ആത്മവിശ്വാസത്തോടെ ഇന്റർവ്യൂ നേരിടാം
ഉയർന്ന തസ്തികകളിലുള്ള ജോലിക്കെല്ലാം ഇപ്പോൾ ഇന്റർവ്യൂ ഉണ്ടാകാറുണ്ട്. ഇന്റർവ്യൂവിൽ മികവ് കാണിക്കുന്നവരെയാണ് ജോലിക്ക് തെരഞ്ഞെടുക്കാറുള്ളത്. എന്നാൽ പലർക്കും ഇന്റർവ്യൂ എന്ന് കേൾക്കുന്നത് തന്നെ പേടിയാണ്. എഴുത്തുപരീക്ഷയിൽ നല്ല നിലവാരം പുലർത്തുന്നവർപോലും ഇൻറർവ്യൂവിൽ ദയനീയമായി പരാജയപ്പെടുന്നത് കാണാറുണ്ട്. ശരിയായ തയ്യാറെടുപ്പുകൾ ഇല്ലാത്തതാണ് ഇതിനു കാരണം.
ഇന്റർവ്യൂവിൽ തിളങ്ങാൻ ചില ടിപ്സ് ഇതാ
ഉദ്യോഗാർഥിയുടെ ജോലിക്കുള്ള യോഗ്യത എഴുത്തുപ്രതീക്ഷയിൽ ബോധ്യപ്പെട്ടു കഴിഞ്ഞതാണ് . അപ്പോൾ ഉദ്യോഗാർഥിയുടെ വ്യക്തിത്വം നിർണയിക്കാൻ കൂടിയാണ് ഇൻറർവ്യൂ എന്ന കാര്യം ഓർക്കണം.
ഇൻറർവ്യൂ ബോർഡിൽ ഒന്നിൽ കൂടുതൽ മെംബർമാരുണ്ടാകാം. ഇതിൽ ഒരാൾ ബോർഡ് ചെയർമാനായിരിക്കും. മെംബർമാർക്ക് ഒാരോരുത്തർക്കും പ്രത്യേകം ചുമതലകളായിരിക്കും. ഉദ്യോഗാർഥിയുടെ സ്വഭാവം അല്ലെങ്കിൽ ബിഹേവിയറൽ ആപ്റ്റിറ്റ്യൂഡ് വിലയിരുത്തകയാവും ഒരംഗത്തിെൻറ ചുമതലയെങ്കിൽ മറ്റൊരംഗം ബുദ്ധിപരമായ കഴിവും അറിവും അളക്കുകയാവും. മറ്റൊരംഗം കുടുംബ പശ്ചാത്തലവും മറ്റ് അഭിരുചികളും മനസ്സിലാക്കത്തക്ക വിധത്തിലായിരിക്കും ഇൻറർവ്യൂ നടത്തുക.
തസ്തികയുടെ നിലവാരം, സ്വഭാവം, യോഗ്യത എന്നിവയെ ആസ്പദമാക്കിയുള്ള സമീപനമാണ് ഇൻറർവ്യൂവിന് കൈക്കൊള്ളേണ്ടത്. അതിനെ അഭിമുഖീകരിക്കത്തക്ക തയാറെടുപ്പ് ഉദ്യോഗാർഥിക്കും വേണം. ഏതു മേഖലയിലേക്കുള്ള ഇന്റർവ്യൂവിനാണോ പോകുന്നത് ആ മേഖലയെ കുറിച്ച് വ്യക്തമായ കാഴ്ചപ്പാട് ഇണ്ടായിരിക്കണം.
ആനുകാലിക സംഭവവികാസങ്ങൾ ഉൾപ്പെടെഎല്ലാ കാര്യങ്ങളെ കുറിച്ചും നല്ല പരിജ്ഞാനം ഇൻറർവ്യൂ നേരിടുന്നവർക്കുണ്ടാകണം. പഠിച്ച വിഷയങ്ങളിലെ അറിവ് പുതുക്കുകയും വേണം. ഇൻറർവ്യൂ ഏതായാലും ബന്ധപ്പെട്ട മേഖലയെപ്പറ്റി നല്ല അറിവ് നേടുകയാണ് പ്രധാനം.
വസ്ത്രധാരണം: ഇൻറർവ്യൂവിനെപ്പറ്റിയുള്ള മിഥ്യാധാരണ പലരെയും അബദ്ധത്തിൽ ചാടിക്കാറുണ്ട്. ഉദാഹരണത്തിന് വസ്ത്രധാരണം തന്നെയെടുക്കാം. ഇൻറർവ്യൂവേഴ്സിനെ ആകർഷിക്കാൻ പുതിയ ഫാഷനുകളിൽ അണിഞ്ഞൊരുങ്ങിയെത്തണമെന്ന് ധരിക്കരുത്. ഇൻറർവ്യൂവിന് മാന്യമായ വസ്ത്രധാരണം മതി. എന്നാൽ, എക്സിക്യൂട്ടീവ്/മാനേജീരിയൽ കേഡറിലുള്ള തസ്തികകളിലേക്കാണ് ഇൻറർവ്യൂവെങ്കിൽ കോട്ടും സ്യൂട്ടും ടൈയും അണിയുന്നതിൽ തെറ്റില്ല. വസ്ത്രധാരണം ഒരിക്കലും അരോചകമാവരുത്.
