വിവാദ നായികയാണ് താരം. ബോളിവുഡ് താരം കങ്കണ റനൌത്ത് കുറേ നാളായി വാര്‍ത്തകളില്‍ നിറഞ്ഞ് നിൽക്കുകയാണ്. ദേശീയ പുരസ്‌ക്കാര ജേതാവ്കൂടിയായ കങ്കണയുടെ അഭിനയമികവ് മാത്രമല്ല വിവാദങ്ങളും നടിയെ വാര്‍ത്തകളില്‍ സജീവമാക്കുകയാണ്.

ഇപ്പോഴിതാ കങ്കണയുടെ പുതിയ ചിത്രവും വിവാദത്തിലാണ്. അമിതമായ ലൈംഗികത പ്രദര്‍ശിപ്പിക്കുന്നുവെന്നാണ് ചിത്രത്തിനെതിരെയുളള പരാതി. ഈ പരാതി ആദ്യം മുതലേയുണ്ടെങ്കിലും ഇപ്പോള്‍ സെന്‍സര്‍ ബോര്‍ഡ് ചില കടുത്ത നടപടികളെടുത്തിരിക്കുകയാണ്. ഹന്‍സാല്‍ മേത്ത ഒരുക്കുന്ന ചിത്രത്തില്‍ ആഡംബരജീവിതത്തിനായി കുറ്റകൃത്യങ്ങളുടെ ലോകത്തേക്ക് കടക്കുന്ന ഒരു സ്ത്രീയുടെ ജീവിതകഥയാണ് പറയുന്നത്. നാലു ബാങ്ക് കൊളളകളില്‍ പ്രതിയായി കുപ്രസിദ്ധിയാര്‍ജ്ജിച്ച സന്ദീപ് കൌറിന്‍റെ കഥയാണ് ചിത്രത്തിനാധാരം. ചിത്രത്തിലെ ഏതാണ്ട് പത്തോളം സ്ഥലത്ത് സെന്‍സര്‍ ബോര്‍ഡ് അംഗങ്ങള്‍ കത്രിക വെച്ചതായാണ് വിവരം.

സിനിമയിലെ ചില അശ്ലീല വാക്കുകളും നായികയുടെ ലൈംഗിക ബന്ധം കാണിക്കുന്ന രംഗത്തിലെ അശ്ലീല ശബ്ദവുമാണ് വെട്ടിമാറ്റിയത്. സിനിമയില്‍ യഥാര്‍ഥത്തില്‍ അത്തരമൊരു ശബ്ദത്തിന്‍െറ ആവശ്യമില്ലെന്നും അത് ആളുകളെ വഴിതെറ്റിക്കുന്നതാണെന്നുമാണ് സെന്‍സര്‍ ബോര്‍ഡിന്‍റെ നിരീക്ഷണമെന്നും റിപ്പോര്‍ട്ടുണ്ട്.