യുഎഇയുടെ 50-ാമത് ദേശീയ ദിനം എക്കാലത്തെക്കാളും കളറാക്കാൻ ഒരുങ്ങുകയാണ് ആധികാരികൾ. ഇതുപ്രമാണിച്ച് രാജ്യത്ത് വിപുലമായ ആഘോഷ പരിപാടികള്‍ ഒരുങ്ങുന്നു. വാരാന്ത്യ അവധി ദിവസങ്ങള്‍ ഉള്‍പ്പെടെ നാല് ദിവസമാണ് വിവിധ മേഖലകളിലെ ജീവനക്കാര്‍ക്ക് അവധിയായി ലഭിക്കുക.

ആഘോഷത്തിന്റെ ഭാഗമായി തന്നെ കരിമരുന്ന് പ്രയോഗവും വിവിധ നറുക്കെടുപ്പുകളും ഡിസ്‌കൗണ്ടുകളുമാണ് ദുബൈയിലെ സ്വദേശികളെയുംപ്രവാസികളെയും കാത്തിരിക്കുന്നത്. ദുബൈ ഫെസ്റ്റിവല്‍സ് ആന്‍ഡ് റീട്ടെയ്ല്‍ എസ്റ്റാബ്ലിഷ്‌മെന്റ്(ഡിഎഫ്ആര്‍ഇ) സംഘടിപ്പിക്കുന്ന ദേശീയ ദിനാഘോഷങ്ങള്‍ ഡിസംബര്‍ രണ്ട് മുതല്‍ 11 വരെ നീളുന്നതാണ്.

അതായത് ഡിസംബര്‍ ഒന്നു മുതല്‍ നാല് വരെയാണ് രാജ്യത്ത് അവധി ദിനങ്ങൾ ലഭിക്കുക. ദുബൈ നഗരത്തില്‍ അങ്ങോളമിങ്ങോളം വിവിധ പരിപാടികള്‍ സംഘടിപ്പിക്കുകയും ചെയ്യും. ഡിസംബര്‍ രണ്ടിനും മൂന്നിനും രാത്രി എട്ടു മണി 8.30, ഒമ്പത് മണി സമയത്ത് ദ് പാം അറ്റ്‌ലാന്റിസിലെ ദ് പോയിന്റിലും ജുമൈറ ബീച്ചിലെ സണ്‍സെറ്റ് മാളിനടത്തുള്ള ഇത്തിസാലാത്ത് ബീച്ച് കാന്റീനിലെ ബ്ലൂവാട്ടേഴ്‌സിലും ലാ മെര്‍, ബുര്‍ജ് അല്‍ അറബ് എന്നിവിടങ്ങളിലുമാണ് കരിമരുന്ന് പ്രയോഗം നടക്കുക..

അതോടൊപ്പം തന്നെ ദേശീയ ദിനത്തോടനുബന്ധിച്ച് ദുബൈയിലെ വിവിധ മാളുകളില്‍ വന്‍ വിലക്കുറവാണ് ഒരുക്കിയിരിക്കുന്നത്. മാജിദ് ഫുത്തൈം മാളുകള്‍, ദുബൈ ഫെസ്റ്റിവല്‍ സിറ്റി, ദുബൈ മാള്‍, ദുബൈ ഔട്ട്‌ലറ്റ് മാള്‍ എന്നിവിടങ്ങളില്‍ തെരഞ്ഞെടുത്ത ഉല്‍പ്പന്നങ്ങള്‍ക്ക് 50 മുതല്‍ 70 ശതമാനം വരെയാണ് വിലക്കുറവ് ഉണ്ടായിരിക്കുക. ഡിസംബര്‍ 13 വരെയാണ് ഈ ഓഫര്‍ ഉള്ളത്. ഊബല്‍ ബാഡ്ജ് വാങ്ങുന്നതിലൂടെ നറുക്കെടുപ്പ് വഴി 500,000 ദിര്‍ഹം വരെ സ്വന്തമാക്കാനുള്ള അവസരവും ഒരുക്കിയിട്ടുണ്ട്. www.idealz.com എന്ന വെബ്‌സൈറ്റ് വഴി 50 ദിര്‍ഹത്തിന് ഊബല്‍ ബാഡ്ജ് ലഭ്യമാണ്.

അതേസമയം ഒരു ഇടവേളയ്‍ക്ക് ശേഷം ദുബൈയില്‍ വീണ്ടം സൂപ്പര്‍ സെയില്‍ ഒരുങ്ങുകയാണ്. 90 ശതമാനം വരെ വിലക്കുറവ് പ്രഖ്യാപിച്ചുകൊണ്ട് നവംബര്‍ 25 ശനിയാഴ്‍ച മുതല്‍ നവംബര്‍ 27 വരെയാണ് മൂന്ന് ദിവസത്തെ ദുബൈ സൂപ്പര്‍ സെയില്‍ നടക്കുക.

ഈ വര്‍ഷം ഇത് രണ്ടാം തവണയാണ് ദുബൈ സൂപ്പര്‍ സെയില്‍ നടക്കുന്നത്. ഫാഷന്‍, ഹോം ഡെക്കര്‍, ലൈഫ് സ്റ്റൈല്‍, ഇലക്ട്രോണിക്സ്, ബ്യൂട്ടി പ്രൊഡക്ടുകള്‍ എന്നിവയ്‍ക്ക് ഈ കാലയളവില്‍ ദുബൈയിലെ ഷോപ്പിങ് മാളുകളിലും മറ്റ് വ്യാപാര സ്ഥാപനങ്ങളിലും 90 ശതമാനം വരെ വിലക്കുറവ് ലഭിക്കുമെന്നാണ് അധികൃതർ നൽകുന്ന വാഗ്ദാനം.

കൂടാതെ 72 മണിക്കൂര്‍ വ്യാപാരോത്സവത്തില്‍ രണ്ടായിരത്തോളം ഔട്ട്‍ലെറ്റുകളിലൂടെ അഞ്ഞൂറിലധികം ബ്രാന്‍ഡുകള്‍ വിലക്കുറവില്‍ സ്വന്തമാക്കാനും സാധിക്കുന്നതാണ്. വ്യാപാര മേളയില്‍ പങ്കെടുക്കുന്ന മാളുകളും മറ്റ് സ്ഥാപനങ്ങളും കര്‍ശനമായ ആരോഗ്യ സുരക്ഷാ മാനദണ്ഡങ്ങള്‍ പാലിക്കുമെന്നും മാസ്‍ക് ധരിക്കുന്നതും സാമൂഹിക അകലം പാലിക്കുന്നതും ഉള്‍പ്പെടെയുള്ള എല്ലാ സര്‍ക്കാര്‍ മാര്‍ഗ നിര്‍ദേശങ്ങളും പിന്തുടരുന്നുണ്ടെന്ന് ഉറപ്പാക്കുമെന്നും അധികൃതര്‍ അറിയിക്കുകയുണ്ടായി.