സിനിമയുടെ തുടക്കകാലത്ത് പ്രതിഫലം പോലും കിട്ടാത്ത നടിയാണ് പ്രിയങ്കാ ചോപ്ര. സിനിമയില്‍ പിടിച്ച് നില്‍ക്കാനുള്ള കൊതികൊണ്ട് പലതും സഹിച്ച് താരം നിന്നു. സിനിമയ്ക്കും ഇന്‍ഡസ്ട്രിക്കും തങ്ങളെ വേണമെന്ന ചിന്ത വന്നാല്‍ ഇവര്‍ വിജയിക്കും. അങ്ങനെ വെന്നിക്കൊടി പാറിച്ചയാളാണ് പ്രിയങ്കാ ചോപ്ര. ഒരു വെള്ളിയാഴ്ച ഇവരുടെ ജീവിതം തന്നെ മാറ്റാമറിച്ചു. പ്രതിഫലം കൂട്ടി, പിന്നിട്ട് ദിവസക്കൂലിയായി. പരസ്യചിത്രങ്ങള്‍ക്ക് മാത്രം കോടികള്‍. ബ്രാന്‍ഡ് അംബാസിഡറാവാന്‍ ഇത്ര കാലത്തേക്ക് ഇത്ര കോടി. അങ്ങനെ കരിയര്‍ വാനോളമുയരും. ഇപ്പോള്‍ പത്ത് കോടിയോളമാണ് പ്രിയങ്ക പ്രതിഫലം വാങ്ങുന്നത്. നല്ല കഥാപാത്രമാണെങ്കില്‍ പ്രതിഫലം കുറയ്ക്കാനും താരം തയ്യാറാകും.

അടുത്തിടെ മുംബയിലെ വലിയൊരു ബിസിനസ് കമ്പനി പ്രിയങ്കാ ചോപ്രയെ സമീപിച്ചു. അവര്‍ സംഘടിപ്പിക്കുന്ന പാര്‍ട്ടിയില്‍ നൃത്തം ചെയ്യണം അതായിരുന്നു ആവശ്യം. പ്രതിഫലത്തിന്റെ കാര്യത്തില്‍ വിട്ടുവീഴ്ചയില്ലെന്ന് താരം വ്യക്തമാക്കി. ഒരു മിനിറ്റിന് ഒരു കോടി രൂപ വേണമെന്നായിരുന്നു ഡിമാന്‍ഡ്. അത് നല്‍കാന്‍ കോര്‍പ്പറേറ്റ് കമ്പനി തയ്യാറായിരുന്നു എന്നതാണ് മറ്റൊരു കൗതുകം. അങ്ങനെ മിനിറ്റിന് ഒരു കോടി എന്ന നിലയില്‍ തുടങ്ങിയ നൃത്തം അവസാനിക്കാന്‍ എട്ട് മിനിട്ടെടുത്തു. പറഞ്ഞ പ്രതിഫലവും വാങ്ങി താരം മടങ്ങി. ബോളിവുഡിനെയും മുംബയ് വ്യവസായ ലോകത്തെയും ഈ വാര്‍ത്ത ഞെട്ടിച്ചു.

വലിയ ബിസിനസുകാരുടെയും കമ്പനികളുടെയും പാര്‍ട്ടികള്‍ക്കും വിവാഹം ഉള്‍പ്പെടെയുള്ള സ്വകാര്യ ചടങ്ങുകളിലും ബോളിവുഡ് താരങ്ങള്‍ പ്രതിഫം പറ്റി എത്തുന്നത് വര്‍ഷങ്ങളായുള്ള പതിവാണ്. ഇതിലൂടെ മാത്രം കോടിക്കണക്കിന് രൂപയാണ് താരങ്ങള്‍ സമ്പാദിക്കുന്നത്. ഷൂട്ടിംഗ് ഇല്ലാത്ത ദിവസങ്ങളില്‍ അമിതാഭ് ബച്ചന്‍ ദിവസവും രണ്ടും മൂന്നും പാര്‍ട്ടികളില്‍ പങ്കെടുക്കുമെന്നത് ബോളിവുഡില്‍ എല്ലാവര്‍ക്കും അറിയാവുന്ന കാര്യമാണ്. പല വ്യവസായികളുടെയും വിവാഹങ്ങള്‍ക്കും മറ്റും ഷാരൂഖ് ഖാന്‍ ഉള്‍പ്പെടെയുള്ള താരങ്ങള്‍ പങ്കെടുക്കാറുണ്ട്. അവരൊന്നും സ്വപ്‌നത്തില്‍ പോലും വാങ്ങിച്ചിട്ടില്ലാത്ത പ്രതിഫലമാണ് പ്രിയങ്കാ ചോപ്ര എട്ട് മിനിറ്റില്‍ നേടിയത്.