ജാതിയുടെയും മതത്തിന്റെയും നിറത്തിന്റെയും പേരിൽ ഒരു ജനവിഭാഗത്തിനു അനുഭവിക്കേണ്ടി വന്ന യാതനകളുടെയും അവർക്ക് നീതി നേടിക്കൊടുക്കാൻ വേണ്ടി ജന്മമെടുത്ത ഒരു വക്കീലിന്റെയും കഥയാണിത്.... അതെ, സൂര്യ നായകനായി എത്തിയ ‘ജയ് ഭീം’ സിനിമ ഇന്ന് ജനഹൃദയങ്ങളിൽ ആഞ്ഞ് തറയ്ക്കുകയാണ്. ഓരോ കഥാപാത്രങ്ങളും ഒറ്റപ്പെട്ട ഒരു സമൂഹത്തിന്റെ നേർക്കാഴ്ചയായി മാറുകയാണ്. ഈ പ്രചോദനമായ ഓരോ കഥാപാത്രങ്ങളെയും തിരയുകയാണ് പ്രേക്ഷകർ.

ചിത്രത്തിലെ കേന്ദ്ര കഥാപാത്രമായ പാർവതി ഇപ്പോൾ കടുത്ത ദുരിതത്തിലാണ്. ഇപ്പോഴിതാ പാർവതിക്കും കുടുംബത്തിനും സഹായ ഹസ്തവുമായി നടൻ ലോറൻസ്. പാർവതിക്കും കുടുംബത്തിനും താമസിക്കാനായി പുതിയ വീട് സമ്മാനമായി നൽകുമെന്ന് രാഘവ ലോറൻസ് ഉറപ്പ് നൽകിയിരിക്കുകയാണ്. മാധ്യമങ്ങളിലൂടെ പ്രചരിച്ച വാർത്തകളിൽ നിന്നാണ് ഇവരുടെ കഷ്ടതയെക്കുറിച്ച് രാഘവ ലോറൻസ് അറിയുന്നത്.

'രാജാക്കണ്ണിന്റെ ഭാര്യയുടെ ഇപ്പോഴത്തെ അവസ്ഥ അറിഞ്ഞപ്പോൾ അതിയായ ദുഃഖം തോന്നുന്നു. ചെയ്യാത്ത കുറ്റത്തിനാണ് രാജാക്കണ്ണും പാർവതിയും പീഡിപ്പിക്കപ്പെട്ടത്. പാർവതിക്ക് വീട് വച്ചു നൽകുമെന്ന് ഞാൻ വാക്കു നൽകുന്നു'. എന്നാണ് രാഘവ പറഞ്ഞത്.

‘ജയ് ഭീമിലെ’ സെൻഗിണി എന്ന കഥാപാത്രമാണ് പാർവതിയുടെ ജീവിതം ലോകത്തോട് തുറന്ന് പറഞ്ഞത്. എന്നാൽ സിനിമയിലെ സെൻഗിണിയിൽ നിന്ന് ഏറെ വ്യത്യസ്തമാണ് പാർവതിയുടെ ഇപ്പോഴത്തെ ജീവിതം എന്ന് പ്രേക്ഷകർ കണ്ടെത്തുകയായിരുന്നു. ചെന്നൈയിലെ പോരൂരിലെ ഓലമേഞ്ഞ കുടിലിലാണ് പാർവതി കുടുംബ സമേതം താമസിക്കുന്നത്. യഥാർഥ 'സെൻഗിണി'യുടെ രണ്ടാമത്തെ കുഞ്ഞ് മരണപ്പെടുകയുണ്ടായി.

അതേസമയം ടി.ജെ. ജ്ഞാനവേല്‍ സംവിധാനം ചെയ്ത ചിത്രം തൊണ്ണൂറുകളില്‍ നടന്ന സംഭവങ്ങളാണ് തുറന്നുകാട്ടുന്നത്. ചിത്രത്തിന് പ്രചോദനമേകിയത് ആദിവാസികളിലെ കുറുവ വിഭാഗത്തിന് നേരെ ഉണ്ടായ പൊലീസിന്റെ കടത്തമാണ്. ‘ജയ് ഭീം’ റിലീസ് ആയതോടെ ഈ ആക്രമണത്തിൽ ദാരുണമായി കൊല്ലപ്പെട്ട രാജാക്കണ്ണിന്റെ ഭാര്യ പാർവതിയുടെ ഇപ്പോഴത്തെ അവസ്ഥയും വാര്‍ത്തകളിൽ വന്നു.

മോഷണം ആരോപിക്കപ്പെട്ട് പൊലീസ് പിടിയിലായ രാജാക്കണ്ണിന്റെ തിരോധാനവുമായി ബന്ധപ്പെട്ട നിയമപോരാട്ടമാണ് ചിത്രത്തിന്റെ ഇതിവൃത്തം. സെൻഗിണിയായി ചിത്രത്തിൽ വേഷമിട്ട മലയാളി നടി ലിജോമോളുടെ അഭിനയവും ഏറെ പ്രശംസ പിടിച്ചുപറ്റിയിരുന്നു. ലിജോ മോളെ കൂടാതെ രജിഷാ വിജയനും ചിത്രത്തിൽ കേന്ദ്ര കഥാപാത്രത്തെ അവതരിപ്പിക്കുന്നുണ്ട്.