ദീപാവലിയെ എതിരേല്‍ക്കാന്‍ ബോളിവുഡ് ഒരാഴ്ച മുമ്പ് ഒരുക്കങ്ങളാരംഭിച്ചു. സല്‍മാന്‍ഖാനും കുടുംബവും ഏക്താ കപൂര്‍, സോനം കപൂര്‍, അക്ഷയ് കുമാര്‍, ശില്‍പ ഷെട്ടി അമീര്‍ഖാന്‍ തുടങ്ങിയവരെല്ലാം ആഘോഷങ്ങളുടെ തിരക്കിലാണ്.
സാധാരണയായി ദീപാവലിയോനുബന്ധിച്ച് ബച്ചന്‍ കുടുംബം നടത്താറുള്ള പാര്‍ട്ടി ഈ വര്‍ഷം ഉണ്ടാവില്ല. ഒക്ടോബര്‍ 11 ന് ബച്ചന്റെ 75-ാം പിറന്നാള്‍ ആഘോഷിക്കാനായി കുടുംബം മാലിദ്വീപില്‍ പോയിരിക്കുകയാണ്. ഐശ്വര്യാറായിയുടെ പിതാവ് കൃഷ്ണരാജ് ഈ വര്‍ഷമാദ്യമാണ് മരണമടഞ്ഞത് അതുകൊണ്ടാണ് ആഘോഷം ഒഴിവാക്കിയത്.

സല്‍മാന്‍ഖാന്റെ കുടുംബത്തില്‍ ഇക്കഴിഞ്ഞ ഗണേഷ് ചതുര്‍ത്ഥിയോട് അനുബന്ധിച്ചാണ് ഒരു പുതിയ പതിവ് തുടങ്ങിയത്. ഇത്തവണ ഗണപതിയെ എതിരേറ്റത് കുടുംബ വീടായ ഗാലക്‌സി അപ്പാര്‍ട്ടുമെന്റിലേക്കായിരുന്നില്ല. സല്‍മാന്‍ഖാന്റെ സഹോദരിയായ അര്‍പ്പിതാഖാന്റെയും ആയുഷ് ശര്‍മ്മയുടെയും വീട്ടിലായിരുന്നു. അര്‍പ്പിതാഖാന്റെ പുതിയ വീട്ടിലാണ് ഇത്തവണത്തെ ദീപാവലി വിരുന്നാഘോഷങ്ങള്‍. ഖാന്‍ കുടുംബവും അതുല്‍, അല്‍വിരാ അഗ്നി ഹോത്രിമാരും സംയോജിച്ചു കൊണ്ടുള്ള ആഘോഷരാവാണ് നടത്തുന്നത്. ഗ്യാലക്‌സി അപ്പാര്‍ട്ടുമെന്റിലെ ആഘോഷങ്ങളിലെ പതിവ് വിരുന്നുകാരായ അമീര്‍ഖാന്‍, ഷാരുഖ് ഖാന്‍, കത്രീന കൈഫ്, അനുഷ്‌കാശര്‍മ്മ, ജാക്വിലിന്‍ ഫെര്‍ണ്ണാന്റസ് , സാജിദ് നാദിയാഡ് വാല, രോഹിത് ഷെട്ടി, കരണ്‍ ജോഗര്‍ തുടങ്ങിയവരെല്ലാം എത്തുമെന്നാണ് കരുതപ്പെടുന്നത്. 

റേസ് 3യുടെ നിര്‍മ്മാതാവായ രമേഷ് ടൗരാനി 15 ന് വീട്ടില്‍ വച്ച് ഒരു കാര്‍ഡ് പാര്‍ട്ടി നടത്തി. റിലീസ് ആകാനിരിക്കുന്ന പുതിയ ചിത്രത്തിലെ താരങ്ങളെല്ലാവരും ഉണ്ടായിരുന്നു. കൂടാതെ സല്‍മാനും ജാക്വിലിന്‍ ഫെര്‍ണാണ്ടസും ഉണ്ടായിരുന്നു. പരിപാടികളൊക്കെ ഒഴിവാക്കി അക്ഷയ്കുമാറും ട്വിങ്കിള്‍ ഖന്നയും സുഹൃത്തുക്കള്‍ക്കായി വീട്ടില്‍ പാര്‍ട്ടി ഒരുങ്ങിയിരിക്കുകയാണ്. അയല്‍ക്കാരെ കൂടാതെ റിതിക് റോഷന്‍, സാജിദ് നാദിയാഡ് വാല, സുസൈന്‍ ഖാന്‍, ഗായത്രി ഓബറോയ് തുടങ്ങിയവരെയും ക്ഷണിച്ചിട്ടുണ്ട്.

ഇന്ന് സോനം കപൂറും ശില്‍പ ഷെട്ടിയും വിരുന്നൊരുക്കിയിട്ടുണ്ട്. എല്ലാവരും മല്‍സരിച്ച് വിരുന്നൊരുക്കുന്നത് മറ്റ് പല താരങ്ങള്‍ക്കും ബുദ്ധിമുട്ടായിട്ടുണ്ട്. പരമ്പരാഗതമായ ലക്ഷ്മി പൂജയില്‍ എല്ലാവരേയും ഒരുമിച്ചു പങ്കെടുപ്പിക്കാനാണ് ശ്രമം നടക്കുന്നത്.
ദീപാവലി തിരക്കുകളൊക്കെ കഴിഞ്ഞതിനു ശേഷമാണ് ആമിര്‍ഖാന്‍ സല്‍ക്കാരവിരുന്ന് ഒരുക്കുന്നത്. ഷാരുഖ് ഖാന്‍, സല്‍മാന്‍ഖാന്‍ എന്നിവരെ കൂടാതെ രണ്‍ബീല്‍ കപൂര്‍, അയല്‍ മുഖര്‍ജി, അലിയഭട്ട് രണ്‍വീര്‍സിങ് ദീപിക പദുകോണ്‍, കത്രീന കൈഫ്, ഫാത്തിമ സന ഷെയ്ഖ് എന്നിവരെല്ലാം പങ്കെടുക്കുമെന്നാണ് കരുതുന്നത്.