗം. സമൂഹത്തിലെ പല തട്ടിലുള്ള ആള്‍ക്കാരെ ആകര്‍ഷിക്കാനായി സംഘടിപ്പിക്കുന്ന ഇത്തരം സര്‍വീസ്‌ ഡെസ്‌കുകള്‍ പാടില്ലെന്നത്‌ ബാര്‍ മുതലാളിമാര്‍ക്ക്‌ ചിന്തിക്കാനെ കഴിയില്ല. തറ ബാര്‍ , മീഡിയം ബാര്‍ , പ്രീമിയം ബാര്‍ , സൂപ്പര്‍ ബാര്‍ എന്നിങ്ങനെ 4 വിഭാഗമായാണ്‌ ഒരു കെട്ടിടത്തില്‍ പ്രവര്‍ത്തിക്കുന്ന പല ബാറുകളെ തരം തിരിക്കുന്നത്‌.
തറബാര്‍ എന്നത്‌ പേര് പോലെ തന്നെയാണ്‌. സിനിമ തീയറ്ററുകളില്‍ നിന്നും തറ ടിക്കറ്റ്‌ മാഞ്ഞ്‌ പോയിട്ട്‌ കാല്‍ നൂറ്റാണ്ടായെങ്കിലും ഈ ആധുനിക ലോകത്തും തറ ടിക്കറ്റുള്ള സ്ഥലമാണ്‌ ഈ തറ ബാര്‍ . വെറും സാധാരണക്കാരേയും കൂലിപ്പണിക്കാരേയും ഉദ്യേശിച്ചാണ്‌ ഈ തറ ബാറുകള്‍ . വെറും തറയില്‍ നിന്നു കൊണ്ട് (നില്‍പ്പനടി) ആവശ്യമുള്ള പെഗ്ഗടിച്ച്‌ സ്ഥലം കാലിയാക്കണം. മനം മടുക്കുന്ന നാറ്റമാണ്‌ ഇത്തരം ബാറുകളുടെ പ്രത്യേകത. കുടിക്കുന്നവരും ഇടയ്‌ക്കൊക്കെ തറയാകുന്നതും ഈ തറ ബാറിന്റെ പേരിനെ അന്വര്‍ത്ഥമാക്കുന്നു. പേരു തറയാണെങ്കിലും ഒരു ബാറിന്റെ ജീവ നാഡിയാണ്‌ ഈ തറ ബാര്‍ ഇവിടെ നിന്നും കിട്ടുന്ന വരുമാനമായിരിക്കും ഏറ്റവും കൂടുതല്‍ .
അടുത്തത്‌ മീഡിയം ബാറാണ്‌. സാധാരണ സര്‍ക്കാര്‍ ജീവനക്കാര്‍ , മറ്റ്‌ സ്ഥിരവരുമാനമുള്ള സമൂഹത്തിലെ മധ്യവര്‍ഗത്തെ ലക്ഷ്യമിട്ടാണ്‌ മീഡിയം ബാറുകള്‍ നടത്തുന്നത്‌. ട്യൂട്ടോറിയല്‍ കോളേജിന്റെ അന്തരീക്ഷത്തിലുള്ള ഇടുങ്ങിയ ബഹളമുള്ള മുറിയില്‍ ഇരിക്കാന്‍ പറ്റിയാല്‍ ഭാഗ്യം.
സമൂഹത്തിലെ മാന്യന്മാര്‍ എന്ന്‌ സ്വയം അവകാശപ്പെടുന്നവരെ ഉദ്യേശിച്ചാണ്‌ പ്രീമിയം ബാറുകള്‍ പ്രവര്‍ത്തിക്കുന്നത്‌. മങ്ങിയ വെളിച്ചത്തില്‍ മനസമാധാനത്തോടെ രണ്ട് പെഗ്ഗടിക്കാന്‍ പറ്റുന്നിടമാണ്‌ ഇത്തരം പ്രീമിയം ബാറുകള്‍ .
നാലു കാശുള്ളവന്‌ അലുമ്പില്ലാതെ രണ്ടെണ്ണം വിടാന്‍ കഴിയുന്ന സ്റ്റാന്‍ഡേര്‍ഡ്‌ ബാറാണ്‌ സൂപ്പര്‍ ബാറുകള്‍ . കാശിന്റെ വലിപ്പം നോക്കാത്ത മാന്യന്‍മാരായതില്‍ അവര്‍ക്കാവശ്യമുള്ള മദ്യവും ഭക്ഷണവുമെല്ലാം വിളമ്പാനായി രാജകീയ വേഷധാരികളുമുണ്ടാവും.
