കഴിഞ്ഞ കുറച്ചു ദിവസങ്ങളായി ബോളിവുഡിനെ ഞെട്ടിച്ച വാര്‍ത്തായിരുന്നു ഇര്‍ഫാന്‍ ഖാന് അപൂര്‍വ്വ രോഗം ബാധിച്ചു എന്നത്. അതുമായി ബന്ധപ്പെട്ട് പലതരത്തിലുള്ള വാര്‍ത്തകളും പ്രചരിച്ചിരുന്നു. ഒടുവില്‍ ഇര്‍ഫാന്‍ ഖാന്‍ തന്റെ അസുഖം എന്താണെന്ന് വ്യക്തമാക്കിയിരിക്കുകയാണ് .

ട്വിറ്ററിലൂടെ പുറത്ത് വിട്ട കുറിപ്പിലാണ് തന്റെ രോഗത്തെ കുറിച്ച്‌ ഇര്‍ഫാന്‍ ഖാന്‍ പറഞ്ഞിരിക്കുന്നത്. പ്രതീക്ഷിക്കാതെ കടന്ന് വരുന്ന സംഭവങ്ങളാണ് നമ്മളെ വളരാന്‍ സഹായിക്കുന്നത്. കഴിഞ്ഞ കുറച്ച്‌ ദിവസങ്ങളിലായി താന്‍ അത് മനസിലാക്കിയിരിക്കുകയാണ്. തനിക്ക് ബാധിച്ചിരുന്ന അസുഖം എന്താണെന്ന് നിര്‍ണയിച്ചിരിക്കുകയാണ്. വയറിലെ ആന്തരികാവയങ്ങളില്‍ തനിക്ക് ട്യൂമറാണ്. ഇക്കാര്യം വളരെ വേദനയോടെയാണ് താന്‍ അംഗീകരിച്ചത്.

എന്നാല്‍ തന്റെ പ്രിയപ്പെട്ടവരുടെ സ്നേഹവും കരുതലും ഏറെ പ്രതീക്ഷകളാണ് നല്‍കുന്നത്. ചികിത്സയ്ക്ക് വേണ്ടി താനിപ്പോള്‍ വിദേശത്താണ്. ന്യൂറോ എന്ന് പറയുമ്പോള്‍ എല്ലാവരും തലച്ചോറിലാണെന്ന് കരുതും. എന്നാല്‍ അവ അതുമായി മാത്രം ബന്ധപ്പെട്ട് കിടക്കുന്നതല്ലെന്നും കൂടുതല്‍ അറിയാന്‍ ആഗ്രഹിക്കുന്നവര്‍ ഗൂഗിളില്‍ സെര്‍ച്ച്‌ ചെയ്ത് നോക്കിയാല്‍ മതി. നിങ്ങളുടെ എല്ലാവരുടെയും പ്രാര്‍ത്ഥനയും ആശംസകളും എനിക്ക് വേണം. മാത്രമല്ല എന്റെ വാക്കുകള്‍ക്ക് വേണ്ടി കാത്തിരിക്കുന്നവര്‍ക്കായി കൂടുതല്‍ കഥകള്‍ പറയാന്‍ താന്‍ വരുമെന്ന് പ്രതീക്ഷിക്കുന്നു എന്നും പറഞ്ഞാണ് ഇര്‍ഫാന്‍ കുറിപ്പ് അവസാനിപ്പിക്കുന്നത്.