വിദ്യാഭ്യാസവായ്പ തിരിച്ചടവിനു സർക്കാർ സാമ്പത്തിക സഹായം നല്കുന്നു. വായ്പ കുടിശ്ശിക വരുത്തിയവർക് സുവർണാവസരമാണ് കൈവന്നിരിക്കുന്നത്. വായ്പ കുടിശ്ശികയാക്കിയവർ, തിരിച്ചടച്ചു തുടങ്ങിയവർ എന്നിങ്ങനെ രണ്ടു വിഭാഗങ്ങളായി തിരിച്ചാണ് സർക്കാർ സഹായം നൽകുന്നത്. ആറു ലക്ഷം രൂപയിൽതാഴെ വാർഷിക വരുമാനമുള്ളവർക്കാണ് ആനുകൂല്യം ലഭിക്കുന്നത്.
പലിശ പൂർണമായും എഴുതിത്തള്ളാൻ ബാങ്കിന് നിർദ്ദേശം കൊടുത്തിട്ടുണ്ട്. കുടിശ്ശികയായ തുകയുടെ 60 ശതമാനം ആണ് സർക്കാർ അടയ്ക്കുന്നത്. വിദ്യാഭ്യാസ വായ്പയെടുത്താൽ പഠന കാലാവധിയും ഒരു വർഷവും കഴിഞ്ഞാണ് തിരിച്ചടവ് തുടങ്ങുന്നത്. അതിൻപ്രകാരം കഴിഞ്ഞ ഏപ്രിലിന് മുമ്പ് തിരിച്ചടവ് തുടങ്ങിയവരാണ് ആനുകൂല്യത്തിനർഹരായ രണ്ടാമത്ത വിഭാഗക്കാർ. ഇവർക്ക് വായ്പാ തിരിച്ചടവിന് നാലുവർഷക്കാലം സർക്കാരിന്റെ സഹായമുണ്ടാകും.
മാനേജ്‌മെന്റ്, എൻ.ആർ.ഐ. ക്വാട്ടകളിൽ പ്രവേശനം നേടിയവർക്ക് ഈ ആനുകൂല്യം ലഭിക്കില്ല. ആദ്യവർഷം 90 ശതമാനം തുകയും സർക്കാർ അടയ്ക്കും. പത്തുശതമാനമേ വായ്പ എടുത്തവർ അടക്കേണ്ടതുള്ളൂ. കഴിഞ്ഞ വർഷം ഏപ്രിൽ മുതൽ മുൻകാല പ്രാബല്യം ഉള്ളതിനാൽ ആ മാസം തൊട്ട് അടച്ച പണം ഇവരുടെ അടുത്തവർഷത്തെ ഗഡുവിലേക്ക് മാറ്റാം. രണ്ടാം വർഷം 75 ശതമാനം സർക്കാരും 25 ശതമാനം കടമെടുത്തവരും അടയ്ക്കണം. മൂന്നാംവർഷം ഇത് 50 ശതമാനം വീതമാണ്. നാലാം വർഷം 25 ശതമാനമാണ് സർക്കാർ അടയ്ക്കുക. ഒമ്പതു ലക്ഷം വരെയുള്ള വായ്പകൾക്കാണ് ഈ ആനുകൂല്യം ലഭിക്കുന്നത്. നഴ്‌സിങ് പഠനത്തിന് ഈ വ്യവസ്ഥ ബാധകമല്ല.
അതതു ജില്ലയിലെ ലീഡ് ബാങ്കാണ് ഇതു സംബന്ധിച്ച കാര്യങ്ങൾ ഏകോപിക്കുന്നത്. വരുമാന സർട്ടിഫിക്കറ്റ് ഗസറ്റഡ് ഓഫീസർമാരാൽ അറ്റസ്റ്റ് ചെയ്ത് അപേക്ഷയോടൊപ്പം നല്കണം. പാൻകാർഡിന്റെയും ആധാർകാർഡിന്റെയും പകർപ്പുകളും കോഴ്‌സ് പൂർത്തിയാക്കിയതിന്റെ വിശദാശംങ്ങളും അപേക്ഷയ്ക്കൊപ്പമുണ്ടാകണം.