തുശ്ചമായ ഫീസടച്ച്‌ ഒറ്റ ലൈസന്‍സിലുള്ള പലവിധ മദ്യക്കച്ചവടം പുതിയ അബ്‌കാരി നയം അനുസരിച്ച്‌ നടക്കില്ലെന്ന്‌ ചുരുക്കം.
രണ്ട് പെഗ്ഗില്‍ കൂടുതല്‍ കഴിച്ച്‌ വണ്ടിയോടിച്ച്‌ പിടിക്കപ്പെട്ടാല്‍ ബാര്‍ ഉടമയ്‌ക്കെതിരെ കേസെടുക്കണമെന്നാണ്‌ മറ്റൊരു വ്യവസ്ഥ. ഇത്‌ നടപ്പാക്കിയാലുള്ള പുലിവാല്‌ ആലോചിച്ചു നോക്കൂ.
രണ്ടെണ്ണം വിട്ടിട്ട്‌ കുടിയന്‍മാര്‍ക്ക്‌ എന്തെങ്കിലും ദേഹാസ്വാസ്‌ത്യമുണ്ടായാല്‍ വിശ്രമിക്കാനുള്ള സംവിധാനവും ബാറില്‍ ഉണ്ടായിരിക്കണം. അത്യാവശ്യമെങ്കില്‍ ഡോക്‌ടറുടെ സേവനങ്ങളും ലഭ്യമാക്കണം.
ആരോഗ്യം, റവന്യൂ, എക്‌സൈസ്‌ എന്നീ മേഖലകളെ ഏകോപിച്ചുള്ള നിലവാര പരിശോധന കര്‍ശനമായി നടപ്പിലാക്കണമെന്നും പുതിയ അബ്‌കാരി നയത്തില്‍ പറയുന്നു.
ഇങ്ങനെ കുടിയന്മാരുടെ ഭാഗത്ത്‌ നിന്ന്‌ നിലവാരമില്ലാത്ത ബാറുകള്‍ക്ക്‌ കൂച്ചുവിലങ്ങിടുകയാണ്‌ ഈ നയത്തിന്റെ പ്രധാന ലക്ഷ്യം. നാറ്റം, വൃത്തിയില്ലായ്‌മ, ഗ്ലാസ്‌ കഴുകാതിരിക്കുക എന്നിവയാണ്‌ നിലവാര തകര്‍ച്ചയുടെ മുഖ്യം. പല ബാറുകളിലും അളവില്‍ കുറച്ച്‌ മദ്യം നല്‍കുന്നു എന്ന പരാതിയും വ്യാപകമാണ്‌. ഇതില്‍ നിന്നും കുടിയന്‍മാരെ സംരക്ഷിക്കുക എന്നതും സന്തോഷം പകരുന്ന കാര്യമാണ്‌.
ഇതെല്ലാം ബാറുകാരോട്‌ നേരിട്ട്‌ ചോദ്യം ചെയ്യാന്‍ ധൈര്യമുള്ള കുടിയന്‍മാര്‍ ഇല്ലതന്നെ. കാരണം ബാറില്‍ അടിയുണ്ടാക്കിയിട്ടുള്ളവന്‍ പുറം ലോകം കാണില്ലെന്നാണ്‌ നാട്ടുനടപ്പ്‌. അതിനാല്‍ കിട്ടുന്നത്‌ വേണമെങ്കില്‍ മൂക്കുപൊത്തി കുടിക്കുക, സ്ഥലം വിടുക.
ബാര്‍ മുതലാളിമാരും എക്‌സൈസ്‌ മന്ത്രിയും ഭൂരിപക്ഷം മന്ത്രിമാരും ഒരു സമുദായ നേതാവും എല്ലാം ചേര്‍ന്ന്‌ പാറ പോലെ ഈ പുതിയ അബ്‌കാരി നയം നടപ്പാക്കാതിരിക്കാന്‍ തന്ത്രങ്ങള്‍ മെനയുമ്പോള്‍ നടപ്പാക്കാന്‍ ഒരൊറ്റ സുധീരന്‍ മാത്രം. ഇതെല്ലാം മറികടന്ന്‌ സമഗ്ര അഴിച്ചു പണിയിലൂടെ പുതിയ അബ്‌കാരി നയം കൊണ്ടുവരാന്‍ സര്‍ക്കാരിന്‌ കഴിഞ്ഞാല്‍ കുടിയന്മാരുടെ ഭാഗ്യം മാത്രം.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
