കേന്ദ്ര ശാസ്ത്രസാങ്കേതികമന്ത്രാലയം 2017 ലെ ഇന്‍സ്‌പെയര്‍ സ്‌കോളര്‍ഷിപ് ഫോര്‍ ഹയര്‍ എജുക്കേഷന് (ഷീ) അപേക്ഷ ക്ഷണിച്ചു. പ്രതിവര്‍ഷം ഷീ സ്‌കീമിന് കീഴില്‍ പതിനായിരത്തോളം സ്‌കോളര്‍ഷിപ്പുകളാണ് നല്‍കുന്നത്. 2017ല്‍ കേന്ദ്ര/സംസ്ഥാന അംഗീകൃത ബോര്‍ഡുകളിലൊന്നില്‍ നിന്ന് പന്ത്രണ്ടാംക്ലാസ് പൂര്‍ത്തിയാക്കിയവര്‍ക്കാണ് അപേക്ഷിക്കാനുള്ള അര്‍ഹത.

കൂടാതെ യു.ജി.സി അംഗീകൃത കോളജ്/യൂനിവേഴ്‌സിറ്റി/സ്ഥാപനത്തില്‍ നാച്വറല്‍/ബേസിക് സയന്‍സ് വിഷയങ്ങളില്‍ മൂന്ന് വര്‍ഷ ബി.എസ്‌സി, ബി.എസ്‌സി ഓണേഴ്‌സ് കോഴ്‌സിലോ നാലുവര്‍ഷ ബി.എസ് കോഴ്‌സിലോ അഞ്ച് വര്‍ഷ ഇന്റഗ്രേറ്റഡ് എം.എസ്‌സി, എം.എസ് പ്രോഗ്രാമിലോ പ്രവേശനം നേടിയിരിക്കുകയും വേണം.

പരിഗണിക്കുന്ന വിഷയങ്ങള്‍: ഫിസിക്‌സ്, കെമിസ്ട്രി, മാത്തമാറ്റിക്‌സ്, ബയോളജി, സ്റ്റാറ്റിസ്റ്റിക്‌സ്, ജിയോളജി, ആസ്‌ട്രോഫിസിക്‌സ്, ആസ്‌ട്രോണമി, ഇലക്‌ട്രോണിക്‌സ്, ബോട്ടണി, സുവോളജി, ബയോകെമിസ്ട്രി, ആന്ത്രപ്പോളജി, മൈക്രോബയോളജി, ജിയോഫിസിക്‌സ്, ജിയോകെമിസ്ട്രി, അറ്റ്‌മോസ്‌ഫെറിക് സയന്‍സ്, ഓഷ്യാനിക് സയന്‍സസ്.

എന്‍ജിനീയറിങ്, മെഡിസിന്‍, ടെക്‌നോളജി, മറ്റ് പ്രഫഷനല്‍, ടെക്‌നിക്കല്‍, അപ്ലൈഡ്‌സയന്‍സ് കോഴ്‌സുകളില്‍ പഠിക്കുന്നവര്‍ക്ക് നിലവില്‍ ഈ സ്‌കോളര്‍ഷിപ്പിന് അര്‍ഹതയില്ല. സ്‌കോളര്‍ഷിപ് തുകയായി പ്രതിവര്‍ഷം 60,000 രൂപയും സമ്മര്‍ ടൈം റിസര്‍ച് പ്രോജക്ടിന് 20,000 രൂപയും ലഭിക്കും.

ബിരുദകോഴ്‌സിന്റെ ആദ്യവര്‍ഷം മുതല്‍ പരമാവധി അഞ്ച് വര്‍ഷം വരെയോ അല്ലെങ്കില്‍ കോഴ്‌സ് കാലാവധി പൂര്‍ത്തിയാകുന്നതുവരെയോ ( ഇതില്‍ ഏതാണോ കുറഞ്ഞ കാലാവധി, അതാണ് പരിഗണിക്കുക) സ്‌കോളര്‍ഷിപ് ലഭിക്കും. ഓരോ വര്‍ഷത്തെയും അക്കാദമിക മികവ് വിലയിരുത്തിയാണ് അടുത്തവര്‍ഷത്തെ സ്‌കോളര്‍ഷിപ് നല്‍കുക.

യോഗ്യതപരീക്ഷയിലെ(പ്ലസ് ടു) മാര്‍ക്കും ഏതെങ്കിലും മത്സരപരീക്ഷകളിലെ മികവും വിലയിരുത്തിയാണ് സ്‌കോളര്‍ഷിപ്പിന് അര്‍ഹത നിശ്ചയിക്കുക. പ്രായം: 17നും 22 നും ഇടയില്‍.

www.online-inspire.gov.in... ലൂടെ ഓണ്‍ലൈനായി അപേക്ഷിക്കാം. ഓണ്‍ലൈന്‍ അപേക്ഷ മാത്രമേ സ്വീകരിക്കൂ. ഡിസംബര്‍ 31 വരെയാണ് അപേക്ഷിക്കാവുന്നത്. വിശദമായ വിജ്ഞാപനം വെബ്‌സൈറ്റിലുണ്ട്.