ഫാഷൻ ഡിസൈനർ മനീഷ് മൽഹോത്രയുടെ അച്ഛന്റെ നിര്യാണത്തെത്തുടർന്ന് മുംബൈയിലെ അവരുടെ വസതിയിൽ മകൾ ശ്വേത ബച്ചൻ നന്ദയ്ക്കൊപ്പം എത്തിയ ജയ ബച്ചനെ കാത്തുനിന്ന ഫോട്ടോ​ഗ്രാഫർമാരെ ശകാരിച്ച് അമിതാഭ് ബച്ചന്റെ പ്രിയ പത്നി. മൃതദേഹം കണ്ടതിനുശേഷം വീട്ടിൽനിന്ന് ഇറങ്ങിവരുമ്പോഴാണ് പുറത്ത് കൂടിനിന്ന ഫോട്ടോ​ഗ്രാഫർമാരെ കണ്ടത്. തന്റെ ഫോട്ടോ പകർത്താൻ തിരക്ക് പിടിച്ച ഫോട്ടോ​ഗ്രാഫർമാരെ കണ്ട് അതൃപ്തയായ ജയ ബച്ചൻ അവരോട് പൊട്ടിത്തെറിക്കുകയായിരുന്നു.

‘‘നിങ്ങൾക്ക് മാന്യതയുണ്ടോ? എന്നാണ് ജയാബച്ചൻ ചോദിച്ചത് . സാഹചര്യം എന്താണെന്നു ചിന്തിക്കുന്നുണ്ടോ? ഇതുപോലൊരു സാഹചര്യം നിങ്ങളുടെ വീട്ടിലാണ് ഉണ്ടാകുന്നതെങ്കിൽ നിങ്ങളെങ്ങനെയാണ് പ്രതികരിക്കുക എന്നതെനിക്ക് കാണണം’’– ജയ ബച്ചൻ ഫോട്ടോഗ്രാഫർമാരോട് ആഞ്ഞടിച്ചു . തുടർന്ന് ശ്വേതയെയും കൂട്ടി ജയ കാറിൽ കയറി പോകുകയായിരുന്നു. ഇതിന് മുമ്പും ഫോട്ടോ​ഗ്രാഫർമാരെ ജയ ബച്ചൻ ശകാരിച്ചിട്ടുണ്ട്. ഒരു പരിപാടിയിൽ പങ്കെടുക്കുന്നതിനിടെ വേദിയിലിരിക്കുന്ന തന്റെ ഫോട്ടോ പകർത്താൻ ശ്രമിച്ച ഫോട്ടോ​ഗ്രാഫർമാരെയാണ് ജയ ബച്ചൻ ശകാരിച്ചത്.