ഇന്റർവ്യൂ റൂമിലേക്ക് കടക്കുമ്പോൾതന്നെ എല്ലാ ഇൻറർവ്യൂവേഴ്സ് അംഗങ്ങളെയും നോക്കി ‘ഗുഡ്മോണിങ്’ പറയാം. ഇരിക്കാൻ പറയുമ്പോൾ കസേര അൽപം മുന്നോട്ട് നീക്കിയിട്ട് സാവധാനം നന്ദി പ്രകടിപ്പിച്ച് ഇരിക്കാം. ഉയർന്ന യോഗ്യതാക്രമത്തിൽ സർട്ടിഫിക്കറ്റുകളടങ്ങിയ ഫയൽ കൈവശം കരുതണം. ഇരിക്കുമ്പോൾ കൈമേശപ്പുറത്ത് കയറ്റിവെച്ചോ ചാഞ്ഞോ ചരിഞ്ഞോ ഇരിക്കരുത്. നിവർന്ന് ഉന്മേഷവാനായി ഇരിക്കണം. പ്ലീസിങ് മാനറിലാവണം ചോദ്യങ്ങളെ നേരിടേണ്ടത്. ഇൻറർവ്യൂ നടത്തുന്ന എല്ലാ അംഗങ്ങളോടും ഒരേ തരത്തിൽ പെരുമാറാൻ ശ്രദ്ധിക്കണം. ഒരംഗത്തെ കേന്ദ്രീകരിച്ച് മറുപടി പറയുകയോ മറ്റംഗങ്ങളെ ശ്രദ്ധിക്കാതിരിക്കുകയോ ചെയ്യരുത്.
ചോദ്യത്തിനുമാത്രം ഉത്തരം:
ഇൻറർവ്യൂ ബോർഡ് അംഗങ്ങൾക്ക് മാന്യമായ എന്ത് ചോദ്യവും ചോദിക്കാം. അതിനനുസരിച്ചുള്ള മറുപടി നൽകണം. നേതൃത്വ ശേഷി, അപഗ്രഥന പാടവം, കാര്യക്ഷമത മുതലായ ഗുണഗണങ്ങൾ പരിശോധിക്കുന്ന ചോദ്യങ്ങളുണ്ടാകാം. മാത്രമല്ല, ചിലപ്പോൾ നിങ്ങളുടെ ‘ക്ഷമ’ പരിശോധിക്കുന്ന കുസൃതി ചോദ്യങ്ങൾ അവർ തൊടുത്തെന്നിരിക്കും. പരിഭ്രമിക്കേണ്ട കാര്യമില്ല. ഉരുളക്ക് ഉപ്പേരിപോലെ സരസ മറുപടിയാവാം. നിങ്ങളിൽ മതിപ്പ് കൂടുകയേയുള്ളൂ.
ചോദ്യങ്ങളുടെ ഗൗരവം മനസ്സിലാക്കി മാത്രമേ മറുപടി നൽകാവൂ. അത് വസ്തുനിഷ്ഠവും സംക്ഷിപ്തവും ലളിതവുമായിരിക്കണം.ചോദ്യങ്ങൾക്കെല്ലാം മറുപടി പറഞ്ഞേ തീരൂവെന്നില്ല. ഉത്തരം അറിയാത്ത ചോദ്യങ്ങൾക്ക് ‘അറിയില്ല’ എന്ന് സമ്മതിക്കുന്നതിൽ തെറ്റില്ല. പകരം ഉരുണ്ടുകളിക്കുകയോ കാടുകയറി ഉത്തരം പറയുകയോ അരുത്.
തൊഴിലിനോടുള്ള മനോഭാവം,നിങ്ങളുടെ കുടുംബ പശ്ചാത്തലം, ഇഷ്ട വിനോദങ്ങൾ, ഇൻറർവ്യൂവിന് ഹാജരായ തൊഴിലിനോടുള്ള മനോഭാവം, പഠിച്ച വിഷയങ്ങളിലെ അറിവ് എന്നിവ മനസ്സിലാക്കാൻ തക്ക ചോദ്യങ്ങളും ഇൻറർവ്യൂ ബോർഡിൽ നിന്നും പ്രതീക്ഷിക്കാം. ഇതിനെല്ലാം കൃത്യസമയ മറുപടി നൽകാൻ മറക്കരുത്.ഇൻറർവ്യൂവിന് കൃത്യനിഷ്ഠ പാലിക്കണം. വൈകിയെത്തുന്നത് ഒട്ടും ആശാസ്യമല്ല.ഇൻറർവ്യൂ കഴിഞ്ഞിറങ്ങുന്നതുവരെ പ്രസന്നത കൈവിടരുത്. ഇൻറർവ്യൂ അവസാനിക്കുമ്പോൾ എല്ലാ അംഗങ്ങളോടും നന്ദി പ്രകടിപ്പിച്ച് പുറത്തിറങ്ങുക.
https://www.facebook.com/Malayalivartha