അകാലത്തിൽ അന്തരിച്ച നടൻ സുശാന്ത് സിങ് രാജ്പുത്തിന്റെ മരണത്തിൽ അക്ഷരാർത്ഥത്തിൽ സിനിമാലോകം മുഴുവനും വിറങ്ങലിക്കുകയുണ്ടായി. ദിവസങ്ങൾ പിന്നിടുമ്പോഴും മരവിപ്പ് മാറാതെ പ്രേക്ഷകർ. എന്നാലിതാ അവസാനമായി അഭിനയിച്ച ചിത്രം ദിൽ ബേചാരാ റിലീസിനെത്തുന്നു എന്ന വാർത്തയാണ് പുറത്തേക്ക് വരുന്നത്. ജൂലൈ 24–ന് ഡിസ്നി ഹോട്ട്സ്റ്റാറിലൂടെയാണ് ചിത്രം പ്രേക്ഷകരിലേക്ക് എത്തുന്നത്. അദ്ദേഹത്തോടുള്ള സ്നേഹത്തിന്റെയും ആദരവിന്റെയും സൂചനയായി സബ്സ്ക്രൈബ് ചെയ്തവർക്കും അല്ലാത്തവർക്കും സൗജന്യമായി തന്നെ ഈ ചിത്രം കാണാൻ അവസരമുണ്ടാകുമെന്ന് അധികൃതർ അറിയിക്കുകയുണ്ടായി.

അതേസമയം പ്രണയത്തിന്റെയും വിരഹത്തിന്റെയും കഥ പറയുന്ന ചിത്രം ജോൺ ഗ്രീൻ എഴുതിയ ഫോൾട്ട് ഇൻ ഔർ സ്റ്റാർസ് എന്ന നോവലിൽ നിന്ന് പ്രചോദനമുൾക്കൊണ്ടു ഒരുക്കിയിരിക്കുന്നതാണ്. ഇതേ പേരിൽ ഹോളിവുഡിലും ഇതേ കഥ സിനിമയായി 2014–ൽ വന്നിട്ടുണ്ട്. ദിൽ ബേചാരയിൽ സുശാന്തിനൊപ്പം സെയ്ഫ് അലി ഖാനും ഒരുമിച്ച് എത്തുകയാണ്. മുകേഷ് ഛബ്ര സംവിധാനം ചെയ്യുന്ന ചിത്രത്തിന് സംഗീതം ഒരുക്കിയിരിക്കുന്നത് സാക്ഷാൽ എ.ആർ റഹ്മാനാണ്. പുതുമുഖമായ സഞ്ജനയാണ് നായികയായി അഭിനയിച്ചിരിക്കുന്നത്.