ബോളിവുഡിലും തെന്നിന്ത്യയിലും ഒരുപോലെ ആരാധകരുളള യുവ താരമാണ് നടി സാറ അലിഖാൻ. ബോളിവുഡിലെ യുവതാരങ്ങളിൽ ആരാധകരേറെയുള്ള താരം കൂടിയാണ് സാറ. ഇപ്പോൾ തെന്നിന്ത്യൻ സിനിമ കോളങ്ങളിൽ ചൂടേറിയ ചർച്ചയാകുന്നത് താരപുത്രിയുടെ ഇൻസ്റ്റാഗ്രാം പോസ്റ്റാണ്. തന്റെ പുതിയ ചിത്രത്തെ കുറിച്ചാണ് നടിയുടെ വെളിപ്പെടുത്തലെങ്കിലും പോസ്റ്റ് തെന്നിന്ത്യൻ പ്രേക്ഷകരെയാണ് ആവേശത്തിലാഴ്ത്തിയത് . ഒരു ചെറിയ ഇടവേളയ്ക്ക് ശേഷം തമിഴ് സൂപ്പർ താരം ധനുഷ് വീണ്ടും ബോളിവുഡിൽ മടങ്ങിയെത്തുന്നു.

ആനന്ദ് എൽ റായ് സംവിധാനം ചെയ്യുന്ന ചിത്രമായ അത്രഗി രേ എന്ന ചിത്രത്തിലാണ് സാറയുടെ നായകനായി ധനുഷ് എത്തുന്നത്. ചിത്രത്തിൽ അക്ഷയ് കുമാറും ഒരു പ്രധാന വേഷം അവതരിപ്പിക്കുന്നു . താര സമ്പന്നമായ ചിത്രത്തിന്റെ അണിയറയിലും പ്രമുഖരാണ് പ്രവർത്തിക്കുന്നത് . ആനന്ദ് എൽ റായ് സംവിധാനം ചെയ്യുന്ന ചിത്രത്തിൽ ദേശീയ പുരസ്കാര ജേതാവ് ഹിമാൻഷു ശർമയാണ് ചിത്രത്തിന്റെ തിരക്കഥ ഒരുക്കുന്നത്. എആർ റഹ്മാൻ സംഗീത സംവിധാനം .

ധനുഷ്-ആനന്ദ് എൽ റായ് കൂട്ടുകെട്ടിൽ ഒരുങ്ങുന്ന രണ്ടാമത്തെചിത്രമാണ് അത്രഗി രേ . 2013 ൽ പുറത്തു വന്ന രഞ്ജനയിൽ സോനം കപൂറായിരുന്നു ധനുഷിന്റെ നായികയായി എത്തിയത്. ചിത്രത്തിലെ ഗാനങ്ങൾ ഒരുക്കിയത് എആർറഹ്മാനായിരുന്നു. ലൗ അജ് കൽ എന്ന ചിത്രത്തിന് ശേഷം സാറ നായികയായി എത്തുന്ന ചിത്രമാണ് അത്രഗി രേ. അക്ഷയ് കുമാർ, ധനുഷ് എന്നിവർക്കൊപ്പമുളള ചിത്രം പങ്കുവെച്ചു കൊണ്ടായിരുന്നു തന്റെ പുതിയ ചിത്രത്തെ കുറിച്ച് സാറ വെളിപ്പെടുത്തിയത്. ധനുഷിന്റെ മൂന്നാമത്തെ ബോളിവുഡ് ചിത്രമാണിത്. അനന്ദ് എൽ റായ് അക്ഷയ് കുമാർ ആദ്യമായി ഒന്നിക്കുന്ന ചിത്രമാണ് അത്രഗി രേ.