ബിഗ് ബി-യുടെ ആരാധകര്‍ക്കെല്ലാം അറിയാവുന്ന കാര്യമാണ് അമിതാബ് ബച്ചന്റെ പിറന്നാളാള്‍ ദിനം ഒക്ടോബറിലാണെന്ന്. എന്നാല്‍ ഒരു ഓഗസ്റ്റ് രണ്ടാം തീയതി മുപ്പത്തിയേഴാം പിറന്നാള്‍ ആഘോഷിക്കുന്നതിന്റെ ബ്ലാക്ക് ആന്റ് വൈറ്റ് ചിത്രം അഭിഷേക് ബച്ചന്‍ ഇന്‍സ്റ്റഗ്രാമില്‍ പങ്കുവച്ചതോടെ ആകെ കണ്‍ഫ്യൂഷനായി. ബിഗ് ബി-യുടെ 37-ാം പിറന്നാള്‍ ദിനത്തിന്റെ സമയത്ത് കളര്‍ ഫോട്ടോഗ്രഫി വ്യാപകമായിരുന്നില്ലായിരിക്കാം. എന്നാലും ഓഗസ്റ്റ് രണ്ടാം തീയതി പിറന്നാള്‍ വന്നതെങ്ങനെ എന്നാര്‍ക്കും മനസ്സിലായില്ല.

അതിനു പിന്നിലെ കഥ അഭിഷേക്ക് ബച്ചന്‍ വ്യക്തമാക്കി. യഥാര്‍ഥ ഇതിഹാസങ്ങള്‍ രണ്ടു പ്രാവശ്യം ജനിക്കും എന്ന ഹാഷ് ടാഗോടെയാണ് മുപ്പത്തിയേഴു വര്‍ഷം മുന്‍പ് മുംബൈ ബ്രീച്ച് കാന്‍ഡി ആശുപത്രിയില്‍ വച്ച് എടുത്ത ചിത്രം അഭിഷേക് പോസ്റ്റ് ചെയ്തിരിക്കുന്നത്. കൂലി എന്ന സിനിമയുടെ സെറ്റില്‍ വച്ച് അച്ഛന് ഒരു അപകടം സംഭവിച്ചു. മരണം പോലും സംഭവിച്ചേക്കാമായിരുന്നു. അത്രയ്ക്ക് ഭീകരമായിരുന്നു അവസ്ഥ. അന്നൊരു ഓഗസ്റ്റ് രണ്ടാം തീയതിയാണ് ഡോക്ടര്‍മാര്‍ അദ്ദേഹത്തെ ഞങ്ങള്‍ക്ക് തിരികെ തന്നത്. അത് അച്ഛന്റെ രണ്ടാം ജന്മമായിരുന്നു. അതുകൊണ്ട് ഓഗസ്റ്റ് രണ്ട് ഞങ്ങള്‍ അച്ഛന്റെ രണ്ടാം ജന്മദിനമായി ആഘോഷിക്കുന്നു.

ഹാപ്പി ബര്‍ത്ത് ഡേ പാ. ലൗ യു, എന്ന് അഭിഷേക് ഇന്‍സ്റ്റഗ്രാമില്‍ കുറിച്ചു.

അഭിഷേകിന്റെ പോസ്റ്റിനു താഴെ കമന്റ് ആയും പോസ്റ്റ് ഷെയര്‍ ചെയ്തും നിരവധി ആരാധകരാണ് ബിഗ് ബിക്കും പിറന്നാളാശംകള്‍ നേരുന്നത്.

അയാന്‍ മുഖര്‍ജി സംവിധാനം ചെയ്യുന്ന ബ്രഹ്മാസ്ത്രയാണ് അമിതാബ് ബച്ചന്റെ റിലീസിനൊരുങ്ങുന്ന ചിത്രം. ഇതോടൊപ്പം തന്നെ മറാത്തിയിലും തമിഴിലും ചുവടുവയ്ക്കാനുള്ള ഒരുക്കത്തിലാണ് ബിഗ് ബി.