ഫാന്റസി, ഹ്യൂമർ, ത്രില്ലർ ജോണറുകളിൽ ഒരുങ്ങുന്ന പ്രിൻസ് ജോയ് സംവിധാനം ചെയ്ത 'ടൈറ്റാൻസ്' (Titans) ഒക്ടോബർ 22-ന് തിയേറ്ററുകളിലെത്തുന്നു. സെൻസറിംഗിൽ 'യു.എ' സർട്ടിഫിക്കറ്റ് ലഭിച്ച ഈ ചിത്രം ഇതിനകം തന്നെ ചലച്ചിത്ര രംഗത്ത് വലിയ ചർച്ചയായിക്കഴിഞ്ഞു. നേരമ്പോക്കിന്റെ ബാനറിൽ ഇൻഷാദ് എം. ഹസ്സൻ, മിഥുൻ മാനുവൽ തോമസ്, പ്രദീപ് സി.എസ് എന്നിവർ ചേർന്നാണ് ചിത്രം നിർമ്മിക്കുന്നത്. മാജിക് ഫ്രെയിംസ് റിലീസാണ് ചിത്രം തിയേറ്ററുകളിൽ എത്തിക്കുന്നത്.

തനതായ അഭിനയശൈലിയിലൂടെ പ്രേക്ഷകരുടെ പ്രിയപ്പെട്ടവരായി മാറിയ ജയസൂര്യയും വിനായകനും ആദ്യമായി ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്. ഇവരുടെ കോമ്പിനേഷനെ വളരെ വലിയ പ്രതീക്ഷയോടെയാണ് ആരാധകർ കാത്തിരിക്കുന്നത്. പ്രേക്ഷകരുടെ മുൻവിധികളെയും ധാരണകളെയും തിരുത്തിക്കുറിക്കുന്ന തരത്തിലുള്ള വ്യത്യസ്തമായ കഥാപാത്ര അവതരണമാണ് ചിത്രത്തിലുള്ളതെന്ന് ഇതുവരെയുള്ള അപ്ഡേറ്റുകൾ വ്യക്തമാക്കുന്നു.

ജയസൂര്യ, വിനായകൻ എന്നിവർക്ക് പുറമേ സണ്ണി വെയ്ൻ, സുരേഷ് കൃഷ്ണ, ഇന്ദ്രൻസ്, പ്രശസ്ത റാപ് സിംഗർ ബബ്ബിജീൻ, നിഹാൽ, മണികണ്ഠൻ ആചാരി തുടങ്ങി പ്രമുഖ താരങ്ങളും ഏതാനും പുതുമുഖങ്ങളും ചിത്രത്തിൽ അണിനിരക്കുന്നുണ്ട്. കൊച്ചി, കോയമ്പത്തൂർ, കൊല്ലം എന്നിവിടങ്ങളിലെ വ്യത്യസ്തമായ ലൊക്കേഷനുകളിലായിട്ടാണ് ചിത്രീകരണം പൂർത്തിയായത്.

ജയിംസ് സെബാസ്റ്റ്യൻ തിരക്കഥയൊരുക്കിയ ചിത്രത്തിന് ഷാൻ റഹ്മാൻ സംഗീതവും വിഷ്ണുശർമ്മ ഛായാഗ്രഹണവും നിർവ്വഹിക്കുന്നു. ഷമീർ മുഹമ്മദാണ് എഡിറ്റിംഗ്. അരുൺ വെഞ്ഞാറമൂട് പ്രൊഡക്ഷൻ ഡിസൈനും ഫീനിക്സ് പ്രഭു ആക്ഷൻ കൊറിയോഗ്രാഫിയും കൈകാര്യം ചെയ്യുന്നു. വൻ മുതൽമുടക്കിൽ ഒരുക്കിയ ഈ ചിത്രം തിയേറ്ററുകളിൽ പുതിയൊരു ദൃശ്യാനുഭവം സമ്മാനിക്കുമെന്നാണ് അണിയറപ്രവർത്തകരുടെ അവകാശവാദം.