ബോളിവുഡിലെ ബിഗ് ബോസ് പതിനാലാം സീസണ്‍ ഒക്ടോബറില്‍ തുടങ്ങാനിരിക്കേ സല്‍മാന്‍ ഖാന്റെ പ്രതിഫലത്തുകയെ കുറിച്ചുള്ള വാര്‍ത്തകളും പുറത്തുവരികയാണ്. ഒരു എപ്പിസോഡിന് 20 കോടി രൂപയാണ് താരം വാങ്ങിക്കുന്നത്. നേരത്തേ 15 കോടിയാണ് താരം ഒരു എപ്പിസോഡിന് വാങ്ങുന്നത് എന്നായിരുന്നു റിപ്പോര്‍ട്ടുകള്‍. ഓരോ സീസണിലും പരിപാടിയുടെ ജനപ്രീതി കൂടുന്നതിനനുസരിച്ച് താരത്തിന്റെ പ്രതിഫലവും ഉയരുന്നുണ്ട് എന്നതാണ് വാസ്തവം. ബിഗ് ബോസ് പ്രമോഷനും പ്രൊമോ ഷൂട്ടും ഉള്‍പ്പെടെയുള്ളതിനാണ് ഈ പ്രതിഫലം. ഇനി ഒരു കാര്യം കൂടി, പരിപാടി നീണ്ടു പോകുകയാണെങ്കില്‍ എപ്പിസോഡും കൂടുതല്‍ വേണ്ടിവരുമല്ലോ, അങ്ങനെ വരുമ്‌ബോള്‍ പ്രതിഫലം ഇതിലും കൂടും. കഴിഞ്ഞ സീസണില്‍ ബിഗ് ബോസിന്റെ ജനപ്രീതി കൂടിയ സാഹചര്യത്തില്‍ എപ്പിസോഡുകളും ദീര്‍ഘിപ്പിച്ചിരുന്നു. ബിഗ് ബോസ് ആദ്യ സീസണുകളില്‍ രണ്ടര കോടിയായിരുന്നു സല്‍മാന്‍ ഖാന്റെ പ്രതിഫലം. 2010 മുതലുള്ള പത്ത് സീസണുകള്‍ സല്‍മാന്‍ തന്നെയായിരുന്നു ഷോയുടെ അവതാരകന്‍. സീസണ്‍ നാല് മുതല്‍ ആറ് വരെ ഒരു എപ്പിസോഡില്‍ സല്‍മാന്‍ വാങ്ങിയിരുന്നത് രണ്ടര കോടി രൂപഎന്നാണ് കണക്ക്. സീസണ്‍ ഏഴായപ്പോള്‍ അത് ഇരട്ടിയായി. സീസണ്‍ ഒന്‍പതില്‍ അത് ഏഴു മുതല്‍ എട്ടു കോടിവരെയും സീസണ്‍ 12 ല്‍ 12 മുതല്‍ 14 കോടി രൂപവരെയുമായി പ്രതിഫലം.