ജമ്മു കശ്മീരിൽ സുരക്ഷാ സേനയുമായുള്ള ഏറ്റുമുട്ടലിൽ ഒരു ഭീകരൻ കൊല്ലപ്പെട്ടു.ഷോപ്പിയാനിലെ രാഖാമ ഗ്രാമത്തിൽ തീവ്രവാദികളുടെ സാന്നിധ്യമുണ്ടെന്ന വിവരത്തെത്തുടർന്ന് സുരക്ഷാ സേന തിരച്ചിൽ നടത്തിയപ്പോളാണ് ഏറ്റുമുട്ടൽ നടന്നത്.

കീഴടങ്ങാൻ ആവശ്യപ്പെട്ടെങ്കിലും സുരക്ഷാ സേനയ്‌ക്ക് നേരെ വെടിയുതിർത്തത് ചെറുത്തു നിന്ന ഭീകരനെ പ്രതിരോധിക്കുന്നതിനിടയിൽ തിരച്ചിൽ ഏറ്റുമുട്ടലായി മാറുകയായിരുന്നുവെന്ന് പോലീസ് വക്താവ് പറഞ്ഞു.ഇതിനെത്തുടർന്ന് ഒരു തീവ്രവാദി ഇതുവരെ കൊല്ലപ്പെട്ടിട്ടുണ്ട്; ഓപ്പറേഷൻ പുരോഗമിക്കുകയാണെന്ന് വക്താവ് പറഞ്ഞു.

സെപ്റ്റംബര്‍ 23ന് ഷോപ്പിയാന്‍ സെയ്നപോറ ഏരിയയിലെ കശ് വ ഗ്രാമത്തില്‍ നടന്ന ഏറ്റുമുട്ടലില്‍ ഭീകരനെ സുരക്ഷാസേന വധിച്ചിരുന്നു. സെപ്റ്റംബര്‍ 20ന് ഷോപ്പിയാനില്‍ സുരക്ഷാസേന നടത്തിയ മറ്റൊരു ഏറ്റുമുട്ടലില്‍ നാല് ഭീകരരെ വധിച്ചിരുന്നു. കൂടാതെ, ഷോപ്പിയാനിലെ റാവല്‍പോറ വില്ലേജില്‍ നടത്തിയ തിരച്ചിലില്‍ ജെയ്ഷെ മുഹമ്മദ് കമാണ്ടര്‍ അടക്കം മൂന്ന് ഭീകരരെയും വധിച്ചിരുന്നു.

ജമ്മു കശ്മീരിലെ ബന്ദിപോറ ജില്ലയിൽ കഴിഞ്ഞ ഞായറാഴ്ച നടന്ന ഏറ്റുമുട്ടലിലും രണ്ട് ഭീകരർ കൊല്ലപ്പെട്ടിരുന്നു. കൊല്ലപ്പെട്ട രണ്ട് ഭീകരർക്കും ഭീകര സംഘടനയായ ലഷ്കർ-ഇ-തോയ്ബയുമായി ബന്ധമുണ്ടെന്ന് കശ്മീർ പോലീസ് ഇൻസ്പെക്ടർ ജനറൽ വിജയ് കുമാർ പറഞ്ഞു.

അന്ന് മരിച്ചവരിൽ ഒരാൾ ബിജെപി ജില്ലാ പ്രസിഡന്റ് വസീം ബാരിയെയും അദ്ദേഹത്തിന്റെ രണ്ട് കുടുംബാംഗങ്ങളെയും കൊലപ്പെടുത്തിയ ആളാണ്. കഴിഞ്ഞ വർഷം ജൂലൈയിലാണ് ബിജെപി നേതാവ് വസീം ബാരിയും അദ്ദേഹത്തിന്റെ അച്ഛനും സഹോദരനും ഭീകരാക്രമണത്തിൽ കൊല്ലപ്പെട്ടത്.