പെൺമക്കൾക്ക് എപ്പോഴും അമ്മയെക്കാളും ഏറെ അടുപ്പം അച്ഛനോടായിരിക്കും. അതുപോലെതന്നെയാണ് അച്ഛന്മാർക്ക് പെൺമക്കളെയാണ് വലിയക്കാര്യം. അഭിഷേക് ബച്ചന്റെയും മകൾ ആരാധ്യയുടെയും കാര്യവും ഇങ്ങനെ തന്നെയാണ്.

അടുത്തിടെ പങ്കെടുത്ത ഒരു ഗെയിംഷോയിൽവെച്ചാണ് അഭിഷേക് ബച്ചൻ ആ രഹസ്യം തുറന്നു പറഞ്ഞത്. ആരാധ്യയുടെ കാതുകുത്തു ചടങ്ങുമായി ബന്ധപ്പെട്ടതാണ് ആ സംഭവം. പെൺകുഞ്ഞുങ്ങളുടെ കാതുകുത്തുന്നതാണല്ലോ എല്ലാ നാട്ടിലെയും പതിവ്.

ആ പതിവും ആചാരവും ആരാധ്യയുടെ കാര്യത്തിലും തെറ്റിക്കാൻ പാടില്ലല്ലോ. കാതു കുത്തുമ്പോൾ നല്ല വേദനയുണ്ടെന്നു കേട്ടുകേൾവിമാത്രമുള്ള അഭിഷേക് ആരാധ്യയുടെ കാതുകുത്തിന്റെ ദിവസമെത്തിയപ്പോൾ വല്ലാതെ പരിഭ്രാന്തനായി.

കുഞ്ഞ് ആരാധ്യയുടെ ശരീരത്തിൽ ഒരു മുള്ളുപോലും കൊള്ളുന്നതു സഹിക്കാൻവയ്യാത്ത അഭിഷേക് ആകെ അസ്വസ്ഥനായി. കാതുകുത്തുമ്പോൾ എത്രത്തോളം വേദനയെടുക്കുമെന്നറിയാനായി അദ്ദേഹം മകൾക്കു മുമ്പേ സ്വന്തം കാതുതുളച്ചു. അതിനുശേഷമാണ് മകളുടെ കാതുകുത്തു ചടങ്ങ് നടത്തിയത്.

ഷോയിലൂടെ അഭിഷേക് ഇക്കാര്യം വെളിപ്പെടുത്തിയപ്പോൾ അമിതാബ് ബച്ചൻ പോലും വികാരാധീനനായി. ചാനൽപരിപാടിയിൽ അഭിഷേക് ഈ വിവരം തുറന്നു പറഞ്ഞപ്പോഴാണ് മകൾക്കുവേണ്ടി അഭിഷേക് ചെയ്ത ത്യാഗം ഐശ്വര്യപോലും അറിയുന്നത്.

പെൺമക്കളെ ജീവനാണെന്നു പറയുന്ന എത്ര അച്ഛന്മാർ അഭിഷേകിനെപ്പോലെ വേദനസഹിക്കാൻ തയാറാകുമെന്നാണ് ആരാധകരുടെ ചോദ്യം. എന്തായാലും ഈ സംഭവത്തിലൂടെ ബിടൗണിലെ മികച്ച അച്ഛന്മാരുടെ പട്ടികയിൽ അഭിഷേകും എത്തിയെന്നു പ്രത്യേകം പറയേണ്ടതില്ലല്ലോ.