ബോളിവുഡ് താരം ഇര്‍ഫാന്‍ ഖാന്റെ അപൂര്‍വരോഗത്തെക്കുറിച്ച് കൂടുതല്‍ വെളിപ്പെടുത്തലുമായി ഭാര്യ
ബോളിവുഡ് താരം ഇര്‍ഫാന്‍ ഖാന് അപൂര്‍വ രോഗമാണെന്ന് താരം ട്വീറ്റ് ചെയ്തതിന് പിന്നാലെ രോഗത്തെക്കുറിച്ച് വെളിപ്പെടുത്തി ഭാര്യ സുതാപ സിക്ദര്‍. ഇര്‍ഫാന്‍ ഒരു പോരാളിയാണെന്നും ജീവിതത്തിലെ പ്രതിസന്ധികളെ അദ്ദേഹം നേരിടുകയാണെന്നും സുതാപ ഫെയ്‌സ്ബുക്കില്‍ കുറിച്ചു. രോഗത്തിന്റെ ശമനത്തിനായി പ്രാര്‍ത്ഥിക്കുകയെന്നും സുതാപ പറഞ്ഞു.
സുതാപയുടെ ഫേസ്ബുക്ക് പോസ്റ്റ്
എന്റെ അടുത്ത സുഹൃത്തും പങ്കാളിയും ഒരു പോരാളിയാണ്. അദ്ദേഹം ജീവിതത്തിലെ പ്രതിബന്ധങ്ങളോട് യുദ്ധം ചെയ്യുകയാണ്. നിങ്ങളുടെയൊക്കെ പ്രാര്‍ഥനകള്‍ക്കും നന്ദി. എന്റെ പങ്കാളി എന്നെയും ഒരു പോരാളിയാക്കി മാറ്റിയിരിക്കുന്നു. ഞാനിപ്പോള്‍ യുദ്ധഭൂമിയിലെ തന്ത്രങ്ങള്‍ ആവിഷ്‌ക്കരിക്കുന്നതിലാണ് ശ്രദ്ധിക്കുന്നത്. എനിക്കിത് ജയിച്ചേ പറ്റൂ. കുടുംബത്തിന്റെയും കൂട്ടുകാരുടെയും ഞങ്ങളെ സ്‌നേഹിക്കുന്ന നിങ്ങളോരോരുത്തരുടെയും പിന്തുണയുള്ളതു കൊണ്ട് വിജയം സുനിശ്ചിതമാണ്. നിങ്ങള്‍ക്ക് രോഗമെന്താണെന്നറിയാനുള്ള ആകാംക്ഷയുണ്ടെന്നറിയാം. പക്ഷേ അതെന്തായാലും ഭേദമാവാന്‍ പ്രാര്‍ഥിക്കുക. എല്ലാവരും ജീവിതത്തിന്റെ സംഗീതത്തിന് ചെവി കൊടുത്ത് അതിനൊപ്പിച്ച് നൃത്തം ചെയ്യുക. ഞാനും കുടുംബവും വൈകാതെ നിങ്ങള്‍ക്കൊപ്പം ചേരുന്നതാണ്. എല്ലാവര്‍ക്കും നന്ദി.
തനിക്ക് അപൂര്‍വ രോഗമുണ്ടെന്നും എന്നാല്‍ ഊഹം പ്രചരിപ്പിക്കരുതെന്നും ഇക്കാര്യത്തില്‍ വിശദ വിവരങ്ങള്‍ 15 ദിവസത്തിനകം അറിയിക്കാമെന്നും ഇര്‍ഫാന്‍ ഖാന് ട്വീറ്റ് ചെയ്തിരുന്നു. ദുഷ്‌കരമായ ഈ ഘട്ടത്തില്‍ കുടുംബവും സുഹൃത്തുക്കളും തന്നോടൊപ്പമുണ്ട്. രോഗനിര്‍ണയത്തിന് ശേഷം കാര്യങ്ങള്‍ വ്യക്തമാക്കാമെന്നും ഇര്‍ഫാന്‍ ട്വീറ്റ് ചെയ്തു.
നേരത്തെ വിശാല്‍ ഭരദ്വാജ് തന്റെ പുതിയ ചിത്രത്തില്‍ നിന്ന് ഇര്‍ഫാന്‍ ഖാനെ മാറ്റിയെന്ന് അറിയിച്ചിരുന്നു. മഞ്ഞപ്പിത്തമായതിനാല്‍ മാറ്റുന്നുവെന്നായിരുന്നു അദ്ദേഹം കാരണമായി പറഞ്ഞത്. എന്നാല്‍ ഇര്‍ഫാന്‍ ഖാന്റെ ട്വീറ്റ് കൂടി വന്നതോടെ താരത്തിന് വേണ്ടി പ്രാര്‍ഥനയിലാണ് ആരാധകര്‍
ഡോക്ടര്‍മാര്‍ പൂര്‍ണവിശ്രമം ആവശ്യപ്പെട്ടിരിക്കുന്നതിനാല്‍ സിനിമകളില്‍നിന്നെല്ലാം അവധി എടുത്തിരിക്കുകയാണ് ഇര്‍ഫാന്‍. പൊളിറ്റിക്കല്‍ സറ്റയര്‍ സീരീസ് ദ് മിനിസ്ട്രിയുടെ ഷൂട്ടിംഗിനായി പഞ്ചാബിലേക്ക് പോകാനിരിക്കുകയായിരുന്നു. അതോടൊപ്പം തന്നെ ബ്ലാക്ക്‌മെയിലിന്റെ പ്രമോഷനിലും പങ്കെടുക്കേണ്ടതുണ്ട്. അതിനിടയിലാണ് താരത്തിന് അസുഖം പിടിപെട്ടത്.
https://www.facebook.com/Malayalivartha
