ബോളീവുഡ് ടിവി താരം കുശാല് പഞ്ചാബിയെ മുംബൈയിലെ വസതിയില് ആത്മഹത്യ ചെയ്ത നിലയില് കണ്ടെത്തി
മൂംബൈയിലെ പാലി ഹില്ലിലുള്ള വസതിയില് പ്രമുഖ ബോളീവുഡ് ടിവി താരം കുശാല് പഞ്ചാബിയെ ആത്മഹത്യ ചെയ്ത നിലയില് കണ്ടെത്തി.
വീട്ടില് നിന്നും ആത്മഹത്യ കുറിപ്പും പോലീസിന് കിട്ടിയിട്ടുണ്ട്. അദ്ദേഹത്തിന്റെ സുഹൃത്ത് കരണ് ബോറയാണ് 37-കാരനായ കുശാല് പഞ്ചാബിയുടെ മരണവിവരം പുറത്ത് വിട്ടത്.
കുശാലിന്റെ ആത്മഹത്യാറിപ്പോര്ട്ട് ഫയല് ചെയ്തിട്ടുണ്ടെന്നും കൂടുതല് അന്വേഷണം നടന്ന് വരികയാണെന്നും പോലീസ് വ്യക്തമാക്കി. ആത്മഹത്യ കുറിപ്പിന് ഒന്നര പേജ് ദൈര്ഘ്യമുണ്ടെന്ന് പോലീസ് അറിയിച്ചു.
തന്റെ സ്വത്തുക്കള് തുല്യമായി വീതിക്കണമെന്നും, അതില് 50 ശതമാനം മാതാപിതാക്കള്ക്കും സഹോദരിക്കും ഉള്ളതാണെന്നും ബാക്കി ഉള്ളത് തന്റെ മൂന്ന് വയസുകാരന് മകന് കിയാന് നല്കണമെന്നുമാണ് ആത്മഹത്യ കുറിപ്പില് ഉള്ളത്. അതേസമയം തന്റെ മരണത്തില് ആര്ക്കും ഉത്തരവാദിത്തം ഇല്ലെന്നും കുറിപ്പില് പറയുന്നുണ്ട്.
ഇന്ന് നാല് മണിക്ക് മുംബൈയില് വെച്ച് കുശാലിന്റെ അന്ത്യ കര്മ്മങ്ങള് നടക്കും.1990-കളില് ഡിജെ അഖീലിന്റെ റീമിക്സ് കെ ദൂന് തുമെയിലൂടെയാണ് പ്രശസ്തനാവുന്നത്. നിരവധി ടിവി ഷോകളിലും അദ്ദേഹം അഭിനയിച്ചിരുന്നു. ലവ് മാരേജ്, സിഐഡി തുടങ്ങിയ പ്രശ്സത ടിവി സീരിയലുകള് കുശാലിനെയും പ്രശസ്തനാക്കിയിരുന്നു. ലക്ഷ്യ, കാല്, ധന് ധനാ ധന് ഗോള് എന്നീ ബോളീവുഡ് ചിത്രങ്ങളില് കുശാല് അഭിനയിച്ചിട്ടുണ്ട്.
2015-ല് തന്റെ ഗേള്ഫ്രണ്ടായിരുന്ന ഓഡ്രി ഡോല്ഹന് എന്ന വിദേശ വനിതയെ ഗോവയില് വച്ച് വിവാഹം ചെയ്തിരുന്നെങ്കിലും ആ വിവാഹം വിവാഹമോചനത്തില് എത്തിനില്ക്കയാണ്. ആ ബന്ധത്തിലുള്ള മകനുമായി ഭാര്യ ഷാങ്ഹായിലാണ് ഇപ്പോള് താമസം. വിവാഹബന്ധം തകര്ന്നതും കുഞ്ഞില് നിന്നും അകലേണ്ടി വന്നതും അയാള്ക്ക് ജീവിക്കാനുള്ള ആഗ്രഹം നഷ്ടമാക്കി എന്നാണ് സുഹൃത്തുക്കള് പറയുന്നത്.
കുശാലിന്റെ മരണം തന്നെ ഞെട്ടിച്ചുവെന്ന് പറഞ്ഞ സുഹൃത്ത് കരണ്വീര് ബോറ, തന്റെ ഇന്സ്റ്റാഗ്രാമില് ഇങ്ങനെകുറിച്ചു:
'നിങ്ങള് ഏറ്റവും സന്തേഷവാനായിരുന്നു. നിങ്ങളുടെ ജീവിതം മറ്റാരേക്കാളും എന്നെ പ്രചോദിപ്പിച്ചിരുന്നു. നൃത്തം, ഫിറ്റ്നസ്, റോഡ്, ബൈക്കിംഗ്, പിതൃത്വം തുടങ്ങിയവ അതില് ഉള്പ്പെടുന്നു. നിങ്ങളുടെ മുഖത്തെ പുഞ്ചിരി, എല്ലാം എനിക്കിനി നഷ്ടമായി'!
https://www.facebook.com/Malayalivartha