വ്യവസായിക്കെതിരെ പീഡനത്തിന് പരാതി നല്‍കിയ മുതിര്‍ന്ന ബോളിവുഡ് നടിയുടെ പരാതിയുടെ കൂടുതല്‍ വിവരങ്ങള്‍ പുറത്ത്. വ്യവസായി സര്‍ഫ്രാസിനെ കുറിച്ച്‌ പൊലീസില്‍ മൊഴി നല്‍കിയതിന് ശേഷം വീട്ടിലെത്തിയപ്പോള്‍ ഇയാള്‍ തന്നെ പിന്തുടര്‍ന്നെത്തി പീഡിപ്പിച്ചെന്നാണ് പുതിയ വിവരം. ശുചിമുറി ഉപയോഗിക്കണമെന്ന് ആവശ്യപ്പെട്ട് വീട്ടിനകത്ത് കയറിയ വ്യവസായി തന്നെ പീഡിപ്പിച്ചുവെന്ന് പരാതിയില്‍ പറയുന്നു. ഇവരെ മാത്രമല്ല, നിരവധി സ്ത്രീകളെ സര്‍ഫ്രാസ് വഞ്ചിച്ചുവെന്നും പരാതിയില്‍ പറയുന്നുണ്ട്.

നേരത്തെ, സര്‍ഫ്രാസിനെതിരെ വഞ്ചന കുറ്റത്തിന് കേസ് നല്‍കുകയും സര്‍ഫ്രാസിനെ അറസ്റ്റ് ചെയ്യുകയും ചെയ്തിരുന്നു. ഈ കേസില്‍ മൊഴി രേഖപ്പെടുത്തുന്നതിനാണ് സര്‍ഫ്രാസിന്‍റെ സുഹൃത്തായിരുന്ന നടിയില്‍ നിന്ന് പൊലീസ് മൊഴിയെടുത്തത്. ഇയാള്‍ക്കെതിരെ പൊലീസില്‍ മൊഴി നല്‍കിയതിനാണ് തന്നെ പീഡിപ്പിച്ചതെന്നും നടി പരാതിയില്‍ പറയുന്നു.

മുംബൈയിലെ ജുഹു പൊലീസ് സ്റ്റേഷനിലാണ് പരാതി നല്‍കിയത്. ചില പ്രശ്‌നങ്ങളെ തുടര്‍ന്ന് ഇയാളുമായുള്ള ബന്ധം നടി അവസാനിപ്പിച്ചിരുന്നു. എന്നിട്ടും ഫോണ്‍ വിളിച്ചും മറ്റും നിരന്തരം ശല്യം ചെയ്യുന്നുവെന്നും പരാതിയിലുണ്ട്.സ്ത്രീയുടെ അന്തസ്സിനെ അപമാനിക്കല്‍, പിന്തുടര്‍ന്ന് ശല്യപ്പെടുത്തല്‍ തുടങ്ങിയ കുറ്റങ്ങള്‍ ചുമത്തി വ്യവസായിക്കെതിരെ കേസെടുത്തത്.