സൗദി അറേബ്യയിലാണ് കൊറോണ വൈറസിന്റെ പുതിയ വകഭേദമായ ഒമിക്രോൺ കണ്ടെത്തിയത്. ഇതിനുപിന്നലെ യുഎഇയിലും റിപ്പോർട്ട് ചെയ്തതോടെ നടപടികൾ കടുപ്പിച്ച് അധികൃതർ രംഗത്ത് എത്തിയിരിക്കുകയാണ്. ആളുകള്‍ തടിച്ചുകൂടുന്ന തിരക്കേറിയതും തുറസ്സായതുമായ സ്ഥലങ്ങളിലും പൊതുപരിപാടികള്‍ നടക്കുന്ന ഇടങ്ങളിലും മാസ്‌ക് ധരിക്കല്‍ നിര്‍ബന്ധമാണെന്ന് സൗദി ആരോഗ്യ മന്ത്രാലയം വക്താവ് ഡോ. മുഹമ്മദ് അല്‍ അബ്ദുല്‍ അലി അറിയിക്കുകയുണ്ടായി. രാജ്യത്ത് കൊവിഡ് വ്യാപനവുമായി ബന്ധപ്പെട്ട കാര്യങ്ങള്‍ വിശദീകരിക്കാന്‍ നടത്തിയ വാര്‍ത്താസമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയിരിക്കുന്നത്. നേരത്തേ തുറസ്സായ സ്ഥലങ്ങളില്‍ മാസ്‌ക് ധരിക്കുന്നതിന് സൗദി ഇളവ് നല്‍കിയിരുന്നു.

എന്നാൽ കൊവിഡിന്റെ പുതിയ വകഭേദമായ ഒമിക്രോണ്‍ രാജ്യത്ത് റിപ്പോര്‍ട്ട് ചെയ്യപ്പെട്ട സാഹചര്യത്തിലാണ് കൂടുതല്‍ നിയന്ത്രണങ്ങള്‍ വീണ്ടും വന്നിരിക്കുന്നത്. തവക്കല്‍നാ ആപ്പ് വഴി ഇമ്മ്യൂണ്‍ സ്റ്റാറ്റസ് പരിശോധിക്കാന്‍ ക്രമീകരണങ്ങളില്ലാത്ത പള്ളികള്‍ പോലുള്ള ഇന്‍ഡോര്‍ ഏരിയകളില്‍ ശാരീരിക അകലം, മാസ്‌ക് ധരിക്കല്‍ തുടങ്ങിയ മുന്‍കരുതല്‍ നടപടികള്‍ പാലിക്കേണ്ടതാണ്.

അതോടൊപ്പം തന്നെ കൊവിഡ് ജാഗ്രത തുടരേണ്ടതിന്റെ പ്രാധാന്യത്തെ കുറിച്ച് പള്ളികളിലെ ഇമാമുമാര്‍ ജനങ്ങളെ ബോധവല്‍ക്കരിക്കണം. കൂടാതെ പള്ളികളില്‍ കൊവിഡ് നിയന്ത്രണങ്ങള്‍ കര്‍ശനമായി പാലിക്കണം. ഇതില്‍ വീഴ്ചയുണ്ടാകുന്ന ശ്രദ്ധയില്‍പ്പെട്ടാല്‍ മന്ത്രാലയത്തിന്റെ സര്‍വീസ് സെന്ററിലേക്ക് 1933 എന്ന നമ്പറില്‍ വിവരം വിശ്വാസികള്‍ റിപ്പോര്‍ട്ട് ചെയ്യണം. രണ്ട് ഡോസ് കോവിഡ് വാക്സിന്‍ എടുത്തു എന്നത് മാസ്‌ക് ധരിക്കാതിരിക്കാനുള്ള ന്യായീകരണമല്ലെന്നും മന്ത്രാലയം വക്താവ് വ്യക്തമാക്കിയിരിക്കുകയാണ്.

അതേസമയം, രണ്ടാമത്തെ ഡോസ് സ്വീകരിച്ച് ആറ് മാസത്തിന് ശേഷം പ്രതിരോധശേഷി വര്‍ധിപ്പിക്കാന്‍ ബൂസ്റ്റര്‍ ഡോസ് കൂടി എടുക്കണമെന്നും ഡോ. മുഹമ്മദ് അല്‍ അബ്ദുല്‍ അലി ചൂണ്ടിക്കാണിക്കുകയും ചെയ്തിട്ടുണ്ട്. സൗദിയില്‍ കൊവിഡ് വ്യാപനം നിയന്ത്രണ വിധേയമായിട്ടുണ്ടെങ്കിലും ജാഗ്രത കൈവിടാന്‍ സമയമായിട്ടില്ല. കോവിഡ് വാക്‌സിനേഷന്‍ ക്യാംപയിനിന്റെ വിജയമാണ് സൗദിയില്‍ കൊവിഡ് വ്യാപനം പിടിച്ചുനിര്‍ത്താന്‍ സഹായിച്ചത്.

2020 ഡിസംബറില്‍ ആരംഭിച്ച വാക്‌സിനേഷന്‍ ക്യാംപയിനില്‍ ഇതുവരെയായി 4.7 കോടിയിലേറെ ഡോസുകള്‍ ഇതിനകം നല്‍കാന്‍ സാധിച്ചതായും അദ്ദേഹം അറിയിക്കുകയുണ്ടായി. ഇനിമുതൽ കടുത്ത നിയന്ത്രണങ്ങളിലേക്കാണ് സൗദി അറേബ്യ കടക്കുന്നത്.