താന്‍ കോവിഡ് നെഗറ്റീവ് ആയെന്ന വാര്‍ത്ത അമിതാബ് ബച്ചന്‍ നിഷേധിച്ചു
ബോളിവുഡ് താരം അമിതാബ് ബച്ചന്‍ താന്‍ കോവിഡ് നെഗറ്റീവ് ആയെന്ന റിപ്പോര്‍ട്ടുകള്‍ നിഷേധിച്ചു.
അമിതാബ് ബച്ചന്‍ മുംബൈ നാനാവതി ആശുപത്രിയില്‍ കോവിഡ് ചികിത്സയിലാണ്. 12 ദിവസത്തെ ചികിത്സയ്ക്ക് ശേഷം ബച്ചന്‍ നെഗറ്റീവ് ആയെന്ന് റിപ്പോര്‍ട്ടുകളുണ്ടായിരുന്നു. എന്നാല്‍ രോഗം ഭേദമായിട്ടില്ലെന്നും നെഗറ്റീവ് ഫലം ലഭിച്ചുവെന്ന റിപ്പോര്‍ട്ടുകള്‍ തെറ്റാണെന്നും അമിതാബ് ബച്ചന്‍ വ്യക്തമാക്കി.
അമിതാബും അഭിഷേകും ജൂലൈ 11-മുതല്‍ നാനാവതി ആശുപത്രിയില്‍ ചികിത്സയിലാണ്. അമിതാബ് ബച്ചന്‍, മകനും നടനുമായ അഭിഷേക് ബച്ചന്‍, മരുമകളും നടിയുമായ ഐശ്വര്യ റായി, ചെറുമകള്‍ ആരാധ്യ എന്നിവര്‍ക്ക് കോവിഡ് സ്ഥിരീകരിച്ചിരുന്നു. ഐശ്വര്യ റായി, ആരാധ്യ എന്നിവരെ കഴിഞ്ഞ ആഴ്ച ആശുപത്രിയിലേക്ക് മാറ്റിയിരുന്നു.
പ്രതിദിന വിവരങ്ങള്‍ അമിതാബ് ബച്ചന്‍ തന്റെ ബ്ലോഗ് പോസ്റ്റിലൂടെ പങ്കിടുന്നുണ്ട്. ഇതിന് പുറമെയാണ് താന്‍ നെഗറ്റീവ് ആയെന്ന വ്യാജ വാര്‍ത്തയോട് അമിതാബ് ട്വിറ്ററിലൂടെ പ്രതികരിച്ചത്. താരത്തിന്റെ മകള്‍ ശ്വേത ബച്ചന്‍ നന്ദയും ട്വിറ്ററിലൂടെ ആരാധകര്‍ക്കായി വിവരങ്ങള്‍ പങ്കിടുന്നുണ്ട്.
ഇതിനിടെ അമിതാബ് ബച്ചന്റെ നാല് ബംഗ്ലാവുകളായ ജനക്, ജല്‍സ, പ്രതീക്ഷ, വസ്ത എന്നിവടങ്ങളില്‍ ബ്രിഹന്‍ മുംബൈ മുനിസിപ്പല്‍ കോര്‍പ്പറേഷന്‍ അണുനശീകരണ പ്രവര്‍ത്തനങ്ങള്‍ നടത്തി.
https://www.facebook.com/Malayalivartha
