സുസ്മിതയും കാമുകനും ഉടന് വിവാഹിതരാവുകയാണെന്ന് റിപ്പോര്ട്ട്
43 വയസ് ആയിട്ടും വിശ്വസുന്ദരി സുസ്മിത സെന് വിവാഹം കഴിക്കാതെ നടക്കുന്നതെന്തിന് എന്ന് അന്വേഷിച്ച് നടന്ന ആരാധകര്ക്ക് സന്തോഷ വാര്ത്ത. ഏറെക്കാലത്തെ പ്രണയത്തിനൊടുവില് സുസ്മിതയും കാമുകനും ഉടന് വിവാഹിതരാവുകയാണെന്നാണ് പുതിയ റിപ്പോര്ട്ടുകള്. പ്രചരിക്കുന്ന വാര്ത്തകള് സത്യമാണോ എന്ന് അന്വേഷിച്ച് ആരാധകരും രംഗത്ത് എത്തിക്കൊണ്ടിരിക്കുകയാണ്.
അടുത്തിടെയാണ് സുസ്മിതയുടെ സഹോദരനും വ്യവസായിയുമായ രാജീവ് സെന്നിന്റെ വിവാഹം കഴിഞ്ഞത്. ഈ സമയത്തും ആരാധകര് അന്വേഷിച്ചത് നടിയെ കുറിച്ചായിരുന്നു. മുംബൈയിലെ രജിസ്റ്റര് ഓഫീസില് വച്ച് ജൂലൈ പതിനൊന്നിനാണ് രാജീവും ചാരു അശോപയും വിവാഹിതരായത്. ശേഷം ബംഗാളി ആചാര പ്രകാരം ഗോവയില് വച്ച് നടത്തിയ വിവാഹ ചടങ്ങുകളില് കുടുംബാംഗങ്ങള് മാത്രമേ പങ്കെടുത്തിരുന്നുള്ളു.
രസകരമായ കാര്യം സുസ്മിതയ്ക്കൊപ്പം കാമുകന് റോഹ്മാന് ഷോളും സഹോദരന്റെ വിവാഹത്തില് പങ്കെടുക്കാന് ഉണ്ടായിരുന്നു എന്നതാണ്. വിവാഹത്തിന്റെ ചിത്രങ്ങള് വൈറലായതോടെ സുസ്മിത റോഹ്മാനെ തന്റെ കുടുംബത്തിലെ ഒരു അംഗമായി കാണുന്നുണ്ടെന്ന കാര്യം പുറത്തറിഞ്ഞു. അതിനാല് തന്നെ ഇരുവരുടെയും വിവാഹം ഉടന് ഉണ്ടാവുമോ എന്ന കാത്തിരിപ്പിലായിരുന്നു ആരാധകര്. ഈ ദിവസങ്ങളില് ഇരുവരും വിദേശത്ത് അവധി ആഘോഷിക്കുന്നതിന്റെ ചിത്രങ്ങളും സോഷ്യല് മീഡിയ വഴി പുറത്ത് വന്നു.
ഇപ്പോള് 'വോഗ്' മാസികയാണ് സുസ്മിത സെന് വിവാഹിതയാവാന് പോവുന്ന കാര്യം റിപ്പോര്ട്ട് ചെയ്തിരിക്കുന്നത്. റോഹ്മാന് സുസ്മിതയോട് വിവാഹാഭ്യര്ഥന നടത്തിയെന്നും നടി അതിന് സമ്മതം മൂളിയിരിക്കുകയാണെന്നും റിപ്പോര്ട്ടില് പറയുന്നു. ഈ മാസത്തില് തന്നെ ചടങ്ങ് നടക്കുമെന്നാണ് അറിയാന് കഴിയുന്നത്. അതേ സമയം സുസ്മിതയും റോഹ്മാനും ഇപ്പോള് ഒന്നിച്ചാണ് കഴിയുന്നതെന്നും റിപ്പോര്ട്ടില് സൂചിപ്പിച്ചിട്ടുണ്ട്.
മിസ് യൂണിവേഴ്സ് പട്ടം നേടിയ താരസുന്ദരിയാണ് സുസ്മിത സെന്. 18-ാം വയസിലായിരുന്നു നടിയെ തേടി ഈ ഭാഗ്യമെത്തിയത്. 1994-ല് ഐശ്വര്യ റായിയെ രണ്ടാം സ്ഥാനത്തേക്ക് തള്ളിക്കൊണ്ട് സുസ്മിത ഫെമിന മിസ് ഇന്ത്യ കീരിടം നേടിയിരുന്നു. മിസ് യൂണിവേഴ്സ് ആയതോടു കൂടി സുസ്മിതയുടെ കരിയര് മാറി മറിഞ്ഞു. ഇതോടെ സിനിമയിലേക്ക് നിരവധി അവസരങ്ങള് ലഭിച്ചു. ഹിന്ദി സിനിമകള് കൂടാതെ തമിഴ് സിനിമകളിലും നടി അഭിനയിച്ചിട്ടുണ്ട്.
2015-ല് റിലീസിനെത്തിയ ബംഗാളി ചിത്രത്തിലാണ് സുസ്മിത അവസാനമായി അഭിനയിച്ചത്. പൂര്ണമായും സിനിമയില് നിന്നു മാറി നില്ക്കുകയാണ് നടിയിപ്പോള്. ഇത്രയും കാലം വിവാഹം കഴിക്കാതെ സിംഗിള് മദറായി ജീവിക്കുകയായിരുന്നു സുസ്മിത. ഇവര് രണ്ട് പെണ്കുട്ടികളെ ദത്തെടുത്തിരുന്നു. 2001-ല് റിനി എന്ന പെണ്കുട്ടിയെയും 2010-ല് ആലിഷ എന്ന കുട്ടിയെയുമാണ് സുസ്മിത ദത്തെടുത്തത്. പിന്നീട് സിംഗിള് മദര് ആയി ജീവിക്കാനായിരുന്നു നടിയുടെ തീരുമാനം. ഇപ്പോള് കാമുകനൊപ്പം വിദേശത്ത് അവധി ആഘോഷിക്കുമ്പോള് നടിക്കൊപ്പം രണ്ട് മക്കളുമുണ്ടെന്നുള്ളതാണ് ശ്രദ്ധേയം.
https://www.facebook.com/Malayalivartha