ബോളിവുഡ് ഗ്ലാമറസ് താരം സണ്ണി ലിയോണിന്റെ കേരള സന്ദര്‍ശനം വാര്‍ത്തകളിലും സോഷ്യല്‍ മീഡിയയിലും ചര്‍ച്ചയായിരിക്കുകയാണ്. കൊച്ചിയിലെത്തിയ സണ്ണിയെ കാണാന്‍ മണിക്കൂറുകളോളം തമ്പടിച്ചിരുന്ന ജനത്തെ കണ്ട പരലുടെയും അമ്പരപ്പ് ഇനിയും മാറിയിട്ടില്ല. പതിനായിരങ്ങളാണ് കൊച്ചി എംജി റോഡില്‍ സണ്ണിയെ കാണാന്‍ തടിച്ചുകൂടിയത്. ഈ ജനക്കൂട്ടം സണ്ണിയെപ്പോലും അത്ഭുതപ്പെടുത്തി. ഇത്തരമൊരു സ്വീകരണം താരം ഒരിക്കലും പ്രതീക്ഷിച്ചിരുന്നില്ലായെന്നായിരുന്നു സണ്ണി പറഞ്ഞത്.

ഈ ജനക്കൂട്ടത്തെ വിമര്‍ശിച്ച് പലരും പലരീതിയിലുള്ള വിമര്‍ശനങ്ങളുമായി രംഗത്തെത്തി. ഇതില്‍ സിനിമ പ്രവര്‍ത്തകരും സാഹിത്യകാരന്‍മാരും ഉള്‍പ്പെടുന്നു. മലയാളികളുടെ നിലവാരമില്ലായ്മയാണ് ഇതിലൂടെ വെളിപ്പെട്ടതെന്നായിരുന്നു സാഹിത്യ അക്കാദമി ചെയര്‍മാന്‍ കെ വൈശാഖന്‍ അഭിപ്രായപ്പെട്ടത്. എന്നാല്‍ ഈ വിഷയത്തില്‍ ഇപ്പോള്‍ സംവിധായകന്‍ രാം ഗോപാല്‍ വര്‍മ അഭിപ്രായപ്രകടനവുമായി എത്തിയിരിക്കുകയാണ്.

മലയാളത്തിലെ സൂപ്പര്‍ സ്റ്റാറുകളായ മമ്മൂട്ടിയ്ക്കും മോഹന്‍ലാലിനും തള്ള് കൊടുത്തുകൊണ്ടാണ് വര്‍മയുടെ പ്രതികരണം. സണ്ണിയെ കാണാന്‍ തടിച്ചുകൂടിയ ആള്‍ക്കൂട്ടത്തെ കണ്ട് മമ്മൂട്ടിയും മോഹന്‍ലാലും അസൂയപ്പെട്ട് കരഞ്ഞിട്ടുണ്ടാകാമെന്നാണ് രാം വര്‍മ്മയുടെ വാക്കുകള്‍. ‘ഇത്രയേറെ ആളുകള്‍ വരുമെന്ന് അവര്‍ ഒരിക്കല്‍ പോലും ചിന്തിച്ച് കാണില്ല. കേരള ജനതയുടെ സത്യസന്ധതയ്ക്ക് മുന്നില്‍ ഞാന്‍ സല്യൂട്ട് ചെയ്യുന്നു’. വര്‍മ പറഞ്ഞു.

ഈ മാസം 17 നാണ് എംജി റോഡിലുള്ള മൊബൈല്‍ ഷോറൂം ഉദ്ഘാടനത്തിനായി സണ്ണി ലിയോണ്‍ കൊച്ചിയിലെത്തിയത്. സണ്ണിയെ കാണാന്‍ വന്‍ജനാവലിയായതോടെ എംജി റോഡ് മണിക്കൂറുകളോളം സ്തംഭിച്ചു. അടുത്തുള്ള കെട്ടിടങ്ങളുടെയും മരത്തിന്റെയും വാഹനങ്ങളുടെയും മുകളില്‍ വരെ കയറി നിന്നാണ് പലരും താരത്തെ ഒരുനോക്ക് കണ്ടത്. തന്നോട് കാട്ടിയ ഈ സ്‌നേഹത്തിന് താരം നന്ദി പറയുകയും ചെയ്തു.