യുഎഇയില് ഇന്ന് കൊവിഡ് സ്ഥിരീകരിച്ചത് 92 പേര്ക്ക്; പുതിയ രോഗികളെ കണ്ടെത്തിയത് പുതിയതായി നടത്തിയ 2,45,149 പരിശോധനകളില് നിന്ന്, കഴിഞ്ഞ 24 മണിക്കൂറിനിടെ പുതിയ കൊവിഡ് മരണങ്ങളില്ല
യുഎഇയില് ഇന്ന് 92 പേര്ക്ക് പുതിയതായി കൊവിഡ് 19 വൈറസ് ബാധ സ്ഥിരീകരിച്ചതായി റിപ്പോർട്ട്. ആരോഗ്യ പ്രതിരോധ മന്ത്രാലയമാണ് അറിയിച്ചിരിക്കുന്നത്. ചികിത്സയിലായിരുന്ന 71 പേരാണ് ഇന്ന് രോഗമുക്തരായത്. കഴിഞ്ഞ 24 മണിക്കൂറിനിടെ പുതിയ കൊവിഡ് മരണങ്ങളൊന്നും രാജ്യത്ത് റിപ്പോര്ട്ട് ചെയ്യപ്പെട്ടിട്ടില്ല.
അതോടൊപ്പം തന്നെ പുതിയതായി നടത്തിയ 2,45,149 പരിശോധനകളില് നിന്നാണ് പുതിയ രോഗികളെ കണ്ടെത്തിയത്. ആകെ 10.49 കോടിയിലേറെ പരിശോധനകളാണ് രാജ്യത്ത് നടത്തിയിരിക്കുന്നത്. ഇതുവരെയുള്ള കണക്കുകള് പ്രകാരം ആകെ 7,42,894 പേര്ക്ക് യുഎഇയില് കൊവിഡ് വൈറസ് ബാധ സ്ഥിരീകരിച്ചിട്ടുണ്ട്. ഇവരില് 7,37,967 പേര് ഇതിനോടകം തന്നെ രോഗമുക്തരായി. 2,151 പേരാണ് രാജ്യത്ത് ആകെ കൊവിഡ് ബാധിച്ച് മരണപ്പെട്ടത്. നിലവില് രാജ്യത്ത് 2,776 കൊവിഡ് രോഗികളാണ് നിലവിൽ ചികിത്സയിൽ കഴിയുന്നത്.
അതേസമയം എക്സ്പോ 2020 ദുബൈ ഇന്ത്യന് പവലിയനില് സന്ദര്ശകരുടെ എണ്ണം അഞ്ചു ലക്ഷം പിന്നിട്ടതായി റിപ്പോർട്ട്. 70 ദിവസത്തിനിടെയാണ് ഇന്ത്യന് പവലിയനില് ഇത്രയും സന്ദര്ശകരെത്തിയത് എന്നത് ഏവരെയും അമ്പരപ്പിലാഴ്ത്തിയിരിക്കുകയാണ്. കേന്ദ്ര വാണിജ്യ, വ്യവസായ മന്ത്രി പീയൂഷ് ഗോയലാണ് ഇക്കാര്യം ട്വിറ്ററിലൂടെ അറിയിച്ചത്.
കൂടാതെ ഇന്ത്യയുടെ ലക്ഷ്യങ്ങള്, അഭിമാനകരമായ നേട്ടങ്ങള്, ഇന്ത്യയുടെ പങ്കാളിത്തങ്ങള്, ജനങ്ങള് എന്നിവയെ പ്രതിഫലിപ്പിക്കുന്ന എക്സ്പോയിലെ ഇന്ത്യന് പവലിയന് ലോകത്തിന് മുമ്പില് തല ഉയര്ത്തി നില്ക്കുന്നതായി അദ്ദേഹം ട്വീറ്റ് ചെയ്യുകയുണ്ടായി. ദുബൈ എക്സ്പോയില് പങ്കെടുക്കാനായതില് അഭിമാനമുണ്ടെന്നും ആധുനിക ഇന്ത്യയുടെ സാധ്യതകളും കഴിവും കാണാനുള്ള സന്ദര്ശകരുടെ പ്രവാഹത്തില് സന്തോഷമുണ്ടെന്നും യുഎഇയിലെ ഇന്ത്യന് അംബാസഡര് സഞ്ജയ് സുധീര് ട്വിറ്ററില് രേഖപ്പെടുത്തി.
https://www.facebook.com/Malayalivartha