എന്‍സിഇആര്‍ടി പുസ്തകങ്ങള്‍ക്ക് പകരം ഇനി സ്വകാര്യ പ്രസാധകരുടെ വിലയേറിയ പുസ്തകങ്ങൾ വാങ്ങേണ്ടിവരില്ല
എന്‍സിഇആര്‍ടി പുസ്തകങ്ങള്‍ പലതും ലഭ്യമല്ലാത്തതിനെ തുടർന്ന് സ്വകാര്യ പ്രസാധകരുടെ വിലയേറിയ പുസ്തകങ്ങൾ വാങ്ങേണ്ടിവരുന്നു എന്ന രക്ഷിതാക്കളുടെ പരാതി അവസാനിക്കുന്നു.
സ്‌കൂളുകളില്‍ നിന്ന് ഓണ്‍ലൈനായി പുസ്തകങ്ങളുടെ ഓര്‍ഡര്‍ സ്വീകരിച്ച ശേഷം ആവശ്യമുള്ളയത്ര പുസ്തകങ്ങള്‍ അച്ചടിച്ച് എത്തിച്ചു നല്‍കാന്‍ ഒരു പോര്‍ട്ടലിന് രൂപം നല്‍കിയിരിക്കുകയാണ് എന്‍സിഇആര്‍ടി.
പുസ്തകങ്ങള്‍ ഓര്‍ഡര്‍ ചെയ്യാനും അച്ചടിച്ച ശേഷം ഡെലിവറി വരെയുള്ള ഓരോ ഘട്ടവും ട്രാക്ക് ചെയ്യാനും പോര്‍ട്ടലിലൂടെ സ്‌കൂളുകള്‍ക്ക് സാധിക്കും. ഈ വര്‍ഷം മുതല്‍ തന്നെ പോര്‍ട്ടലിലൂടെ ഓര്‍ഡറുകള്‍ സ്വീകരിച്ച് തുടങ്ങാനാണ് എന്‍സിഇആര്‍ടി ലക്ഷ്യമിടുന്നത്. പുസ്തകം ലഭ്യമല്ലെന്ന് പറഞ്ഞ് വിലയേറിയ പുസ്തകങ്ങള്‍ വാങ്ങാന്‍ സ്‌കൂളുകള്‍ നിര്‍ബന്ധിക്കുന്നതായി മാതാപിതാക്കള്‍ കേന്ദ്ര മാനവവിഭവശേഷി വികസന മന്ത്രാലയത്തിന് പരാതി നല്‍കിയിരുന്നു.
സ്‌കൂളുകള്‍ക്ക് തങ്ങളുടെ പുസ്തക ആവശ്യം പോര്‍ട്ടലിലൂടെ അപ് ലോഡ് ചെയ്യാന്‍ ഒരു മാസത്തെ സമയം നല്‍കും. ഇത് വഴി ലഭിക്കുന്ന വിവരങ്ങള്‍ വിലയിരുത്തിയ ശേഷമാണ് എത്രയെണ്ണം അച്ചടിക്കണമെന്ന തീരുമാനമെടുക്കുക. പ്രതിവര്‍ഷം ഇംഗ്ലീഷ്, ഹിന്ദി, ഉര്‍ദു ഭാഷകളിലായി 364 ടെക്സ്റ്റ്ബുക്ക് ടൈറ്റിലുകള്‍ എന്‍സിഇആര്‍ടി പുറത്തിറക്കുന്നതായാണ് കണക്കുകള്‍.
https://www.facebook.com/Malayalivartha
