പ്രണയം പരസ്യമാക്കി അര്ജുന് മലൈകയുടെ സ്പെഷല് സമ്മാനം!
ബോണി കപൂറിന്റെ മകനും അഭിനേതാവുമായ അര്ജുന് കപൂറിന്റെ, മലൈക അറോറയുമായുള്ള പ്രണയത്തിന് ശക്തമായ പിന്തുണയാണ് ആരാധകര് നല്കുന്നത്. ഇരുവരും പ്രണയത്തിലാണെന്നറിഞ്ഞപ്പോള് മുതല് എന്നാണ് വിവാഹമെന്നുള്ള ചോദ്യങ്ങളും ഉയര്ന്നുവന്നിരുന്നു.
എന്നാല് പ്രണയത്തെക്കുറിച്ചും വിവാഹത്തെക്കുറിച്ചുമുള്ള ചോദ്യങ്ങള്ക്ക് കൃത്യമായ മറുപടി നല്കാതെ ഒഴിഞ്ഞുമാറുന്ന പതിവായിരുന്നു അര്ജുന് കപൂര് അവലംബിച്ചിരുന്നത്. മലൈകയാവട്ടെ വിവാഹത്തെക്കുറിച്ചും പ്രണയത്തെക്കുറിച്ചും പാപ്പരാസികളുടെ വിമര്ശനങ്ങളെക്കുറിച്ചുമൊക്കെ തുറന്നു സംസാരിക്കാറുണ്ട്.
ഗോവയിലായിരുന്നു ഇരുവരും ഇത്തവണ പുതുവര്ഷം ആഘോഷിക്കാനെത്തിയത്. ഇവരുടെ പ്രണയനിമിഷങ്ങള് സോഷ്യല് മീഡിയയിലൂടെ വൈറലായിക്കൊണ്ടിരിക്കുകയാണ്. അടുത്ത സുഹൃത്തുക്കള്ക്കൊപ്പമാണ് അര്ജുന് കപൂറും മലൈക അറോറയും പുതുവര്ഷം ആഘോഷിച്ചത്.
അര്ജുന്റെ കവിളില് ചുംബിക്കുന്ന മലൈകയുടെ ചിത്രം ഇതിനകം തന്നെ വൈറലായി മാറിക്കഴിഞ്ഞിട്ടുണ്ട്. ചിത്രങ്ങള് പങ്കുവച്ചത് മലൈകയായിരുന്നു. അതീവ രഹസ്യമായി കൊണ്ടു നടന്നിരുന്ന പ്രണയം അടുത്തിടെയായിരുന്നു പരസ്യമായി മാറിയത്. ഇവരുടെ പ്രായവ്യത്യാസത്തെക്കുറിച്ച് കടുത്ത വിമര്ശനങ്ങളായിരുന്നു ഉയര്ന്നുവന്നത്. പ്രായം തങ്ങള്ക്കൊരു തടസമല്ലെന്നാണ് ഇരുവരും പറയുന്നത്.
സഹോദരിയായ അന്ഷുലയുടെ വിവാഹത്തിന് ശേഷമേ തന്റെ വിവാഹമുണ്ടാവൂയെന്ന് വളരെ മുന്പ് അദ്ദേഹം പറഞ്ഞിരുന്നു. എന്തായാലും പുതിയ ചിത്രം പുറത്തു വന്നതോടെ ഇവരുടെ വിവാഹം വൈകാതെ ഉണ്ടാകുമെന്നാണ് ബോളിവുഡില് പ്രചരിക്കുന്നത്. എന്നാല് ഈ ബന്ധം അംഗീകരിക്കാനാവില്ലെന്ന നിലപാടിലാണ് അര്ജുന്റെ കുടുംബം.
അര്ബാസ് ഖാനില് നിന്നും 2016-ലായിരുന്നു മലൈക അറോറ വേര്പിരിഞ്ഞത്. വിവാഹമോചനത്തിന് ശേഷവും ഇരുവരും അടുത്ത സുഹൃത്തുക്കളായി തുടരുകയാണ്.
https://www.facebook.com/Malayalivartha