2018 വിടവാങ്ങുമ്പോള്‍ ഈ വര്‍ഷം ആരാധകര്‍ കാത്തിരുന്ന വന്‍ സിനിമകളോരോന്നായി റിലീസ് ചെയ്തു തുടങ്ങി കഴിഞ്ഞു. തഗ്‌സ് ഓഫ്്് ഹിന്ദുസ്ഥാന്‍, യന്തിരന്‍ 2.0, ഒടിയന്‍ എന്നിവയ്ക്കു പിന്നാലെ ഇനി ആരാധകര്‍ കാത്തിരിക്കുന്നത് ഷാരുഖ് ഖാന്‍ കുള്ളനായെത്തുന്ന സീറോയ്ക്കു വേണ്ടിയാണ്. യന്തിരനും ഒടിയനും തഗ്‌സും നിരാശപ്പെടുത്തിയതോടെ അതിനൊക്കെയൊപ്പം പ്രചരണങ്ങളുമായെത്തുന്ന സീറോയ്ക്കു നേരേയാണ് ചോദ്യങ്ങളുയരുന്നത്. ഈ ചിത്രം പരാജയപ്പെട്ടാല്‍ എന്തു ചെയ്യുമെന്ന് ഷാരുഖ് ഖാനോട് ആരാധകരും മാധ്യമങ്ങളും തുറന്നു ചോദിച്ചു കഴിഞ്ഞു.

ഹാപ്പി ന്യൂയര്‍, ജബ് ഹാരി മെറ്റ് സേജള്‍ തുടങ്ങിയ വന്‍ ചിത്രങ്ങള്‍ പരാജയപ്പെട്ട സാഹചര്യത്തിലാണ് ഷാരുഖിനു നേരേ ചോദ്യമുയര്‍ന്നത്. ഇതിന് കൃത്യമായ മറുപടി ഷാരുഖിനുണ്ടായിരുന്നു. 'എനിക്കത് മാറ്റാന്‍ കഴിയില്ല. എനിക്ക് മാറ്റാന്‍ കഴിയാത്ത ഒന്നിനേക്കുറിച്ച് ഞാനെന്തിനാണ് ചിന്തിക്കുന്നത്. സീറോ എനിക്ക് വളരെ പ്രധാനപ്പെട്ട ചിത്രമാണെന്ന് പ്രേക്ഷകര്‍ക്ക് തോന്നുന്നുണ്ടെങ്കില്‍ അതവരുടെ തോന്നലാണ്. ഈ ചിത്രം പരാജയപ്പെട്ടാല്‍ എന്തു സംഭവിക്കും?. ചിലപ്പോള്‍ അടുത്ത ആറോ പത്തോ മാസത്തേയ്ക്ക് എനിക്ക് സിനിമ കിട്ടില്ലായിരിക്കും. പക്ഷേ എന്റെ കഴിവിലും കലയിലും വിശ്വാസമുണ്ടെങ്കില്‍ വീണ്ടും ഞാനഭിനയിക്കും' ഷാരുഖ് പറഞ്ഞു.

കഴിഞ്ഞ 15 വര്‍ഷത്തേതുപോലെ തന്നെ ഞാന്‍ ചിലപ്പോള്‍ ഒരു തിരിച്ചുവരവു നടത്തിയേക്കാം. അല്ലെങ്കില്‍ ഒരുപക്ഷെ ഒരിക്കലും തിരിച്ചു വരില്ലായിരിക്കാം. വ്യവസായ ലോകത്തിന് സിനിമയെക്കുറിച്ച് ഒരു വീക്ഷണമുണ്ട്, അവരുടെ കാഴ്ചപ്പാടില്‍ നിന്നും അവര്‍ പറയുന്നത് ശരിയുമാണ് അദ്ദേഹം കൂട്ടിച്ചേര്‍ത്തു.

ഫാനിന് ശേഷമെത്തുന്ന ഷാറൂഖിന്റെ പരീക്ഷണ ചിത്രം കൂടിയാണിത്. ആനന്ദ് എല്‍.റായ് ആണ് ചിത്രത്തിന്റെ സംവിധായകന്‍. അനുഷ്‌ക ശര്‍മ്മ, കത്രീന കെയ്ഫ് തുടങ്ങിയവരും ചിത്രത്തില്‍ പ്രധാന വേഷങ്ങളിലെത്തുന്നുണ്ട്. സല്‍മാന്‍ ഖാന്‍, റാണി മുഖര്‍ജി, കജോള്‍, ദീപിക പദുക്കോണ്‍, ആലിയ ഭട്ട്, കരിഷ്മ കപൂര്‍, ജൂഹി ചൗള എന്നിവരും ചിത്രത്തില്‍ അതിഥി വേഷങ്ങളിലെത്തുന്നുണ്ടെന്ന് റിപ്പോര്‍ട്ടുകള്‍ ഉണ്ടെങ്കിലും അണിയറക്കാര്‍ ഈ കാര്യങ്ങള്‍ ഇതുവരെ സ്ഥിരീകരിച്ചിട്ടില്ല. ഡിസംബര്‍ 21നാണ് ചിത്രം റിലീസിനെത്തുന്നത്.