രാജ്യത്തിന്റെ വിവിധ ഭാഗങ്ങളിൽ ഇപ്പോഴും പഠിക്കാൻ അവസരം ലഭിക്കാതെ സ്കൂളിൽ പോകാൻ കഴിയാത്ത നിരവധി കുരുന്നുകൾ ഉണ്ട്. അവർക്കായി കേന്ദ്ര സർക്കാർ 'സ്‌കൂള്‍ ചലോ അഭിയാന്‍' എന്ന പേരിൽ ഒരു പദ്ധതി കൊണ്ടുവരുന്നു. ഈ പദ്ധതിയിലൂടെ അടുത്ത വര്‍ഷം 80 ലക്ഷം കുട്ടികളെ സ്‌കൂളിലെത്തിക്കുമെന്ന് കേന്ദ്ര മാനവ വിഭവശേഷി മന്ത്രി പ്രകാശ് ജാവഡേക്കര്‍ അഭിപ്രായപ്പെട്ടു. ചില സംസ്ഥാനങ്ങള്‍ ഇതിനോടകം പദ്ധതി നടപ്പിലാക്കിയിട്ടുണ്ടെങ്കിലും അടുത്ത അധ്യയന വർഷം ഈ പദ്ധതി രാജ്യ വ്യാപകമായി നടപ്പിലാക്കും. രാജ്യത്തിന്റെ വിവിധ ഭാഗങ്ങളിലായി 70-80 ലക്ഷം കുട്ടികള്‍ സ്‌കൂളില്‍ പോകുന്നില്ല.

ലോക സാക്ഷരതാ ദിന പരിപാടികളുടെ ഭാഗമായി സംസാരിക്കുകയായിരുന്നു മന്ത്രി. ഡിജിറ്റല്‍ സാക്ഷരതയിൽ മുന്നേറിക്കൊണ്ടിരിക്കുന്ന ഇന്ത്യ സ്വാതന്ത്ര്യത്തിന് ശേഷം 81 ശതമാനം സാക്ഷരത കൈവരിച്ചതായും മന്ത്രി അഭിപ്രായപ്പെട്ടു.