2015 ല്‍ പ്രസിദ്ധീകരിച്ച പി.എസ്.സി എല്‍.ഡി ക്ലര്‍ക്ക് റാങ്ക് ലിസറ്റിന്റെ കാലാവധി മാര്‍ച്ച് 31ന് അവസാനിക്കുന്നതോടെ നിരവധി പേരുടെ പ്രതീക്ഷ പൊലിയുന്നു. 23,792 പേരെ മുഖ്യപട്ടികയില്‍ ഉള്‍പ്പെടുത്തി പ്രസിദ്ധീകരിച്ച റാങ്ക് പട്ടികയില്‍ നിന്ന് ഏഴായിരത്തില്‍പരം പേര്‍ക്ക് മാത്രമാണ് നിയമനശിപാര്‍ശ നല്‍കിയത്.
ലിസ്റ്റില്‍ അവശേഷിക്കുന്ന ഭൂരിഭാഗവും പ്രായപരിധി കഴിഞ്ഞ് ഇനി അവസരമില്ലാത്തവരാണ്. നിലവിലെ എല്‍.ഡി ക്ലര്‍ക്ക് റാങ്ക് ലിസ്റ്റില്‍ കിട്ടേണ്ട 1500 ഒഴിവുകള്‍ സൂപ്പര്‍ ന്യൂമറിയായി തൊട്ടുമുമ്പുള്ള ലിസ്റ്റിന് കഴിഞ്ഞ സര്‍ക്കാറിന്റെ കാലത്ത് നല്‍കിയിരുന്നു. അതിനാല്‍ നിലവിലെ ലിസ്റ്റ് 2015 ഏപ്രിലില്‍ വന്നെങ്കിലും ആറു മാസം കഴിഞ്ഞാണ് നിയമനമാരംഭിച്ചത്. തുടക്കത്തില്‍ തന്നെ ഇരുട്ടടിയേറ്റ ലിസ്റ്റ് പിന്നീട് നീങ്ങിയത് ഒച്ചിഴയുന്ന വേഗത്തിലും. അവസാനം സര്‍ക്കാറിന്റെ സാമ്പത്തികഞെരുക്കം കൂടി വന്നതോടെ തിരിച്ചടിയായി. ഇതുവരെയുള്ള പട്ടികകള്‍ക്ക് ചുരുങ്ങിയത് നാലുവര്‍ഷം വരെ കാലാവധി ലഭിച്ചിരുന്നു.

എന്നാല്‍, തസ്തിക നിയമനവുമായി ബന്ധപ്പെട്ട പല ഫയലുകളും ധനകാര്യവകുപ്പില്‍ കുടുങ്ങിയിട്ട് കാലമേറെയായി. കഴിഞ്ഞ സര്‍ക്കാര്‍ കാലത്ത് തയാറാക്കിയ ഹയര്‍ സെക്കന്‍ഡറി എല്‍.ഡി ക്ലര്‍ക്ക് തസ്തിക രൂപവത്കരണ ഫയല്‍ അഡീഷനല്‍ സെക്രട്ടറിയുടെ ശ്രദ്ധക്കുറവില്‍ എവിടേയും എത്തിയില്ല. അദ്ദേഹം ശിക്ഷണനടപടി നേരിട്ടെങ്കിലും ഫയലില്‍ തീരുമാനം വന്നില്ല. ഹയര്‍ സെക്കന്‍ഡറി മേഖല ഓഫിസുകളിലെ തസ്തിക രൂപവത്കരണ ഫയലും എച്ച്.എസ്.ഇ ഫയലിനൊപ്പം സമര്‍പ്പിച്ചിരുന്നെങ്കിലും തീരുമാനം വരാത്തത് റാങ്ക് ലിസ്റ്റുകാര്‍ക്ക് തിരിച്ചടിയാണ്. ഭക്ഷ്യസുരക്ഷ വകുപ്പിന്റെ ഗോഡൗണിലേക്ക് ജീവനക്കാരെ നിയമിക്കുന്ന ഫയല്‍ ധനകാര്യവകുപ്പ് തിരിച്ചയക്കുന്നതല്ലാതെ തീരുമാനമില്ല. എല്‍.എസ്.ജി.ഡി എന്‍ജിനീയര്‍മാരുടെ ഓഫിസ് ക്ലര്‍ക്ക് നിയമനവും ധനവകുപ്പ് പരിഗണിക്കുന്നില്ല. സംസ്ഥാനത്ത് ഏഴ് ആര്‍.ടി ഓഫിസുകള്‍ രൂപവത്കരിക്കാനുള്ള ഫയലും ധനവകുപ്പിന്റെ പക്കലുണ്ട്. മിക്ക വകുപ്പിലേയും ഡയറക്ടറേറ്റുകളില്‍ നിന്ന് പി.എസ്.സിക്ക് റിപ്പോര്‍ട്ട് ചെയ്യാതെ, കേസുകളുടെ പേരില്‍ മാറ്റിവയ്ക്കുന്നതും പട്ടികയിലുള്ളവരെ കുഴയ്ക്കുന്നു.