ജനുവരി 5-ന് ബോളിവുഡ് താരസുന്ദരി ദീപിക പദുകോണിന്റെ 34-ാം ജന്മദിനമായിരുന്നു. അന്ന് രാവിലെ ലക്‌നൗവിലേക്കു പോകാനായി മുംബൈ വിമാനത്താവളത്തിലെത്തിയ ദീപികയ്ക്ക് ഒരു സര്‍പ്രൈസ് ലഭിച്ചു. 'ഛപാക്' എന്ന പുതിയ സിനിമയുടെ പ്രചാരണത്തിനായി പോകുന്ന താരത്തിന്റെ ജന്മദിനം ആഘോഷിക്കാനായി കേക്കുമായി എത്തിയ ആരാധകനാണ് എല്ലാവര്‍ക്കും വിസ്മയമായത്.

അതിരാവിലെ ദീപിക വിമാനത്താവളത്തില്‍ എത്തിയത് ഭര്‍ത്താവ് രണ്‍വീര്‍ സിങ്ങിനൊപ്പമാണ്. പ്രസ് ഫൊട്ടോഗ്രാഫര്‍മാര്‍ ഇവിടേക്ക് എത്തിയിരുന്നു. ഇക്കൂട്ടത്തിലെ ഒരു ആരാധകനാണ് കേക്കുമായി കാത്തിരുന്നത്. കാറില്‍ നിന്ന് ഇറങ്ങി വരുന്ന ദീപികയുടെ മുന്‍പിലേക്ക് കേക്കുമായി ഇയാള്‍ എത്തി. ചോക്ലറ്റ് കൊണ്ടുള്ള കേക്കില്‍ ദീപിക പദുകോണ്‍ എന്നും ഛപാക് എന്നും എഴുതിയിരുന്നു. ഇതിനു നടുവില്‍ ഒരു ലൗ ചിഹ്നവും വരച്ചു ചേര്‍ത്തിരുന്നു.

കേക്ക് മുറിച്ചശേഷം ദീപിക ഇത് രണ്‍വീറിന്റെ നേരെ നീട്ടിയെങ്കിലും ആരാധകനു നല്‍കാന്‍ രണ്‍വീര്‍ നിര്‍ദേശിച്ചു. പിന്നീട് രണ്‍വീറിനും നല്‍കി. ഇതിനുശേഷം ആരാധകന്‍ ദീപികയ്ക്കു കേക്ക് നല്‍കുകുയും ചെയ്തു.

രാത്രി മുതല്‍ കാത്തു നില്‍ക്കുകയാണ് ഇയാളെന്നും ദീപികയുടെ വലിയ ആരാധകനാണ് എന്നും ആരോ പറയുന്നത് കേള്‍ക്കാം. വിശ്വസിക്കാനാവുന്നില്ല എന്ന തരത്തിലുള്ള ഭാവം പലപ്പോഴും ആരാധകന്റെ മുഖത്ത് തെളിയുന്നുണ്ട്. ഇതിനെ ഹൃദ്യം എന്നാണ് സോഷ്യല്‍ ലോകം വിശേഷിപ്പിച്ചത്.