ആധാര്‍ നിയമത്തിലെ 27, 28 വകുപ്പുകള്‍ അനുസരിച്ചു കേന്ദ്രസര്‍ക്കാര്‍ 81 ലക്ഷം ആധാര്‍ കാര്‍ഡുകൾ റദ്ദാക്കിയതായി റിപ്പോര്‍ട്ട്. ഒരാൾക്ക് തന്നെ കൂടുതൽ കാർഡുകളുണ്ടെന്ന് നേരത്തെ പരാതി ഉയർന്നിരുന്നു. ഇത്തരം കാർഡുകളും പിൻവലിച്ചു. നേരത്തെ തന്നെ 11.44 ലക്ഷം പാൻ കാർഡുകളും കേന്ദ്ര സർക്കാർ അസാധുവാക്കിയിരുന്നു. വ്യാജ മേൽവിലാസം നൽകിയും ഇല്ലാത്ത ആളുകളുടെ പേരിലും ഒട്ടേറെ പാൻ കാർഡുകൾ റജിസ്റ്റർ ചെയ്തതായി ആദായനികുതി ആദായനികുതി വകുപ്പിന്റെ പരിശോധനയിൽ വ്യക്തമായിരുന്നു.
ഈ വര്‍ഷം ആദ്യം ആദായ നികുതി ഇടപാടുകള്‍ക്ക് ആധാര്‍ നിര്‍ബന്ധമാക്കിയിരുന്നു. ആധാറും പാന്‍ കാര്‍ഡും ബന്ധിപ്പിക്കുന്നതിന് കേന്ദ്ര സര്‍ക്കാര്‍ അനുവദിച്ചിരിക്കുന്ന സമയ പരിധി ഈ മാസം 31 നാണ് അവസാനിക്കുക. സാമ്പത്തിക ഇടപാടുകളില്‍ വ്യാജ വ്യക്തി വിവരങ്ങള്‍ കടന്നുവരുന്നത് ഒഴിവാക്കാനാണ് വിവിധ സേവനങ്ങള്‍ക്ക് ആധാര്‍ നിര്‍ബന്ധമാക്കിയത്. 111 കോടി ആധാര്‍ കാര്‍ഡുകളാണ് ഇതുവരെ വിതരണം ചെയ്തിട്ടുള്ളത്.
യൂണീക് ഐഡന്‍റിഫിക്കേഷന്‍ അതോറിറ്റി ഓഫ് ഇന്ത്യയുടെ ഔദ്യോഗിക വെബ്‍സൈറ്റിൽ ആധാർ കാർഡുകൾ അസാധുവായൊ എന്ന് പരിശോധിക്കാൻസൗകര്യമുണ്ട്. പരിശോധിക്കാനായി ( www.uidai.gov.in). Verify Aadhaar Number എന്ന ലിങ്ക് ഉപയോഗിക്കുക. ഈ ലിങ്കില്‍ നിന്ന് കിട്ടുന്ന വേരിഫൈ എന്ന ബോക്സിനുള്ളില്‍ നിങ്ങളുടെ 12 അക്ക ആധാര്‍ നമ്പര്‍ നല്‍കുക. എന്നിട്ട് പേജിലെ വെരിഫൈ എന്ന ഭാഗത്ത് 12 അക്ക ആധാര്‍ നമ്പര്‍ നല്‍കി സുരക്ഷാ കോഡ് ടൈപ്പ് ചെയ്ത് വെരിഫൈ ചെയ്യുക. ആധാര്‍ കാർഡ് സാധുവാണെങ്കില്‍ അത് അപ്പോള്‍ തന്നെ വ്യക്തമാക്കും.