അന്താരാഷ്ട്ര ചലച്ചിത്രോത്സവത്തിന്റെ ഉദ്ഘാടന ചടങ്ങില് നിന്ന് മടങ്ങവെ അമിതാബ് ബച്ചന് സഞ്ചരിച്ച കാർ അപകടത്തിൽ
ബോളിവുഡ് സൂപ്പര് താരം അമിതാബ് ബച്ചന് വാഹനാപകടത്തില് നിന്ന് രക്ഷപെട്ടത് തലനാരിഴയ്ക്ക്. ഇക്കഴിഞ്ഞ ശനിയാഴ്ചയാണ് സംഭവം നടന്നത്. കൊല്ക്കത്ത അന്താരാഷ്ട്ര ചലച്ചിത്രോത്സവത്തിന്റെ ഉദ്ഘാടന ചടങ്ങില് പങ്കെടുത്ത ശേഷം മടങ്ങുകയായിരുന്ന അമിതാബ് ബച്ചന് സഞ്ചരിച്ചിരുന്ന മെഴ്സിഡസ് ബെന്സ് കാറിന്റെ പിന്ഭാഗത്ത് വീല് ഊരിത്തെറിക്കുകയായിരുന്നു. മുംബൈയിലേക്ക് മടങ്ങുന്നതിന് എയര്പോര്ട്ടിലേക്ക് പോകുന്ന വഴിക്ക് കൊല്ക്കത്തയിലെ ഡഫറിന് റോഡില് വച്ചാണ് കാറിന്റെ ടയര് ഊരിപ്പോയത്.
സംസ്ഥാന സര്ക്കാരിന്റെ അതിഥിയായി എത്തിയ ബച്ചന് സഞ്ചരിച്ച കാറിന്റെ ടയര് ഊരി അപകടമുണ്ടായ സംഭവത്തില് സര്ക്കാര് അന്വേഷണം പ്രഖ്യാപിച്ചു. സ്വകാര്യ ട്രാവല് ഏജന്സിയില് നിന്നും എടുത്ത കാറാണ് അപകടത്തില്പ്പെട്ടത്. സംഭവ സമയത്ത് ബച്ചനൊപ്പം ഒരു സംസ്ഥാന മന്ത്രിയും കാറിലുണ്ടായിരുന്നു. മന്ത്രിയുടെ ഔദ്യോഗിക വാഹനം പിന്നാലെ ഉണ്ടായിരുന്നു. ഈ കാറിലാണ് ബച്ചനെ എയര്പോര്ട്ടില് എത്തിച്ചത്.
സംഭവത്തില് ട്രാവല് ഏജന്സിയോട് വിശദീകരണം തേടിയതായി പശ്ചിമ ബംഗാള് സര്ക്കാര് വൃത്തങ്ങള് അറിയിച്ചു. ഭീമമായ തുക കൊടുത്താണ് ഏജന്സിയുടെ വാഹനം ബച്ചന് വേണ്ടി എത്തിച്ചത്. അപകടത്തില്പ്പെട്ട വാഹനത്തിന് ഫിറ്റ്നസ് സര്ട്ടിഫിക്കറ്റ് ഉണ്ടായിരുന്നില്ലെന്ന് പ്രാഥമികാന്വേഷണത്തില് വ്യക്തമായി. വീഴ്ച കണ്ടെത്തിയാല് ഏജന്സിക്കെതിരെ നടപടിയെടുക്കുമെന്നും സര്ക്കാര് വൃത്തങ്ങള് അറിയിച്ചു.
https://www.facebook.com/Malayalivartha