പ്രസവിക്കുന്നതിലൂടെ മാത്രമല്ല ഒരു സ്ത്രീ അമ്മയാകുന്നത്. ജന്മം നൽകുന്നതിലൂടെ മാത്രം ഒരു പുരുഷനും അച്ഛനും ആകുന്നില്ല. മക്കളെ സ്നേഹിക്കാനും പരിപാലിക്കാനുമുള്ള മനസ്സുണ്ടായാൽ മാത്രം മതി. അങ്ങനെ നന്മ നിറഞ്ഞ മനസ്സുള്ള നിരവധി താരങ്ങൾ ബോളിവുഡിലുണ്ട്. വാടക ഗർഭത്തിലൂടെ മക്കളെ സ്വന്തമാക്കിയവർ. ബോളിവുഡിൽ മാത്രമല്ല കേരളത്തിലും ഇവർക്ക് അനവധി ഫാൻസുണ്ട്.സിനിമയുടെ കാര്യത്തില്‍ മാത്രമല്ല കുടുംബബന്ധങ്ങളുടെ കാര്യത്തിലും താരരാജാക്കന്മാരെ മാതൃകയാക്കാവുന്നതാണെന്ന് പലപ്പോഴും തെളിഞ്ഞിട്ടുണ്ട്. സിനിമാ തിരക്കുകളും മറ്റ് പ്രശ്‌നങ്ങളും കാരണം കുഞ്ഞുങ്ങളെ ദത്തെടുത്ത് ജീവിക്കുന്നവരും ഇക്കൂട്ടത്തിലുണ്ട്.

അടുത്തിടെ ബോളിവുഡ് റാണി ശില്പ ഷെട്ടി വീണ്ടും അമ്മയായി എന്ന വാർത്ത പുറത്തുവന്നതോടെയാണ് വീണ്ടും ഈ വിഷയം ചർച്ചയാകുന്നത്. രണ്ടാമതും അമ്മയായതിന്റെ സന്തോഷം പങ്കുവെച്ചത് ബോളിവുഡ് നടി ശിൽപ ഷെട്ടിയും രാജ് കുന്ദ്രെയും തന്നെയാണ് . ഇന്‍സ്റ്റഗ്രാമിലൂടെയാണ് ശില്‍പ്പ ഒരു പെൺകുഞ്ഞിന്റെ അമ്മയായ സന്തോഷ വാർത്ത പുറത്ത് വിട്ടത്. സമിഷ ഷെട്ടി കുന്ദ്ര എന്നാണ് കുഞ്ഞിന് പേര് നൽകിയിരിക്കുന്നതെന്നും താരം വെളിപ്പെടുത്തി . വാടക ഗര്‍ഭപാത്രത്തിലൂടെയാണ് കുഞ്ഞ് പിറന്നത്. ശില്‍പ്പ-രാജ് കുന്ദ്ര ദമ്പതികളുടെ രണ്ടാമത്തെ കുഞ്ഞാണിത്. എട്ടുവയസ്സുകാരനായ വിയാന്‍ എന്ന മകന്‍ കൂടി ദമ്പതികൾക്കുണ്ട് . 2009 ലാണ് രാജ് കുന്ദ്രയെ ശില്‍പ്പ വിവാഹം കഴിക്കുന്നത്.

സംവിധായകനും നിര്‍മാതാവുമൊക്കെയായി തിളങ്ങി നില്‍ക്കുന്ന കരണ്‍ ജോഹറും വാടക ഗര്‍ഭപാത്രത്തിലൂടെ കുട്ടികളെ സ്വന്തമാക്കിയിരുന്നു. വിവാഹിതനല്ലെങ്കിലും ഒരു കുഞ്ഞിനെ സ്വന്തമാക്കാന്‍ കരണ്‍ ജോഹര്‍ ആഗ്രഹിച്ചിരുന്നു. ഒടുവില്‍ വാടകഗര്‍ഭപാത്രത്തിലൂടെ ഇരട്ടകുട്ടികളെയായിരുന്നു കരൺ ജോഹറിന് ലഭിച്ചത്. ഒരു ആണ്‍കുട്ടിയും പെണ്‍കുട്ടിയുമായിരുന്നു ജനിച്ചത്. മകന് കരണിന്റെ അച്ഛന്റെ പേരായ യഷ് എന്നും മകള്‍ക്ക് അമ്മയുടെ പേരായ ഹീരു തിരിച്ച് ഇട്ട് റൂഹി എന്നുമാണ് കരൺ പേര് നൽകിയത്.

