ആറ്റസ് ഫിലിംസിന്റെ ബാനറിൽ അസം കാദിയാർ നിർമ്മിച്ച്, റെജിൻ എസ്. ബാബു തിരക്കഥ രചിച്ച് സംവിധാനം ചെയ്യുന്ന പുതിയ ചിത്രമായ 'ഭൗമ' നവംബർ 12-ന് തിയേറ്ററുകളിലെത്തുന്നു. ഭാവനാ റിലീസ് പ്രദർശനത്തിനെത്തിക്കുന്ന ഈ ചിത്രത്തിന്റെ റിലീസ് തീയതി ഔദ്യോഗികമായി പ്രഖ്യാപിച്ചുകൊണ്ടുള്ള പുതിയ പോസ്റ്റർ അണിയറപ്രവർത്തകർ പുറത്തുവിട്ടു. ഒറ്റപ്പെട്ട ഒരു ബംഗ്ലാവിന്റെയും പശ്ചാത്തലത്തിൽ പഴയകാല വില്ലിസ് ജീപ്പും ഉൾപ്പെടുത്തിയിട്ടുള്ള പോസ്റ്റർ ചിത്രത്തിന്റെ ദുരൂഹത വർദ്ധിപ്പിക്കുന്നതാണ്. മിസ്റ്ററിയും ഉദ്വേഗവും ഒപ്പം മഞ്ഞണിഞ്ഞ മനോഹരമായ പശ്ചാത്തലവും കൊണ്ട് ഏറെ വിസ്മയിപ്പിക്കുന്ന ഒരു ദൃശ്യാനുഭവമായിരിക്കും ഈ ചിത്രമെന്നാണ് പോസ്റ്റർ നൽകുന്ന സൂചന.

ദിലീഷ് പോത്തൻ, വിനീത്, സാഗർ സൂര്യ എന്നിവർ കേന്ദ്ര കഥാപാത്രങ്ങളെ അവതരിപ്പിക്കുന്ന ചിത്രത്തിൽ വൻതാരനിരയാണ് അണിനിരക്കുന്നത്. വിജയ് ബാബു, ജാഫർ ഇടുക്കി, രഘുനാഥ് പലേരി, സെന്തിൽ കൃഷ്ണ, മധുപാൽ, മണിക്കുട്ടൻ, ഭഗത് മാനുവൽ, ലെന, സജിൻ ചെറുകയിൽ, ബിപിൻ പെരുമ്പള്ളി, മെറിൻ ഫിലിപ്പ്, രേവതി ശർമ്മ തുടങ്ങി നിരവധി പ്രമുഖർ ചിത്രത്തിൽ പ്രധാന വേഷങ്ങളിലെത്തുന്നുണ്ട്. കൊച്ചി, പീരുമേട് എന്നിവിടങ്ങളിലായിട്ടാണ് ചിത്രത്തിന്റെ ചിത്രീകരണം പൂർത്തിയായിരിക്കുന്നത്.

ഡോണി കടമ്മനിട്ടയാണ് ചിത്രത്തിന്റെ കഥ ഒരുക്കിയിരിക്കുന്നത്. ക്രിസ്റ്റോ സേവ്യർ സംഗീതവും ശരൺ വേലായുധൻ ഛായാഗ്രഹണവും നിർവ്വഹിച്ചിരിക്കുന്നു. സൂരജ് ഇ.എസാണ് എഡിറ്റിംഗ് കൈകാര്യം ചെയ്തിരിക്കുന്നത്. പ്രൊഡക്ഷൻ ഡിസൈൻ- അപ്പുണ്ണി സാജൻ, കലാസംവിധാനം- സിബിൻ വർഗീസ്, മേക്കപ്പ്- റോണി വെള്ളത്തൂവൽ, കോസ്റ്റ്യൂം ഡിസൈൻ- ഗോപിക ഉണ്ണികൃഷ്ണൻ, ആക്ഷൻ- കലൈ കിംഗ്സ്റ്റൺ, സൗണ്ട് ഡിസൈൻ- ജയദേവൻ ചക്കാടത്ത്, ഫൈനൽ മിക്സ്- രാജാകൃഷ്ണൻ എം.ആർ, കളറിസ്റ്റ്- ലിജു പ്രഭാകർ, പബ്ലിസിറ്റി ഡിസൈൻ- മാ മി ജോ, ഡിജിറ്റൽ മാർക്കറ്റിംഗ്- ഒബ്സ്ക്യൂറ എന്റർടെയിൻമെന്റ്സ് എന്നിവരാണ് മറ്റ് അണിയറപ്രവർത്തകർ. പി.ആർ.ഒ വാഴൂർ ജോസ് ആണ്.