തീര്ത്തും മോശം സമയമായിരുന്നു കഭി ഖുഷി കഭി ഗം-ന്റെ ഷൂട്ടിംഗ് കാലം, ഗര്ഭം അലസി, സിനിമ പുറത്തിറങ്ങുമ്പോള് ഞാന് ആശുപത്രിയില് ആയിരുന്നു... കാജോള് തുറന്നു പറയുന്നു
ഹ്യൂമന്സ് ഓഫ് മുംബൈയുടെ ഇന്സ്റ്റാഗ്രാം പേജിനു നല്കിയ അഭിമുഖത്തില് വ്യക്തിഗത ജീവിതത്തിലെ സന്തോഷങ്ങളും ദു:ഖങ്ങളും ബോളിവുഡ് താരം കാജോള് പങ്കുവച്ചു.
അജയ് ദേവ്ഗണിനെ താന് ആദ്യമായി കാണുന്നത് ഹല്ച്ചല് എന്ന സിനിമയുടെ സെറ്റില് വച്ചാണെന്ന് കാജോള് പറഞ്ഞു. 25 വര്ഷങ്ങള്ക്കു മുമ്പ് ആ സെറ്റില് വച്ചായിരുന്നു ഞങ്ങള് ആദ്യം കണ്ടത്. സെറ്റിലെത്തി ഞാന് ഷൂട്ടിനു തയാറായി, എന്റെ ഹീറോയെവിടെയെന്നു ചോദിച്ചപ്പോള് ഒരു വശത്ത് ഒഴിഞ്ഞിരിക്കുന്ന അജയിലേക്കു ആരോ വിരല്ചൂണ്ടി. അങ്ങനെ ചിത്രീകരണം തുടങ്ങുന്നതിന് പത്തു മിനുട്ട് മുമ്പ് ഞങ്ങള് പരിചയപ്പെട്ടു. ആ സിനിമയുടെ ചിത്രീകരണം കഴിയുന്നതിനു മുമ്പു തന്നെ ഞങ്ങള് നല്ല സുഹൃത്തുക്കളുമായി.
താന് ആ സമയം മറ്റൊരാളുമായി ഇഷ്ടത്തിലായിരുന്നുവെന്നും കാമുകനെക്കുറിച്ചുള്ള പരാതി പോലും അജയോടു പറഞ്ഞിട്ടുണ്ടെന്നും താരം കൂട്ടിച്ചേര്ത്തു. അജയ്യും ആ സമയം മറ്റൊരു പ്രണയത്തിലായിരുന്നു. അധികം വൈകാതെ തന്നെ ഇരുവരുടെയും പ്രണയം തകര്ന്നു. തങ്ങളിരുവരും പരസ്പരം ഇഷ്ടം അറിയിച്ചിരുന്നില്ലെന്നും ഒരുമിക്കേണ്ടവരാണെന്ന ചിന്ത അറിയാതെ തന്നെ ഇരുവരുടെയും മനസില് ഉടലെടുത്തിരുന്നുവെന്നും കാജോള് തുടര്ന്നു.
'കാലങ്ങളായി ഞങ്ങള് കുട്ടികള് വേണമെന്നതിനെക്കുറിച്ചു ചിന്തിച്ചു തുടങ്ങിയിരുന്നു. 2001-ല് കഭി ഖുഷി കഭി ഗം എന്ന ചിത്രത്തിന്റെ ചിത്രീകരണ സമയത്ത് ഞാന് ഗര്ഭിണിയായിരുന്നു. ദൗര്ഭാഗ്യവശാല് ഗര്ഭം അലസി. സിനിമ പുറത്തിറങ്ങുമ്പോള് ഞാന് ആശുപത്രിയിലായിരുന്നു. സിനിമ വിജയമായെങ്കിലും വ്യക്തിപരമായി അതൊട്ടും നല്ല സമയമായിരുന്നില്ല.
പിന്നീട് ഒരിക്കല് കൂടി ഗര്ഭഛിദ്രം ഉണ്ടായി. അത് തികച്ചും പരീക്ഷണത്തിന്റെ സമയമായിരുന്നു. എന്നാല് കാലക്രമേണ എല്ലാം ശരിയായി. ഞങ്ങളുടെ കുടുംബത്തിന് പൂര്ണതയേകാന് നൈസയും യുഗുമെത്തി. - കാജോള് പറഞ്ഞു. ഏറെക്കാലത്തിനു ശേഷം താരദമ്പതികള് ഒരുമിച്ചു അഭിനയിച്ച തന്ഹാജി - ദ അണ്സങ് ഹീറോ എന്ന ചിത്രം' പുറത്തിറങ്ങുന്നതിനു മുന്നോടിയായിട്ടായിരുന്നു അഭിമുഖം.
https://www.facebook.com/Malayalivartha