സംസ്ഥാനത്ത് എഞ്ചിനീയറിംഗ് സെമസ്റ്റര്‍ പരീക്ഷകള്‍ വിജയിക്കാത്തവര്‍ക്കായി ഒറ്റത്തവണ കൂടി പരീക്ഷ എഴുതാന്‍ അവസരം നല്‍കും. പരീക്ഷ ഈ മാസം 30 നു ആരംഭിക്കും. ഓണാവധിക്ക് മുമ്പ് പരീക്ഷ പൂര്‍ത്തിയാക്കാനും തീരുമാനമെടുത്തതായി വിദ്യാഭ്യാസ മന്ത്രി സി. രവീന്ദ്രനാഥ് അറിയിച്ചു. പരീക്ഷ പാസാകാത്ത വിദ്യാര്‍ത്ഥികളുടെ രക്ഷിതാക്കളുടെ ആശങ്കകള്‍ അകറ്റാനായി വിദ്യാഭ്യാസ മന്ത്രി പ്രൊഫ. സി.രവീന്ദ്രനാഥ് വീഡിയോ കോണ്‍ഫറന്‍സിംഗിലൂടെ നടത്തിയ ആശയവിനിമയത്തിലാണ് ഇക്കാര്യം പ്രഖ്യാപിച്ചത്.
എഞ്ചിനീയറിംഗിന് താല്‍പര്യമില്ലാത്തവരെ രക്ഷിതാക്കള്‍ നിര്‍ബന്ധിച്ച് കൊണ്ട് ചേര്‍ക്കുന്നതാണ് അടിസ്ഥാനപരമായി തോല്‍വിക്ക് കാരണമെന്ന് മന്ത്രി പറഞ്ഞു. ഇതു വരെ ഒരു പേപ്പര്‍ പോലും ജയിക്കാത്ത 1200 പേരുണ്ട്.
രണ്ട് സെമസ്റ്ററുകളിലെ പന്ത്രണ്ട് പരീക്ഷകളില്‍ ആറെണ്ണം ജയിച്ചാലെ മൂന്നാം സെമസ്റ്ററിലേക്ക് കടക്കാനാവു. നേരത്തെ അത് എട്ടെണ്ണമെന്നായിരുന്നു. ആ നിബന്ധന എടുത്തു കളഞ്ഞ് ആറെണ്ണമാക്കിയിട്ടും യാതൊരു വ്യത്യാസവും വിജയഷതമാനത്തിലുണ്ടായിട്ടില്ല. അയ്യായിരത്തോളം പേരാണ് മൂന്നാം സെമസ്റ്റര്‍ കടക്കാനാവാതെ പരാജയപ്പെട്ടത്.ഇവരില് ഭൂരിഭാഗം പേരും കോഴ്‌സ് നിര്‍ത്തി മറ്റ് കോഴ്‌സുകളില്‍ ചേര്‍ന്നു.
സംസ്ഥാനത്തെ 140 എന്‍ജിനിയറിംഗ് കോളേജുകളിലെ വിദ്യാര്‍ത്ഥികളുടെ രക്ഷിതാക്കള്‍ ആണ് മന്ത്രിയുമായി ആശങ്കകള്‍ പങ്ക് വെച്ചത്.ടെക്‌നിക്കല്‍ യൂണിവേഴ്‌സിറ്റി വൈസ് ചാന്‍സലര്‍ കുഞ്ചറിയ പി. ഐസക്, ഡോ. ആര്‍. വി.ജി. മേനോന്‍ എന്നിവരും പങ്കെടുത്തു.