ഒറ്റത്തവണ രജിസ്‌ട്രേഷന്റെ യൂസര്‍ ഐ.ഡിയും പാസ്സ്‌വേഡും നഷ്ടപ്പെട്ടാല്‍ അത് വീണ്ടെടുക്കുന്നതിനുള്ള വഴികള്‍ പി.എസ്.സിയുടെ വെബ്‌സൈറ്റില്‍ One Time Registration ഹോം പേജില്‍ ചേര്‍ത്തിട്ടുണ്ട്. യൂസര്‍ ഐ.ഡി. മറന്നുപോയവര്‍, ഒറ്റത്തവണ പ്രൊഫൈലില്‍ ചേര്‍ത്തിരിക്കുന്ന മൊബൈല്‍ നമ്പറില്‍ നിന്ന് 166/51969/ 9223 166166 എന്നിവയിലേതെങ്കിലും നമ്പറിലേക്ക് SMS അയക്കണം. KL USR എന്നതാണ് എസ്.എം.എസിന്റെ മാതൃക. പ്രൊഫൈലില്‍ ചേര്‍ത്തിരിക്കുന്ന മൊബൈല്‍ നമ്പറില്‍നിന്ന് മെസേജ് അയച്ചാല്‍ മാത്രമേ മറുപടി മെസേജായി യൂസര്‍ ഐ.ഡി ലഭിക്കുകയുള്ളൂ. ഇങ്ങനെ യൂസര്‍ ഐ.ഡി ലഭിച്ചവര്‍ക്ക് വണ്‍ടൈം രജിസ്‌ട്രേഷന്‍ ഹോം പേജില്‍ പ്രവേശിച്ച് പാസ്സ്‌വേഡ് റീസെറ്റ് ചെയ്യാന്‍ സാധിക്കും.

അതിനായി Forgot Password എന്ന ലിങ്ക് ക്ലിക്ക് ചെയ്യണം. അതില്‍ യൂസര്‍ ഐ.ഡി, ജനനതീയതി, തിരിച്ചറിയല്‍ രേഖയുടെ നമ്പര്‍ എന്നിവ രേഖപ്പെടുത്തിയശേഷം സ്‌ക്രീനില്‍ തെളിയുന്ന ചിത്രകോഡും ചേര്‍ക്കണം. അതിനുശേഷം റീസെറ്റ് ബട്ടണ്‍ ക്ലിക്ക് ചെയ്യണം. പുതിയ പാസ്സ്‌വേഡിന്റെ മാതൃക താഴെ തെളിയും. യൂസര്‍ ഐ.ഡിയുടെ ആദ്യത്തെ ആറക്ഷരം, ജനനത്തീയതിയുടെ എട്ടക്കങ്ങള്‍ എന്നിവ ചേരുന്നതായിരിക്കും പാസ്സ്‌വേഡ് അതുപയോഗിച്ച് ഉദ്യോഗാര്‍ത്ഥിക്ക് പ്രൊഫൈലില്‍ പ്രവേശിച്ച് അപേക്ഷ സമര്‍പ്പിക്കാം. ഒറ്റത്തവണ രജിസ്റ്റര്‍ ചെയ്തപ്പോള്‍ നല്‍കിയ തിരിച്ചറിയല്‍ രേഖയുടെ നമ്പറാണ് ഇങ്ങനെ പാസ്സ്‌വേഡ് റീസെറ്റ് ചെയ്യാനും ഉപയോഗിക്കേണ്ടത്.

അക്കാര്യത്തില്‍ ഉറപ്പില്ലാത്തവര്‍ സര്‍ട്ടിഫിക്കറ്റുകളുമായി പി.എസ്.സി. ഓഫീസില്‍ നേരിട്ടെത്തി പാസ്സ്‌വേഡ് റീസെറ്റ് ചെയ്യേണ്ടിവരും. ജില്ലാ ഓഫീസുകളിലും ഇതിന് സൗകര്യം ഏര്‍പ്പെടുത്തിയിട്ടുണ്ട്. ഒറ്റത്തവണ രജിസ്‌ട്രേഷന് നല്‍കിയ മൊബൈല്‍ നമ്പര്‍ പിന്നീട് മാറ്റിയവരും യൂസര്‍ ഐ.ഡി. ലഭിക്കുന്നതിനും പാസ്സ്‌വേഡ് റീസെറ്റ് ചെയ്യുന്നതിനും ചിലപ്പോള്‍ രേഖകളുമായി പി.എസ്.സി. ഓഫീസില്‍ നേരിട്ട് ഹാജരാകേണ്ടിവരും.

പി.എസ്.സിയുടെ കേന്ദ്ര ഓഫീസിലെയും ജില്ലാ ഓഫീസുകളിലെയും അന്വേഷണ വിഭാഗത്തില്‍ ഫോണില്‍ ബന്ധപ്പെട്ട് പേരും ജനനത്തീയതിയും അറിയിക്കുന്നവര്‍ക്കും യൂസര്‍ ഐ.ഡി. പറഞ്ഞുകൊടുക്കുന്നുണ്ട്. പി.എസ്.സിയുടെ കോള്‍ സെന്ററിലും ഇതിനുള്ള സൗകര്യം ഏര്‍പ്പെടുത്തിയിട്ടുണ്ടെന്ന് അധികൃതര്‍ അറിയിച്ചു. ഇങ്ങനെ വിളിക്കുന്നവരോട് പ്രൊഫൈലില്‍ ചേര്‍ത്തിട്ടുള്ള തിരിച്ചറിയല്‍രേഖയുടെ വിവരങ്ങള്‍ പി.എസ്.സി. ചോദിച്ചു മനസ്സിലാക്കാറുണ്ട്.