ഉലകനായകന്റെ ആക്ഷന്‍ ചിത്രം 'സാണ്ടിയാര്‍' ഫസ്റ്റ്‌ലുക്ക് പുറത്ത്
ഉലകനായകന് കമല്‍ഹാസനെ നായകനാക്കി എസ്.യു. അരുണ്‍കുമാര്‍ സംവിധാനം ചെയ്യുന്ന പുതിയ തമിഴ് ചിത്രം 'സാണ്ടിയാര്‍' ഫസ്റ്റ്‌ലുക്ക് പോസ്റ്റര്‍ പുറത്തിറങ്ങി. രാജ്കമല്‍ ഫിലിംസ് ഇന്റര്‍നാഷണലിന്റെയും ടര്‍മറിക് മീഡിയയുടെയും സഹകരണത്തില്‍ ഒരുങ്ങുന്ന ചിത്രം കമല്‍ഹാസനും ആര്‍. മഹേന്ദ്രനും ചേര്‍ന്നാണ് നിര്‍മിക്കുന്നത്.
കമല്‍ഹാസന്റെ കരിയറിലെ മറ്റൊരു ശ്രദ്ധേയമായ കഥാപാത്രത്തെ അവതരിപ്പിക്കുന്ന ചിത്രത്തിന്റെ ഫസ്റ്റ്‌ലുക്ക് പോസ്റ്റര്‍ ഇതിനോടകം സിനിമാ പ്രേമികള്‍ക്കിടയില്‍ ശ്രദ്ധ നേടുകയാണ്. എസ്. ഡിസ്‌നിയാണ് ചിത്രത്തിന്റെ സഹനിര്‍മാതാവ്.
പതിവ് രൂപത്തില്‍നിന്ന് വ്യത്യസ്തമായി പരുക്കന്‍ ലുക്കിലാണ് കമല്‍ഹാസന്‍ പോസ്റ്ററില്‍ പ്രത്യക്ഷപ്പെടുന്നത്. നരച്ച താടിയും മുടിയും ഗൗരവമേറിയ നോട്ടവുമായി പഴയൊരു വാഹനത്തിന്റെ വാതിലിനരികില്‍ ഇരിക്കുന്ന താരത്തെയാണ് പോസ്റ്ററില്‍ കാണുന്നത്. കൈയില്‍ തോക്കും, വാഹനത്തിന്റെ വാതിലില്‍ രക്തക്കറകളും ഉള്‍പ്പെടുത്തിയിരിക്കുന്ന പോസ്റ്റര്‍ ചിത്രത്തിന്റെ ആക്ഷന്‍ പശ്ചാത്തലത്തിലേക്കുള്ള സൂചനയാണ് നല്‍കുന്നത്. കമല്‍ഹാസന്റെ കഥാപാത്രത്തിന്റെ സ്വഭാവത്തെക്കുറിച്ചും സിനിമയുടെ പ്രമേയത്തെക്കുറിച്ചും ആകാംക്ഷ ഉയര്‍ത്തുന്ന തരത്തിലാണ് ഫസ്റ്റ്‌ലുക്ക് ഒരുക്കിയിരിക്കുന്നത്.
'ചിത്ത', 'വീര ധീര സൂരന്‍' തുടങ്ങിയ ചിത്രങ്ങളിലൂടെ ശ്രദ്ധ നേടിയ സംവിധായകനാണ് എസ്.യു. അരുണ്‍കുമാര്‍. വ്യത്യസ്തമായ കഥാപശ്ചാത്തലങ്ങളും ശക്തമായ കഥാപാത്രങ്ങളും അവതരിപ്പിച്ചിട്ടുള്ള സംവിധായകന്‍ കമല്‍ഹാസനുമായി ഒന്നിക്കുന്നുവെന്നതാണ് 'സാണ്ടിയാര്‍' എന്ന ചിത്രത്തിന്റെ പ്രധാന ആകര്‍ഷണം. കമല്‍ഹാസന്റെ അഭിനയ മികവും അരുണ്‍കുമാറിന്റെ കഥപറച്ചില്‍ ശൈലിയും ഒന്നിക്കുന്ന ചിത്രത്തെ വലിയ പ്രതീക്ഷയോടെയാണ് ആരാധകര്‍ കാത്തിരിക്കുന്നത്. ചിത്രത്തിന്റെ സംഗീതസംവിധാനം നിര്‍വഹിക്കുന്നത് അനിരുദ്ധ് രവിചന്ദറാണ്.
https://www.facebook.com/Malayalivartha
