ബഹിരാകാശ ഗവേഷണ രംഗത്ത് പുതു ചരിത്രം കുറിച്ച് ഇലോൺ മസ്‌കിന്റെ സ്‌പേസ് എക്‌സ്. കൂറ്റൻ സ്റ്റാർഷിപ്പ് പേടകത്തെ ഭ്രമണപഥത്തിൽ നിന്ന് തിരികെയെത്തിച്ച് വിക്ഷേപണത്തറയിലെ ഭീമൻ യന്ത്രക്കൈകൾ ഉപയോഗിച്ച് വിജയകരമായി പിടിച്ചെടുക്കുകയായിരുന്നു.

റോക്കറ്റിന്റെ മുകൾ ഭാഗമായ പേടകത്തെ ഭ്രമണപഥത്തിൽ നിന്ന് സുരക്ഷിതമായി തിരികെ ഇറക്കി വിക്ഷേപണ ഗോപുരത്തിൽ തന്നെ പിടിച്ചെടുക്കുന്നത് ബഹിരാകാശ ചരിത്രത്തിൽ തന്നെ ഇതാദ്യമായാണ്. സ്റ്റാർഷിപ്പിന്റെ 15ാമത് പരീക്ഷണ വിക്ഷേപണത്തിലാണ് ഈ ചരിത്ര നേട്ടം സ്വന്തമാക്കിയത്.

വെള്ളിയാഴ്ച്ച വൈകുന്നേരം ടെക്‌സസിലെ സ്റ്റാർബേസിൽ നിന്നാണ് പേടകം വിക്ഷേപിച്ചത്. ഏകദേശം 22 മണിക്കൂർ നീണ്ട ദൗത്യത്തിൽ സ്റ്റാർഷിപ്പ് 14 തവണ ഭൂമിയെ വലംവെച്ചു. ഇതിനിടെ 26 നൂതന സ്റ്റാർലിങ്ക് ഉപഗ്രഹങ്ങളെ വിജയകരമായി ഭ്രമണപഥത്തിൽ വിന്യസിച്ചു.
ശനിയാഴ്ച്ച ഉച്ചകഴിഞ്ഞ് ഭൂമിയുടെ അന്തരീക്ഷത്തിലേയ്ക്ക് തിരികെ പ്രവേശിച്ച പേടകം, എൻജിനുകൾ ജ്വലിപ്പിച്ച് വേഗത കുറച്ച ശേഷം സ്റ്റാർബേസിലെ വിക്ഷേപണ ഗോപുരത്തിലെ 'ചോപ്സ്റ്റിക്‌സ്' (chopsticsk) എന്നറിയപ്പെടുന്ന യന്ത്രക്കൈകൾക്കിടയിലേക്ക് കൃത്യമായി വന്നിറങ്ങി.
റോക്കറ്റിന്റെ താഴത്തെ ഭാഗമായ സൂപ്പർ ഹെവി ബൂസ്റ്ററും സമാനമായി രീതിയിൽ പിടിച്ചെടുക്കാനായി സ്‌പേസ് എക്‌സ് ലക്ഷ്യമിട്ടിരുന്നു.

എന്നാൽ സാങ്കേതിക തകരാർ ശ്രദ്ധിയിൽപെട്ടതിനെ തുടർന്ന് ബൂസ്റ്ററിനെ ഗൾഫ് ഓഫ് മെക്‌സിക്കോയിലേക്ക് തിരിച്ചുവിടുകയും അവിടെ തകർന്നു വീഴുകയുമായിരുന്നു. റോക്കറ്റിന്റെ രണ്ട് ഭാഗങ്ങളും പൂർണ്ണമായി വീണ്ടും ഉപയോഗിക്കാൻ സാധിക്കുന്ന സാങ്കേതികവിദ്യയിലേക്കുള്ള നിർണ്ണായക ചുവടുവെപ്പാണിത്. ബഹിരാകാശ യാത്രകളുടെ ചെലവ് ഗണ്യമായി കുറയ്ക്കാനായി കഴിയും. നാസയുടെ ആർട്ടെമിസ് ചാന്ദ്ര ദൗത്യങ്ങൾക്കും ഈ വിജയം വലിയ കരുത്തേകുന്നതാണ്.