ദീപിക പദുക്കോൺ നായികയായെത്തുന്ന പുതിയ ബോളിവുഡ് ചിത്രമാണ് ഛപാക്. ആസിഡ് ആക്രമണത്തിന്റെ കഥ പറയുന്ന ചിത്രത്തിൽ എന്തുകൊണ്ട് ദീപികയെ തിരഞ്ഞെടുത്തു എന്ന് ചിത്രത്തിന്റെ സംവിധായക മേഘ്ന ഗുല്‍സാര്‍ വെളിപ്പെടുത്തുന്നു. യഥാർത്ഥ സംഭവത്തിന്റെ ദൃശ്യാവിഷ്കാരമാണ് ചിത്രം. ആസിഡ് ആക്രമണത്തെ അതിജീവിച്ച ലക്ഷ്മി അഗർവാളിന്റെ ജീവിതമാണ് ചിത്രം പങ്കുവെക്കുന്നത്. ചിത്രത്തിൽ മലാതി എന്ന കഥാപാത്രത്തെയാണ് ദീപിക അവതരിപ്പിക്കുന്നത്. സിനിമയുടെ ചിത്രങ്ങളും ട്രെയ്‌ലറും സമൂഹ മാധ്യമങ്ങളിൽ വൈറലായിരുന്നു. ആസിഡ് അക്രമണത്തിൽ പൊള്ളലേറ്റ ദീപികയുടെ മുഖം വളരെ ചർച്ചയായിരുന്നു. മറ്റു നടിമാരെ ഒഴിവാക്കി എന്തുകൊണ്ട് ദീപികയെ കേന്ദ്ര കഥാപാത്രമായി തിരഞ്ഞെടുത്തു എന്ന്സംവിധായിക വ്യക്തമാക്കുന്നു.

ദീപിക പദുക്കോണിനെ പോലെയുള്ള പ്രശസ്‍തയായ നടി സിനിമയിൽ കേന്ദ്ര കഥാപാത്രമാകുമ്പോൾ പ്രേക്ഷകർക്ക് സിനിമയോടുള്ള താത്പര്യം വർധിക്കും. ഇത് സിനിമയുടെ പ്രചാരത്തിനു സഹായിക്കും. സ്വാഭാവികമായും അവരുടെ ആരാധകർ സിനിമ കാണും. ഞാൻ അവരുടെ താരപദവിയെ ഉപയോഗിക്കുകയാണുണ്ടായത്. പ്രമോഷന്റെയും മാര്‍ക്കറ്റിന്റെയുമൊക്കെ ഭാഗമാണ് അത്. സിനിമ കൈകാര്യം ചെയ്യുന്ന പ്രശ്‍നത്തെക്കുറിച്ച് അവബോധം വ്യാപിപ്പിക്കുന്നതിന് സിനിമയിൽ ഒരു പ്രശസ്ത താരം ഉള്ളത് വളരെ നല്ലതാണ്- മേഘ്ന ഗുൽസാർ പറയുന്നു. വിക്രാന്ത് മാസ്സി രോഹിത് സുഖ്‌വാനി എന്നിവരാണ് ചിത്രത്തിൽ മറ്റ് കഥാപാത്രങ്ങളെ അവതരിപ്പിക്കുന്നത്. അതിക ചൊഹാനും മേഘ്‍ന ഗുല്‍സാറുമാണ് ചിത്രത്തിന്റെ തിരക്കഥ തയ്യാറാക്കിയത്. ചിത്രം ദീപികയുടെ ആദ്യ നിർമ്മാണ സംരംഭവുമാണ്. 2020 ജനുവരി 10 ന് ചിത്രം ഇന്ത്യയിൽ റിലീസ് ചെയ്യും.