ബോളിവുഡിന്റെ കിങ് ഖാനായ ഷാരുഖിനെ പോലെ തന്നെ മകന്‍ അബ്രാമിനും വലിയ ആരാധകരാണുള്ളത്. . വാടക ഗര്‍ഭപാത്രത്തിലൂടെയാണ് ഷാരുഖും ഭാര്യ ഗൗരി ഖാനും അബ്രാമിനെ സ്വന്തമാക്കിയത്. അബ്രാമിനെ കൂടാതെ ആര്യന്‍ ഖാന്‍, സുഹാന ഖാന്‍ എന്നിങ്ങനെ രണ്ട് മക്കള്‍ കൂടി ഷാരുഖിനുണ്ട്. ഇവരും പ്രേക്ഷകരുടെ പ്രിയപ്പെട്ട താരപുത്രി പുത്രനാണെങ്കിലും അബ്രാമിനുള്ള ജനപ്രീതി ഇരുവർക്കും ലഭിച്ചിട്ടില്ല.

ബോളിവുഡിലെ ഖാൻ രാജാക്കന്മാരിൽ ഒരാളായ ആമിർ ഖാനും മകനെ സ്വന്തമാക്കിയത് വാടക ഗർഭത്തിലൂടെയാണ്. മൂന്ന് മക്കളാണ് നടന്‍ ആമിര്‍ ഖാന്. ആദ്യ വിവാഹബന്ധത്തില്‍ ഒരു മകനും മകളും താരത്തിനുണ്ട്. ഈ ബന്ധം വേര്‍പ്പെടുത്തിയതിന് ശേഷം 2005 ലായിരുന്നു ഫിലിം മേക്കറായ കിരണ്‍ റാവുവും ആമിര്‍ ഖാനും വിവാഹിതരാവുന്നത്. വാടകഗര്‍ഭപാത്രത്തിലൂടെ ഇരുവരും ഒരു ആണ്‍കുഞ്ഞിനെ സ്വന്തമാക്കിയിരുന്നു . 2011 ലായിരുന്നു അസാദ് ഖാന്‍ ജനിക്കുന്നത്.

ബോളിവുഡ്താര റാണിയായ സണ്ണി ലിയോണും പ്രേക്ഷകരുടെ ഹൃദയങ്ങളിൽ ചേക്കേറിയത് മൂന്ന് കുഞ്ഞുങ്ങളെ ദത്തെടുത്തതിലൂടെയാണ്. ഇതിൽ മൂത്ത മകളായ നിഷയെ ദത്തെടുക്കുകയായിരുന്നു.മറ്റ് മക്കളായ നോഹ, അഷേർ എന്നിവരെ സ്വന്തമാക്കിയത് വാടക ഗര്ഭപാത്രത്തിലൂടെയാണ്. സണ്ണിയുടെയും ഭർത്താവ് ഡാനിയേൽ വെബറിന്റെയും മക്കളുടെയും ചിത്രങ്ങൾ സമൂഹ മാധ്യമങ്ങളിൽ തരംഗമാണ്.

ബോളിവുഡ് താരവും മുൻ മിസ് യൂണിവേഴ്‌സുമായ സുസ്മിത സെൻ രണ്ട് പെൺകുട്ടികളെ ദത്തെടുക്കലിലൂടെ സ്വന്തമാക്കിയിരുന്നു. മൂത്തമകളായ റെനിയെ 2000 യിരത്തിലും രണ്ടാമത്തെ മകളായ അലിസയെ 2010 ലുമാണ് താരം സ്വന്തമാക്കിയത്. വളരെ മഹത്തായൊരു പ്രവർത്തിയിലൂടെ താരം നിരവധി പ്രശംസകളും സ്വന്തമാക്കിയിരുന്നു.ബോളിവുഡ് താരങ്ങളുടെയും താരപുത്രന്മാരുടെയും പുത്രികളുടെയും ചിത്രങ്ങളെല്ലാം സോഷ്യൽ മീഡിയയിൽ തരംഗമാണ്.