സ്ത്രീകളെ സംബന്ധിച്ചിടത്തോളം, ലൈംഗികോത്തേജനം എന്നത് ലാഘവത്തോടെ കരുതേണ്ട കാര്യമല്ലെന്ന് ഏറെക്കുറെ എല്ലാവര്‍ക്കുമറിയാം. ഇണയോടുള്ള അടുപ്പം സുദൃഢമാക്കുന്നതിന് ലൈംഗികോത്തേജന സമയത്തുള്ള സ്ത്രീയുടെ സങ്കീര്‍ണ്ണമായ മനോവ്യാപാരങ്ങള്‍ക്ക് വലിയ സ്വാധീനം ഉണ്ടെന്ന് ഒരു പുതിയ പഠനം വ്യക്തമാക്കുന്നു.

ലൈംഗികമായി ഉത്തേജിപ്പിക്കപ്പെടുന്ന വേളകളില്‍ തലച്ചോറും ഉദ്ദീപിപ്പിക്കപ്പെടുന്നുണ്ടെങ്കിലും പുരുഷന്മാരേക്കാള്‍ വളരെ കൂടിയ നിലയിലാണ് അത് സ്ത്രീകളില്‍ ഉണ്ടാവുന്നത് എന്നാണ് പുതിയ പഠനം പറയുന്നത്.

കാനഡയിലെ മാക്ഗില്‍ യൂണിവേഴ്‌സിറ്റിയിലെ ഗവേഷകന്മാരാണ് ഈ വിഷയവുമായി ബന്ധപ്പെട്ടുള്ള പരീക്ഷണങ്ങള്‍ നടത്തിയത്. 20 പുരുഷന്മാരേയും 20 സ്ത്രീകളേയും ഉള്‍പ്പെടുത്തിയായിരുന്നു പരീക്ഷണം. ഇവരുടെ തലച്ചോറുകളെ രണ്ടു സ്‌കാനറുകളുമായി യോജിപ്പിച്ചിരിക്കവേ അവര്‍ക്ക് മുമ്പില്‍ ലൈംഗികാതിപ്രസരമുള്ള സിനിമകള്‍ പ്രദര്‍ശിപ്പിച്ചു കൊണ്ടായിരുന്നു പരീക്ഷണം.

ആ സമയത്തുള്ള അവരുടെ തലച്ചോറിലെ ഉദ്ദീപനങ്ങളെ പിടിച്ചെടുക്കുന്ന ഒരു എം ആര്‍ഐ മെഷീന്‍ ആയിരുന്നു ആദ്യത്തേത്. മറ്റൊരെണ്ണം അവരുടെ ജനനേന്ദ്രിയഭാഗവുമായി യോജിപ്പിച്ചിരുന്ന ഒരു കാമറ ആയിരുന്നു. ഇതാകട്ടെ സ്വകാര്യ ഭാഗത്തുണ്ടാകുന്ന താപനിലയുടെ വ്യത്യാസത്തിനനുസരിച്ച് പ്രവര്‍ത്തിക്കുന്നതുമായിരുന്നു.

സ്ത്രീക്കും പുരുഷനും നല്‍കിയ ലൈംഗിക ഉത്തേജനങ്ങള്‍ ഒരു പോലെയുള്ളതായിരുന്നപ്പോഴും അവരുടെ തലച്ചോറിലുണ്ടായ ഉദ്ദീപനങ്ങളുടെ അവസ്ഥയില്‍ വലിയ വ്യത്യാസമുണ്ടായിരുന്നതായി കണ്ടെത്തി. ലൈംഗികമായി ഉത്തേജിപ്പിക്കപ്പെട്ടപ്പോള്‍ സ്ത്രീയുടെ തലച്ചോറിനുണ്ടായ ഉദ്ദീപനം പുരുഷനേക്കാള്‍ വളരെ കൂടുതലാണെന്ന് മനസ്സിലായി.തലച്ചോറും ജനനേന്ദ്രിയവുമായി നേരിട്ട് ബന്ധമുള്ള ഭാഗങ്ങള്‍ സ്ത്രീകളില്‍ ഉണ്ടായിരുന്നത്ര പുരുഷന്റെ തലച്ചോറില്‍ ഉണ്ടായിരുന്നില്ലെന്നാണ് പഠനം കണ്ടെത്തിയത്.

സ്ത്രീകളുടെ ലൈംഗികോത്തേജനവുമായി ബന്ധപ്പെട്ട് കൂടുതല്‍ പഠനങ്ങള്‍ നടത്തേണ്ടതുണ്ടെന്നും ഈ പഠനം കൗതുകകരമായ വിവരങ്ങളാണ് വെളിപ്പെടുത്തിയിട്ടുള്ളതെന്നും ലണ്ടന്‍ കിംഗ്‌സ് കോളേജിലെ സൈക്കോളജി ലക്ചററായ ക്വാസി റഹ്മാന്‍ അഭിപ്രായപ്പെട്ടു. ബ്രെയിന്‍ ഇമേജിംഗും ജനനേന്ദ്രിയ താപനിലയുമായി ബന്ധപ്പെടുത്തി ഒരു പഠനം നടത്തിയത് വളരെ പുതുമയുള്ള കാര്യമാണെന്നും അദ്ദേഹം വിലയിരുത്തി.
ജേണല്‍ ഓഫ് സെക്ഷ്വല്‍ മെഡിസിനില്‍ പ്രസിദ്ധപ്പെടുത്തിയിട്ടുള്ളതാമണ് ഈ വിവരങ്ങള്‍.