ഇന്ന് ലോകത്തെ മുഴുവൻ ഭയപ്പെടുത്തുന്ന വില്ലനാണ് കാൻസർ. കാൻസർ രോഗം മൂലം മരണപ്പെടുന്നവരുടെ എണ്ണം ദിനംപ്രതി വർദ്ധിച്ചു വരികയാണ്. ക്രമം തെറ്റിയ ജീവിതവും ജീവിത ശൈലികളുമെല്ലാം ചെന്നെത്തിക്കുന്നത്പലപ്പോഴും കാൻസർ പോലുള്ള മാരക രോഗങ്ങളിലേക്കാണ്. കൊഴുപ്പ് നിറഞ്ഞ ഭക്ഷണവും വ്യായാമം ഇല്ലാത്തതും ലഹരി വസ്തുക്കളുടെ ഉപയോഗവും രാസപദാർത്ഥങ്ങളടങ്ങിയ ഭക്ഷണത്തിന്റെ അമിത ഉപയോഗവും എല്ലാം കാൻസറിനെ വിളിച്ചുവരുത്താൻ സഹായിക്കുന്നു. പലപ്പോഴും കാൻസർ രോഗികൾ ചികിത്സ ലഭിക്കാതെ മരണപ്പെടുന്ന കാഴ്ചയാണ് കാണുന്നത്. തുടക്കത്തിൽ തന്നെ കണ്ടുപിടിക്കാൻ സാധിക്കാത്തതും വേണ്ടത്ര ചികിത്സ ലഭിക്കാത്തതും ആണ് പലപ്പോഴും മരണ കാരണമാകുന്നത്.

കാൻസറിന്റെ ശരിയായ ലക്ഷണങ്ങൾ മനസ്സലാക്കേണ്ടതും അനിവാര്യമാണ്. പലപ്പോഴും മറ്റ് രോഗങ്ങളുടെ ലക്ഷണങ്ങൾ കാന്സറിന്റേതായി തെറ്റിദ്ധരിക്കപ്പെടാറുണ്ട്. ഇത് മികച്ച ചികിത്സ ലഭിക്കുന്നതിന് തടസമാകുന്നു.
ശ്വാസകോശാര്‍ബുദത്തിന്‍റെ ചില ലക്ഷണങ്ങളും പലപ്പോഴും തെറ്റിദ്ധരിക്കപ്പെടാറുണ്ട്. വിദഗ്ധ പഠനങ്ങൾ വ്യക്തമാക്കുന്നത് ഇന്ത്യയിലെ പുരുഷന്മാരില്‍ ഏറ്റവും അധികം കാണപ്പെടുന്ന രണ്ടാമത്തെ ക്യാന്‍സറാണ് ശ്വാസകോശാര്‍ബുദം എന്നാണ്. ഏകദേശം 48,698 പേര്‍ക്കാണ് 2018ല്‍ രോഗം സ്ഥിരീകരിച്ചത്. 19,097 സ്ത്രീകളിലും ശ്വാസകോശാര്‍ബുദം കണ്ടെത്തി. പുകവലി തന്നെയാണ് ശ്വാസകോശാര്‍ബുദത്തിനു കാരണമാകുന്ന ഏറ്റവും പ്രധാനഘടകം. അമിതമായ മദ്യപാനവും ലഹരി വസ്തുക്കളുടെ ഉപയോഗവും കാൻസറിന്‌ കാരണമാകുന്നു.

ലക്ഷണങ്ങൾ മനസ്സിലാക്കി തുടക്കത്തിൽ തന്നെ ശരിയായ ചികിത്സ ലഭിക്കുകയാണെങ്കിൽ ഒരു പരിധി വരെ കാൻസറിൽ നിന്ന് രക്ഷ നേടാൻ സാധിക്കും. താഴെ പറയുന്ന രോഗ ലക്ഷണങ്ങൾ നിങ്ങൾക്കുണ്ടെങ്കിൽ തീർച്ചയായും ഒരു വിദഗ്ധ ഡോക്റ്ററുടെ സേവനം ലഭ്യമാക്കുക.

1. നിര്‍ത്താതെയുളള അതിഭയങ്കരമായ ചുമ നിസാരമായി കാണരുത്. അതും ചിലപ്പോള്‍ ശ്വാസകോശാര്‍ബുദത്തിന്‍റെ തുടക്കമാകാം.

2. ചുമയ്ക്കുമ്പോള്‍ രക്തം വരുന്നത് പ്രത്യേകം ശ്രദ്ധിക്കണം. തുപ്പുമ്പോള്‍ നിറവ്യത്യാസം ഉണ്ടെങ്കിലും തീർച്ചയായും പരിശോധന നടത്തണം.

3. ശ്വസിക്കാനുളള ബുദ്ധിമുട്ടാണ് മറ്റൊരു ലക്ഷണം. ചെറുതായിട്ട് ഒന്ന് നടക്കുമ്പോള്‍ പോലും ഉണ്ടാകുന്ന കിതപ്പ് അനുഭവെപ്പടുന്നെങ്കിൽ പ്രത്യേകം ശ്രദ്ധിക്കണം.

4. ശ്വാസതടവും ചുമയും മൂലം നെഞ്ചുവേദന ഉണ്ടാകുന്നതും ശ്വാസകോശാര്‍ബുദംത്തിന്‍റെ ലക്ഷണമാകം.

5. ഒരു കാരണവും ഇല്ലാതെ ശരീരഭാരം പെട്ടെന്ന് കുറയുന്നതും കാൻസറിന്റെ രോഗ ലക്ഷണമാകാം.

6. ശബ്ദത്തിന് പെട്ടെന്ന് മാറ്റം വരുന്നതും ശ്രദ്ധിക്കണം.

7. എപ്പോഴും ക്ഷീണം അനുഭവപ്പെടുന്നതും ലക്ഷണമാകാം.

ലക്ഷണങ്ങൾ മനസ്സിലാക്കി ശരിയായ മികച്ച ചികിത്സ നൽകുന്നതിലൂടെ രോഗിയെ തിരികെ ജീവിതത്തിലേക്കുകൊണ്ടു വരൻ സാധിക്കും. നിർധനരായ രോഗികൾക്ക് സർക്കാർ ചികിത്സ സഹായങ്ങളും നൽകിവരുന്നുണ്ട്. കൂടാതെ കുറഞ്ഞ ചിലവിലെ ചികിത്സയും സർക്കാർ ആശുപത്രികളിൽ ഇന്ന് ലഭ്യമാണ്. അതുകൊണ്ടു തന്നെ കാൻസർ വന്നാൽ ജീവിതം നശിച്ചു ഇനി ആത്മഹത്യാ മാത്രമേ മാർഗമുള്ളൂ എന്ന് കരുതാൻ വരട്ടെ. രോഗലക്ഷണങ്ങൾ കണ്ടെത്തിയാൽ ഉടൻ തന്നെ നല്ലൊരുഡോക്ട്ടറുടെ സേവനം ലഭ്യമാക്കുക. നിങ്ങളുടെ വേണ്ടപ്പെട്ടവർ നിങ്ങളോടൊപ്പം തന്നെ ഉണ്ടാകും. ചികിത്സ ലഭിക്കാതെ ഒരു കാൻസർ രോഗിയും ഇനി മരണപ്പെടരുത്. നിങ്ങൾക്ക് തന്നെ സ്വന്തമായി നിങ്ങളുടെ ശരീരത്തിലെ മാറ്റങ്ങൾ തിരിച്ചറിയാൻ സാധിക്കും